കമ്പംമെട്ട്: ഹിന്ദി അധ്യാപികയുടെ മാല ബൈക്കിലെത്തിയ ആള്‍ കവര്‍ന്നു. കുഴിത്തൊളു ദീപ ഹൈസ്‌കൂളിലെ അധ്യാപിക ലിസമ്മ മാത്യു(47)വിന്റെ 2.5 പവന്‍ തൂക്കം വരുന്ന ഘടികാര മാലയാണ് നഷ്ടപ്പെട്ടത്. ഇന്നലെ ഉച്ചയ്‌ക്ക് 1.30ഓടെ കുഴിത്തൊളു പാറക്കടവ് റോഡിലാണ് സംഭവം. സ്‌കൂളിന് സമീപത്തെ വീട്ടില്‍ നിന്നും ഉച്ചയ്‌ക്ക് ഊണ് കഴിച്ച ശേഷം മടങ്ങവേയാണ് സംഭവം.
ബൈക്കിലെത്തിയ ആള്‍ കുളുത്തൊഴു എത്തിയോ എന്ന് ചോദിച്ച് സമീപത്ത് വണ്ടി നിര്‍ത്തുകയായിരുന്നു. ഞൊടിയിടയില്‍ മാല പറിച്ച ആള്‍ കടന്നു കളഞ്ഞതായാണ് അധ്യാപിക പറയുന്നത്. 35 വയസ് പ്രായം വരുന്ന കറുത്ത നിറമുള്ളയാള്‍ ഹെല്‍മറ്റ് ധരിച്ചിരുന്നു. വണ്ടി എതെന്നോ നമ്പറോ ശ്രദ്ധിക്കാനായിട്ടില്ലെന്നും ഇവര്‍ പറയുന്നു. സംഭവത്തില്‍ പോലീസ് കേസ് എടുത്ത് അന്വേഷണം നടത്തിവരികയാണെന്ന് എസ്‌ഐ ഷനല്‍ കുമാര്‍ പറഞ്ഞു. 50000 രൂപ വിലവരുന്ന മാലയാണ് നഷ്ടപ്പെട്ടത്.
രണ്ട് മാസം മുമ്പ് തൊടുപുഴ കാളിയാര്‍ സ്റ്റേഷന്‍ ലിമിറ്റില്‍ ഇതിന് സമാനമായ രീതിയില്‍ മാല മോഷണം ഉണ്ടായിട്ടുണ്ട്. കേസുകള്‍ വര്‍ദ്ധിക്കുമ്പോഴും പ്രതികളെ പിടികൂടാനാകാത്തത് പോലീസിന് തലവേദനയാകുകയാണ്.
