ആലപ്പുഴ പട്ടണത്തിലെ മാലിന്യനിര്മാജനത്തിന്റെ ഭാഗമായി സ്ഥാപിക്കുന്ന ഏറോബിക് പ്ലാന്റുകള് ഗതാഗതതടസ്സം ഉണ്ടാക്കുന്നു. എസ്ഡിവി ഗ്രൗണ്ടിനു സമീപമുള്ള ഏറോബിക് പ്ലാന്റ് ഒരു ബസ്ബേയ്ക്കുള്ള സ്ഥലം അപഹരിച്ചാണ് സ്ഥാപിച്ചത്. സ്വകാര്യബസ് സ്റ്റാന്ഡ് നിര്മാണം പൂര്ത്തിയായി വരുന്ന സമയത്ത് അതിനു എതിര്വശത്ത് പ്ലാന്റ് നിര്മ്മിക്കരുതെന്നു ആവശ്യപ്പെട്ടിട്ടും പരിഗണിച്ചില്ല.
തൊട്ടുചേര്ന്നു തന്നെ വലിയ ഒരു പ്ലാന്റ് നിലവിലുള്ളതിനാല് റോഡരികിലെ സ്ഥലം ബസ്ബേയ്ക്കും പാര്ക്കിംഗിനുമായി നീക്കി വയ്ക്കണമെന്ന ആവശ്യമാണ് അവഗണിക്കപ്പെട്ടത്. പിന്നീട് പഴയ കൊട്ടാരപ്പാലത്തിനടുത്തു റോഡിന് സമീപം പ്ലാന്റ് സ്ഥാപിച്ചു. നിലവില് തത്തംപള്ളി കിടങ്ങാംപറമ്പ് ജംഗ്ഷനിലെ ഇടുങ്ങിയ റോഡിലാണ് പ്ലാന്റ് സ്ഥാപിക്കുന്നത്. ജംങ്ഷനിലേക്കുള്ള കാഴ്ച മറച്ചും വാഹനങ്ങള്ക്കു തിരിയാന് ബുദ്ധിമുട്ടാകുന്ന രീതിയിലും റോഡുവികസനം തടസ്സപ്പെടുത്തിയുമാണ് നിര്മാണം. അര നൂറ്റാണ്ടു മുന്പ് മുനിസിപ്പാലിറ്റി ലോറിയില് കയറ്റിക്കൊണ്ടു പോകാന് അമേധ്യപ്പാട്ടകള് ശേഖരിച്ചിരുന്ന അതേ സ്ഥലത്തു നിര്മ്മിക്കുന്ന പ്ലാന്റ് അതിന്റെ സ്മരണ പുതുക്കുകയാണെന്നു നാട്ടുകാര് പറയുന്നു.ദുര്ഗന്ധരഹിതമാണ് ഏറോബിക് പ്ലാന്റുകള് എന്നാണ് അധികൃതരുടെ അവകാശവാദമെങ്കിലും ഫലത്തില് അങ്ങനെയല്ല. ജൈവമാലിന്യങ്ങള് ഉള്ക്കൊള്ളാനുള്ള ഇടം പ്ലാന്റുകളില് വളരെ പരിമിതമാണ്. വീടുകളില് നിന്നു മാറ്റാന് ദിവസേന ബുദ്ധിമുട്ടുന്ന ഇലയും കമ്പും തെങ്ങോലയും വാഴത്തടയും ഒന്നും ഇടാനും സാധിക്കില്ല.
സ്ഥാപനങ്ങള്ക്കോ വീടുകള്ക്കോ സമീപം ഇത്തരം പ്ലാന്റുകള് സ്ഥാപിക്കുന്നതില് പൊതുജനങ്ങള്ക്കു പലകാരണങ്ങളാല് വിയോജിപ്പുണ്ട്. ദുര്ഗന്ധരഹിതമെന്നു അവകാശപ്പെടുന്ന ഏറോബിക് പ്ലാന്റുകള് തടസ്സങ്ങള് ഒന്നുമില്ലാതെ പൊതുസ്ഥാപനങ്ങളോടനുബന്ധിച്ച് സ്ഥാപിക്കണമെന്നാണ് ആവശ്യം ഉയരുന്നത്. കോടതി, കളക്ടറേറ്റ്, സിവില് സ്റ്റേഷന് അനക്സ്, ബസ്റെയില്വേ സ്റ്റേഷനുകള്, മുനിസിപ്പല് ഓഫീസ് തുടങ്ങി ധാരാളം ആള്ക്കാര് വന്നുപോകുന്ന സര്ക്കാര് വളപ്പുകളിലും സ്ഥലമുള്ള വിദ്യാലയങ്ങളിലും മറ്റുമാണ് ഇത്തരം പ്ലാന്റുകള് ആദ്യം സ്ഥാപിക്കേണ്ടിയിരുന്നത്.
