ചങ്ങനാശ്ശേരി: എറണാകുളം, കോട്ടയം, പത്തനംതിട്ട, ഇടുക്കി ജില്ലകളില് ഹാന്സ് മൊത്തവിതരണം നടത്തിവന്ന 2പേര് ചങ്ങാശ്ശേരിയില് പോലീസിന്റെ പിടിയില്. 20 ബാഗുകളിലായി ഒളിപ്പിച്ച പതിനാല് ലക്ഷം രൂപ വിലമതിക്കുന്ന 32,000 ഹാന്സ് പാക്കറ്റുകള് പ്രതികളില്നിന്നും പിടിച്ചെടുത്തു. ഈരാറ്റുപേട്ട, കടുവാമുഴി പണ്ടാരപ്പറമ്പില് കനിയുടെ മകന് ഈസാ( 40) ഈരാറ്റുപേട്ട നടയ്ക്കല് വേലിയില് ബഷീറിന്റെ മകന് ഷിയാസ് ( 31) എന്നിവരാണ് പിടിയിലായത്. ജില്ലാ പോലീസ് മേധാവി എന്. രാമചന്ദ്രന് ലഭിച്ച രഹസ്യവിവരത്തിന്റെ അടിസ്ഥാനത്തില് ഷാഡോ പോലീസാണ് ഇവരെ പിടികൂടിയത്. ഇവരെ കഴിഞ്ഞ രണ്ടാഴ്ചയായി പോലീസ് നിരീക്ഷിച്ചു വരുകയായിരുന്നു.
ഇവരുടെ മൊബൈല് നമ്പറിലെ കോള്വിവരം ശേഖരിച്ച് പരിശോധിച്ചപ്പോള് രണ്ടാഴ്ചയ്ക്കുള്ളില് ആറുപ്രാവശ്യം ബംഗളൂരില് പോയി വന്നതായി കണ്ടെത്തി. ഫോണില്നിന്നും വിളിച്ച നമ്പറുകളിലെ ഉടമസ്ഥരുടെ മേല്വിലാസം ശേഖരിച്ച് ഇവരെയും പോലീസ് നിരീക്ഷിച്ചു വരുകയായിരുന്നു.
ബംഗളൂരില്നിന്നും ആഴ്ചയില് മൂന്നു പ്രാവശ്യം ട്രെയിനില് പാഴ്സലായാണ് സാധനങ്ങള് എത്തിച്ചിരുന്നത്. കോട്ടയത്ത് എത്തിക്കുന്ന സാധനം അവിടെനിന്നും ഈരാറ്റുപേട്ടയില് കൊണ്ടുവന്നതിന് ശേഷമാണ് ഓര്ഡര് അനുസരിച്ച് ആവശ്യക്കാര്ക്ക് വിതരണം ചെയ്തിരുന്നത്. സ്വന്തം കാറില് കടകളില് എത്തിച്ചു നല്കുകയാണ് പതിവ്. കാറിന്റെ പിന് സീറ്റ് ഇളക്കിമാറ്റി പരമാവധി ലോഡ് കയറ്റാന് സൗകര്യം ഒരുക്കിയിരുന്നു.
ചങ്ങനാശ്ശേരിയിലെ വ്യാപാരിയായ ഹാരീഷിന് ഹാന്സ് എത്തിക്കുന്നതിന് ഇടയിലണ്പ്രതികള് പിടിയിലായത്. ഹാന്സുമായി ഇവര് വരുന്നവിവരം മനസ്സിലാക്കിയ പോലീസ വ്യാപാരിയെയും നിരീക്ഷിച്ചിരുന്നു. ഇതിനെതുടര്ന്ന് ചങ്ങനാശേരി മാര്ക്കറ്റിന് സമീപമുള്ള ഇടിഞ്ഞു പൊളിഞ്ഞ കെട്ടിടത്തില് സാധനം ഇറക്കുന്ന സമയത്താണ് ഇവര് പിടിയിലായി.
കൂടുതല് ചോദ്യം ചെയ്തതോടെ ഈരാറ്റുപേട്ടയിലെ വീടിന് സമീപമുള്ള പറമ്പില് കൂടുതല് സാധനങ്ങള് ഒളിപ്പിച്ചതായി പ്രതികള് വെളിപ്പെടുത്തി. മൂവായിരത്തോളം ഹാന്സ് പാക്കറ്റുകള് ഈ പറമ്പില്നിന്നുമാണ് കണ്ടെത്തിയത്. ഈരാറ്റുപേട്ട പോലീസ് കേസെടുക്കുകയും ചെയ്തു. കോട്ടയം ജില്ലയിലെ ഏറ്റവും വലിയ ഹാന്സ് വേട്ടയാണ് ചങ്ങനശ്ശേരി ഡിവൈഎസ്പി വി. അജിത്തിന്റെ നേതൃത്വത്തില് സിഐ ബിനുവര്ഗീസ്, എസ്ഐ സിബിതോമസ് ഷാഡോ പോലീസിലെ എഎസ്ഐ കെ.കെ റെജി, റെജിമോന് കെ.കെ, ആന്റണി സെബാസ്റ്റ്യന്, പ്രതീക്ഷരാജ്, പ്രകാശ് എന്നിവര് ചേര്ന്നു നടത്തിയത്.
