കൊച്ചി: സ്കൂള്, കോളജ് പരിസരങ്ങളിലെ പുകയില ഉല്പന്നങ്ങളുടെ വില്പനക്കെതിരെ സിറ്റി പോലീസ് വ്യാപകമായി പരിശോധന നടത്തി. നഗര പരിധിയിലെ സ്കൂള് പരിസരങ്ങളില് അനധികൃതമായി ഹാന്സ് തുടങ്ങി നിരോധിച്ചിട്ടുള്ള പുകയില ഉല്പന്നങ്ങള് വില്പന നടത്തിയ 14 കടകള്ക്കെതിരെ കോട്പ നിയമപ്രകാരം കേസെടുത്തു.
സ്കൂള് പരിസരങ്ങളിലും മറ്റും നിരോധിച്ച പുകയില ഉല്പന്നങ്ങളുടെ വില്പന സ്റ്റുഡന്റ്സ് പോലീസ് കേഡറ്റുകള് കണ്ടെത്തി സിറ്റി പോലീസിന് വിവരങ്ങള് കൈമാറി. കേഡറ്റുകളുടെ സഹകരണത്തോടെ ഇന്നലെ രാവിലെ മുതല് പരിശോധന നടത്തിയത്.
റേഞ്ച് പോലീസ് ഇന്സ്പെക്ടര് ജനറല് പി വിജയന് ഐപിഎസിന്റെ നിര്ദേശപ്രകാരമായിരുന്നു പരിശോധന. ജില്ലാ പോലീസ് മേധാവി എം.പി. ദിനേശ് ഐപിഎസിന്റെ നേതൃത്വത്തില് എസ്പിസി പദ്ധതിയുടെ ജില്ലാ നോഡല് ഓഫീസര് അസിസ്റ്റന്റ് പോലീസ് കമ്മീഷണര് രാജേഷ് ടി .ആര്, പോലീസ് ഇന്സ്പെക്ടര്മാര്, എസ്എച്ച്ഒമാര്, എസ്പിസി പദ്ധതിയുടെ ഡ്രില് ഇന്സ്പെക്ടര്മാര്, തുടങ്ങിയവര് വിവിധ സ്ഥലങ്ങളില് പരിശോധനകള് നയിച്ചു.
സ്കൂളുകള് കേന്ദ്രീകരിച്ച് ലഹരി വസ്തുക്കള് വിതരണം നടത്തുന്നവരെ നിയമത്തിന് മുന്പില് കൊണ്ട് വന്ന് ലഹരി വിമുക്ത സ്കൂള് പരിസരം എന്ന ലക്ഷ്യം മുന്നിര്ത്തി കൊച്ചി സിറ്റി സ്റ്റുഡന്റ് പോലീസ് കേഡറ്റ് പദ്ധതിയുടെ നേതൃത്വത്തില് ശക്തമായ പ്രവര്ത്തനങ്ങള് വരും നാളുകളിലും ഉണ്ടാകുമെന്ന് എസ്പിസി ജില്ലാ നോഡല് ഓഫീസര് അറിയിച്ചു.
