കറുകച്ചാല് : വേനല് കടുത്തതോടെ വെള്ളാവൂര്, കങ്ങഴ, നെടുംകുന്നം, പഞ്ചായത്തുകളില് കുടിവെള്ളക്ഷാമം രൂക്ഷമാകുന്നു. കുളത്തൂര്മൂഴിയിലെ കിണറ്റില് നിന്നാണ് ഇവിടേയ്ക്കുള്ള വെള്ളം പമ്പുചെയ്യുന്നത്. കങ്ങഴയിലെ മുണ്ടത്താനത്തും നെടുംകുന്നത്തെ വീരന് മലയിലും ഉള്ള ഓവര് ഹെഡ് ടാങ്കുകളിലേക്ക് കുളത്തൂര്മൂഴിയില് നിന്നുമാണു വെള്ളം പമ്പു ചെയ്യുന്നത്. വെള്ളാവൂര് പഞ്ചായത്തിന് ഭാഗികമായും നെടുംകുന്നം കങ്ങഴ പഞ്ചായത്തിന് പൂര്ണ്ണമായുമാണ് വെള്ളം പമ്പു ചെയ്ത് എത്തിക്കുന്നത്.
1500 ഗാര്ഹിക കണക്ഷനുകളിലും 150-ല് പ്പരം പൊതു ടാപ്പുകളുമാണുള്ളത്. ഇപ്പോള് വെള്ളം എത്തുന്നുമില്ല ഈ പ്രശ്നത്തിന് പരിഹാരം കാണാന് കഴിയില്ലെന്നുമാണു ജല അതോറിറ്റി പറയുന്നത്. മണിമലയാറ്റില് ഒട്ടേറെ ചെക്കു ഡാമുകള് വന്നതോടെ താഴേക്കുള്ള നീരോഴുക്ക് നിലച്ചതായാണ് കുടിവെള്ള കിണര് വറ്റാന് കാരണം.
ഒരു മണിക്കൂര് പോലും വെള്ളം പമ്പു ചെയ്യിക്കുവാന് സാധിക്കുന്നില്ല. കറുകച്ചാല് മാടപ്പള്ളി പഞ്ചായത്തിലേക്കുള്ള കുടിവെള്ളവും മണിമലയാറ്റില് നിന്നുമാണ് എത്തിക്കുന്നത്. ഇവിടെയും മുകള് ഭാഗങ്ങളില് തടയണ ഉള്ളതുകൊണ്ട് നീരൊഴുകില്ല. ശാന്തിപുരത്തുള്ള ഓവര് ഹെഡ് ടാങ്കിലും വേണ്ടത്ര വെള്ളം എത്തുന്നില്ല. പമ്പു ഹൗസിനു താഴെ വന് തോതില് തടയണ നിര്മ്മിച്ചാല് കിണറ്റില് ഭൂഗര്ഭ ജലവിതരണം ഉയര്ത്താനാകും.
