ഇരിട്ടി: അമ്പായത്തോടില്‍ വനത്തിനുള്ളില്‍ കാട്ടാനയാക്രമണത്തില്‍ കൊല്ലപ്പെട്ട പൊയ്യ ഗോപാലന് ഒടുവില്‍ വിശ്രമവും വനത്തില്‍ത്തന്നെ. അമ്പായത്തോടിലെ താഴെ പാല്‍ച്ചുരത്തെ കോളനിയിലാണ് ഗോപാലനം കുടുംബവും താമസിക്കുന്നത്. കോളനിയില്‍ വീടുകള്‍ അടുത്തടുത്തായതിനാല്‍ ഇവിടുള്ളവരുടെ മൃതദേഹം വനത്തില്‍ സംസ്‌കരിക്കുകയാണ് പതിവ്.
വ്യാഴാഴ്ച വൈകിട്ട് 4 മണിക്കാണ് ഫയര്‍വാച്ചറായ താഴെപാല്‍ചുരം കോളനിയിലെ പൊയ്യ ഗോപാലന് ജോലി കഴിഞ്ഞ് മടങ്ങുന്നതിനിടെ വനത്തിനുള്ളില്‍ മഞ്ഞളംപുഴയരികില്‍ കാട്ടാനയുടെ ആക്രമണത്തില്‍ കൊല്ലപ്പെട്ടത്. തുടര്‍ന്ന് മാനന്തവാടി ജില്ലാ ആശുപത്രിയില്‍ പോസ്റ്റുമോര്‍ട്ടത്തിന് കൊണ്ടുപോയ മൃതദേഹം വെള്ളിയാഴ്ച ഉച്ചയോടെ അമ്പായത്തോടിലെത്തിച്ച് ടൗണില്‍ പൊതുദര്‍ശനത്തിന് വച്ചു. അരമണിക്കൂറോളം ടൗണില്‍ പൊതുദര്‍ശനത്തിന് ശേഷം അമ്പായത്തോട് നിന്നും താഴെ പാല്‍ചുരം കോളനിവരെ തുറമുഖ വകുപ്പ് മന്ത്രി കടന്നപ്പള്ളി രാമചന്ദ്രന്‍, എംഎല്‍എ അഡ്വ.സണ്ണി ജോസഫ് തുടങ്ങിയ ജനപ്രതിനിധികളുടെ നേതൃത്വത്തില്‍ വിലാപയാത്രയായി എത്തിച്ചു. തുടര്‍ന്ന് വീട്ടില്‍ പൊതുദര്‍ശനത്തിന് വച്ച മൃതദേഹത്തില്‍ സംസ്ഥാന സര്‍ക്കാരിനു വേണ്ടി മന്ത്രി കടന്നപ്പള്ളി രാമചന്ദ്രന്‍, അഡ്വ സണ്ണി ജോസഫ് എംഎല്‍എ, വനംവകുപ്പിന് വേണ്ടി ഡിഎഫ്ഒ സുനില്‍പാമടി, വിവിധ രാഷ്‌ട്രീയ സാമൂഹിക തൊഴിലാളി സന്നദ്ധ സംഘടനകള്‍ക്ക് വേണ്ടി വിവിധ നേതാക്കള്‍ എന്നിവര്‍ പുഷ്പചക്രം അര്‍പ്പിച്ചു. ആര്‍ എസ്എസ് നേതാവ് വത്സന്‍ തില്ലങ്കേരി, ബിജെപി ജില്ലാ സെക്രട്ടറി കൂട്ട ജയപ്രകാശ്, ബിഡിജെഎസ് സംസ്ഥാന വൈസ് പ്രസിഡന്റ് പൈലി വാത്യാട്ട്, ജില്ലാ പഞ്ചായത്തംഗം സണ്ണി മേച്ചേരി, പേരാവൂര്‍ ബ്ലോക്ക് പഞ്ചായത്ത് പ്രസിഡന്റ് ടി.പ്രസന്ന, വൈസ് പ്രസിഡന്റ് വി.ഷാജി ,അംഗങ്ങളായ ഉഷ അശോകന്‍, നിഷ ബാലകൃഷ്ണന്‍, വര്‍ഗീസ് ജോസഫ്, വിജയന്‍ മനങ്ങാടന്‍, കൊട്ടിയൂര്‍ പഞ്ചായത്ത് പ്രസിഡന്റ് ഇന്ദിര ശ്രീധരന്‍ ,വൈസ് പ്രസിഡന്റ് റോയി നമ്പുടാകം, കേളകം പഞ്ചായത്ത് പ്രസിഡന്റ് മൈഥിലി രമണന്‍, വൈസ് പ്രസിഡന്റ് രാജന്‍ അടുക്കോലി, കണിച്ചാര്‍ പഞ്ചായത്ത് പ്രസിഡന്റ് സെലിന്‍മാണി, വൈസ് പ്രസിഡന്റ് സ്റ്റാനി എടത്താഴെ, ഡിസിസി ജനറല്‍ സെക്രട്ടറി പി.സി.രാമകൃണന്‍, ഇന്‍ഫാം ദേശീയ ചെയര്‍മാന്‍ ഫാ ജോസഫ് ഒറ്റപ്ലാക്കല്‍ തുടങ്ങിയ വിവിധ പ്രമുഖര്‍ അന്തിമോപചാരം അര്‍പ്പിച്ചു. തുടര്‍ന്ന് 2 മണിയോടെ മൃതദേഹം വീടിനു സമീപത്തുള്ള വനത്തിനുള്ളില്‍ സംസ്‌കരിച്ചു. പ്രദേശത്ത് സംഘര്‍ഷ സാധ്യത കണക്കിലെടുത്ത് ഇരിട്ടി ഡിവൈഎസ്പി പ്രജീഷ് തോട്ടത്തിലിന്റെ നേതൃത്വത്തില്‍ മട്ടന്നൂര്‍ സി ഐ ഷാജു ജോസഫ്, പേരാവൂര്‍ സര്‍ക്കിളിന് കീഴിലുള്ള പോലീസ് സ്‌റ്റേഷനുകളിലെ എസ്‌ഐ ഉള്‍പ്പെടെയുള്ള ഉള്ള ഉദ്യോഗസ്ഥര്‍ എന്നിവരുടെ നേതൃത്വത്തില്‍ വന്‍ പോലീസ് സംഘം മേഖലയില്‍ ക്യാമ്പ് ചെയ്യുന്നുണ്ട്.
