കണ്ണൂര്: തലശ്ശേരി മേഖലയില് സിപിഎം നേതൃത്വം നിരന്തരമായി രാഷ്ട്രീയ സംഘര്ഷങ്ങള് ആസൂത്രണം ചെയ്ത് നടപ്പിലാക്കുന്നത് പാര്ട്ടിയില് വളര്ന്ന് വരുന്ന വിഭാഗീയതക്ക് തടയിടാന്. കാലങ്ങളായി സിപിഎം നേതൃത്വം മുന്കൂട്ടി നിശ്ചയിച്ച് നടപ്പിലാക്കുന്ന അക്രമപരമ്പരകള്ക്കതിരെയും ദീര്ഘകാലമായി പാര്ട്ടിയില് സജീവമായിരുന്ന നേതാക്കന്മാരെ വെട്ടിയൊതുക്കി ചില പുതിയ നേതാക്കന്മാര് ഉയര്ന്നുവന്നതും തലശ്ശേരിയില് പാര്ട്ടിയെ പൊട്ടിത്തെറിയുടെ വക്കിലെത്തിച്ചിരുന്നു. കഴിഞ്ഞ നിയമസഭാ തെരഞ്ഞെടുപ്പില് സ്ഥാനാര്ത്ഥി നിര്ണ്ണയവുമായി ബന്ധപ്പെട്ട് പ്രശ്നം രൂക്ഷമായിരുന്നു. തലമുതിര്ന്ന നിരവധി പാര്ട്ടി നേതാക്കന്മാരെ വെട്ടിനിരത്തി കോടിയേരിയുടെ സ്വന്തം ഇഷ്ടപ്രകാരം എ.എന്.ഷംസീറിന് സ്ഥാനാര്ത്ഥിത്വം നല്കിയതിനെതിരെ ശക്തമായ പ്രതിഷേധമുയര്ന്നിരുന്നു. കോടിയേരിയുടെ മാത്രം സ്വന്തക്കാരനായതുകൊണ്ടാണ് ഷംസീറിന് സീറ്റ് നല്കിയതെന്നാണ് ഒരു വിഭാഗത്തിന്റെ ആക്ഷേപം. നേരത്തെ രഹസ്യമായി അണിയറയില് മാത്രമുണ്ടായിരുന്ന പ്രതിഷേധം ഏതാനും നേതാക്കന്മാര് കഴിഞ്ഞ ദിവസം പാര്ട്ടി വേദികളില് പരസ്യമായി ഉയര്ത്തിയിരുന്നു. കോടിയേരി തന്നെ നേരിട്ടിടപെട്ട് പ്രശ്നങ്ങള് സംസാരിച്ച് തീര്ത്തിരുന്നെങ്കിലും പൂര്ണ്ണമായും കെട്ടടങ്ങാത്തത് പാര്ട്ടി നേതൃത്വത്തിന് പ്രതിസന്ധിയുണ്ടാക്കുന്നുണ്ട്. നേരത്തെ പാര്ട്ടിയില് സജീവമായിരുന്ന സി.ഒ.ടി.നസീറിനെ ഒതുക്കിയതിന് പിന്നില് കോടിയേരിയും ഷംസീറുമാണെന്നാണ് ഒരു വിഭാഗത്തിന്റെ വിലയിരുത്തല്.
കോടിയേരിക്കും ഷംസീറിനും എതിരെ നാനാഭാഗത്തു നിന്നും വ്യാപകമായ പ്രതിഷേധമുയരുന്ന സാഹചര്യത്തില് ഇതിനെ തടയിടാനാണ് കഴിഞ്ഞ ദിവസത്തെ ബോംബ് നാടകം അരങ്ങേറിയതെന്നാണ് സൂചന. നുണബോബംബ് പൊട്ടിച്ചതിന് പിന്നില് ഷംസീറാണെന്ന വസ്തുതയും പുറത്ത് വന്നിട്ടുണ്ട്. യുവാക്കള് പാര്ട്ടി പ്രവര്ത്തനത്തില് നിന്ന് വിട്ടുപോകുന്നതാണ് സിപിഎം അഭിമുഖീകരിക്കുന്ന ഗുരുതരമായ പ്രശ്നം. ആര്എസ്എസ് വിരോധം ഉയര്ത്തിക്കാട്ടി നിരന്തരമായ അക്രമത്തിലൂടെ അണികളെ പ്രചോദിപ്പിച്ച് നിര്ത്താമെന്ന ഒറ്റ തന്ത്രമാണ് സിപിഎം ഇപ്പോള് നടപ്പാക്കുന്നത്. കോടിയേരിയുടെ പൂര്ണ്ണമായ പിന്തുണയോടെ എ.എം.ഷംസീര് തലശ്ശേരിയില് അക്രമത്തിന് നേതൃത്വം നല്കുന്നതും ഇതേ തന്ത്രത്തിന്റെ ഭാഗമാണ്. തങ്ങള്ക്കെതിരെ പാര്ട്ടിക്കകത്തുയരുന്ന പ്രതിഷേധം ഒറ്റയിടിക്കില്ലാതാക്കാന് അക്രമം കൊണ്ട് സാധിക്കുമെന്നും ഇരുവരും വിലയിരുത്തുന്നു.
സിപിഎം ജില്ലാ സെക്രട്ടറി പി.ജയരാജന് എ.എന്.ഷംസീറിനെ അനുകൂലിക്കുന്നില്ലെന്നതാണ് എതിര് വിഭാഗത്തിന് ശക്തിപകരുന്നത്. തലശ്ശേരിയില് നടക്കുന്ന പരിപാടികളില് നിന്ന് ജയരാജനെ മാറ്റി നിര്ത്താനും പാര്ട്ടിയില് ജയരാജനുള്ള അപ്രമാദിത്വം തകര്ക്കാനും കോടിയേരിയുടെ ഒത്താശയോടെ കരുക്കള് നീക്കുന്നത് ഷംസീറാണ്. കഴിഞ്ഞ ദിവസം നോട്ട് നിരോധനവുമായി ബന്ധപ്പെട്ട് സിപിഎം തലശ്ശേരിയില് നടത്തിയ പരിപാടിയില് പി.ജയരാജനെ ബോധപൂര്വ്വം അപമാനിക്കാന് ശ്രമം നടന്നിരുന്നു. എം.ബി.രാജേഷ് എംഎല്എ ഉദ്ഘാടനം ചെയ്ത പരിപാടിയില് ഷംസീറിന് ശേഷമാണ് ജയരാജനെ സംസാരിക്കാന് വിളിച്ചത്. ഇതില് പ്രതിഷേധിച്ച് ജയരാജന് പരിപാടിയില് നിന്ന് ഇറങ്ങിപ്പോവുകയും ചെയ്തു. തലശ്ശേരി നഗരസഭയുടെ 150-ാം വാര്ഷികത്തോടനുബന്ധിച്ച് നടന്ന പരിപാടിയും ജയരാജന് ബഹിഷ്കരിച്ചിരുന്നു. ജില്ലയിലെ പ്രബലരായ നേതാക്കന്മാരുടെ നേതൃത്വത്തില് തലശ്ശേരിയില് പാര്ട്ടിക്കകത്ത് നടക്കുന്ന വിഭാഗീയത മറയിടാന് ഒറ്റമൂലിയെന്ന നിലയില് സിപിഎം അക്രമവുമായി മുന്നോട്ട് പോകുമ്പോള് സമാധാന കാംക്ഷികളായ ജനങ്ങളുടെ ജീവിതമാണ് ദുസ്സഹമാകുന്നത്
