കല്പ്പറ്റ : കേരളത്തിലെ ഭൂസമര പ്രഖ്യാപനം ഗോത്രമഹാസഭയുടെ നേതൃത്വത്തി ല് ഫെബ്രുവരി 19ന് നടത്തുമെന്ന് ആദിവാസി ഗോത്രമഹാസഭ അധ്യക്ഷ സി.കെ. ജാനു പത്രസമ്മേളനത്തില് അറിയിച്ചു.
മുത്തങ്ങ ദിനാചരണവും ജോഗി അനുസ്മരണവും അന്ന് നടക്കും. രാവിലെ 8.30ന് മുത്തങ്ങ ജോഗി സ്മൃതിമണ്ഡപത്തില് ഗോത്രപൂജയും പുഷ്പാര്ച്ചനയും നടത്തും. ഇവിടെ നിന്നും ദീപശിഖാപ്രയാണത്തോടെ കല്പ്പറ്റയില് എത്തിച്ചേരും. രാവിലെ 10ന് ചന്ദ്രഗിരി ഓഡിറ്റോറിയത്തി ല് ആരംഭിക്കുന്ന അനുസ്മരണ സമ്മേളനം ജാര്ഗഘണ്ഡിലെ വനവാസി നേതാവ് എലീന മുണ്ട ഉദ്ഘാടനം ചെയ്യും. ആദിവാസി ഗോത്രമഹാസഭ അധ്യക്ഷ സി.കെ. ജാനു അധ്യക്ഷത വഹിക്കും. തുടര്ന്ന് ആദിവാസി ഗോത്രമഹാസഭയുടെ ഭൂസമര പ്രഖ്യാപനവും നടക്കും. വൈകുന്നേരം 3.30ന് കല്പ്പറ്റ വിജയപമ്പ് പരിസരത്ത് നടക്കുന്ന പൊതുസമ്മേളനം സി. കെ.ജാനു ഉദ്ഘാടനം ചെയ്യും. ആദിവാസി ഗോത്രമഹാസഭ സംസ്ഥാന സെക്രട്ടറി ബിജു കാക്കത്തോട്, ബാബു കാര്യമ്പാടി, ചന്ദ്രന് കാര്യമ്പാടി, വെള്ളി പുല്പ്പള്ളി തുടങ്ങിയവര് പത്രസമ്മേളനത്തില് പങ്കെടുത്തു.
മുത്തങ്ങ സംഭവത്തിന്റെ പതിനാലാം വാര്ഷികം വിപുലമായി ആചരിക്കാനാണ് ഗോത്രമഹാസഭ തയ്യാറെടുക്കുന്നത്. മുത്തങ്ങസമരത്തിന്റെ ഭാഗമായി ഭൂമി നല്കുമെന്ന് പറഞ്ഞ 285 കുടുംബങ്ങളെയും സര്ക്കാര് വഞ്ചിച്ചിരിക്കുകയാണ്. ഇടതുപക്ഷ സര്ക്കാരില്നിന്നും നീതി പ്രതീക്ഷിക്കുന്നില്ല. ഭൂമി നല്കുമെന്ന് പറഞ്ഞ വെള്ളരിമല, മരിയനാട്, വാളാട്, കാഞ്ഞിരങ്ങാട്, തേറ്റമല ഭാഗങ്ങളില് സര്ക്കാര് നിര്ദ്ദേശപ്രകാരം വനവാസികള് തന്നെ കാട് വെട്ടി തെള്ളിക്കുന്നുണ്ട്. അനാവശ്യകാരണങ്ങള് പറഞ്ഞ് ഭൂമി നല്കാതിരിക്കാനാണ് രണ്ട് സര്ക്കാരുകളും ശ്രമിച്ചത്. കേരളത്തില് വനവാസികളുടെ അവസ്ഥ ദയനീയമാണ്. ഭൂസമരത്തിന് ആരുടെ പിന്തുണ ലഭിച്ചാലും അത് സ്വീകരിക്കുമെന്നും ജാനു പറഞ്ഞു.
മുന്കാലങ്ങളില് നടന്ന സമരങ്ങള്ക്ക് വന് ജനപിന്തുണയാണ് ലഭിച്ചത്. ഗോത്രമഹാസഭയുടെ പേരില് ഗീതാനന്ദനും അനുസ്മരണം നടത്തുന്നുണ്ടല്ലോ എന്ന പത്രലേഖകരുടെ ചോദ്യത്തിന് അദ്ദേഹത്തിന് അത് ചെയ്യാമല്ലോ എന്നായിരുന്നു ജാനുവിന്റെ മറുപടി.
