കല്പ്പറ്റ : മാതാ അമൃതാനന്ദമയി മാര്ച്ച് രണ്ട്, മൂന്ന് തിയതികളില് മാനന്തവാടിയില് എത്തുമെന്ന് സംഘാടകര് പത്രസമ്മേളനത്തില് അറിയിച്ചു. ബ്രഹ്മസ്ഥാന ക്ഷേത്ര മഹോത്സവത്തിന് മുഖ്യ കാര്മ്മികത്വം വഹിക്കാനാണ് അമൃതാനന്ദമയി മാനന്തവാടിയില് എത്തുന്നത്.
അമൃതാനന്ദമയി മഠത്തിന്റെ ആഭിമുഖ്യത്തില് സംസ്ഥാനത്ത് നൂറ് കോടിയുടെ ശുചിത്വപ്രവര്ത്തനങ്ങള് നടത്തുമെന്നും വയനാട്ടില് വാളാരംക്കുന്നിലെ വനവാസി സമൂഹത്തിന്റെ സാമ്പത്തിക ഭദ്രതയ്ക്കും ഉന്നമനത്തിനുമായി സോളാര് എനര്ജി ഉപയോഗിച്ച് പുല്തൈലം ഉത്പ്പാദിപ്പിക്കുന്ന യൂണിറ്റ് തുടങ്ങുമെന്നും സംഘാടകര് പറഞ്ഞു.
ഭാരതപര്യടനത്തിന്റെ ഭാഗമായി മാര്ച്ച് ഒന്നിന് വൈകുന്നേരം മാനന്തവാടിയില് എത്തുന്ന അമൃതാനന്ദമയി രണ്ട്, മൂന്ന് തിയതികളില് അനുഗ്രഹ പ്രഭാഷണം, ധ്യാനം, ഭക്തിഗാനസുധ, ദര്ശനം എന്നിവ ഉണ്ടായിരിക്കും. പുതിയതായി പണിത ആശ്രമമന്ദിരത്തിന്റെ സമര്പ്പണത്തിലും പങ്കെടുത്ത് മാര്ച്ച് നാലിന് രാവിലെ മൈസൂര് ബ്രഹ്മസ്ഥാന ക്ഷേത്ര മഹോത്സവത്തിനായി തിരിക്കും. മാനന്തവാടിയില് ബ്രഹ്മസ്ഥാന ക്ഷേത്ര മഹോത്സവത്തിന് എത്തുന്ന എല്ലാവര്ക്കും അമൃതാനന്തമയി ദര്ശനം നല്കും. 12 വിദേശ രാജ്യങ്ങളില് നിന്നുള്ള മുന്നൂറില് അധികം ഭക്തരും ഉണ്ടാകും.
ജില്ലയില് കൈനാട്ടിയിലെ അമൃതകൃപ ചാരിറ്റബിള് ഹോസ്പിറ്റലില് ഇതുവരെ ഏഴ് ലക്ഷം രോഗികള്ക്ക് സൗജന്യ ചികിത്സയും ആയിരത്തിഅഞ്ഞൂറില്പരം സൗജന്യമെഡിക്കല് ക്യാമ്പുകള് സംഘടിപ്പിക്കുകയും ചെയ്തിട്ടുണ്ട്. ഇരുനൂ റ്റിയമ്പത് ഹൃദയ ശസ്ത്രക്രിയകളും സൗജന്യമായി ചെയ്തു നല്കി. മുന്നൂറ് കുട്ടികള്ക്ക് വിദ്യാമൃതം സ്കോളര്ഷിപ്പ് നല്കി. സ്ത്രീ ശാക്തീകരണ പരിപാടിയുടെ ഭാഗമായി അമൃതശ്രീ സ്വാശ്രയ സംഘങ്ങള്, അമൃത വിദ്യാലയങ്ങള് തുടങ്ങിയവയും വിജയകരമായി നടന്നുവരുന്നതായും ഇവര് അറിയിച്ചു.
മൂന്ന് വര്ഷത്തിന് ശേഷം ജില്ലയില് എത്തുന്ന മാതാ അമൃതാനന്ദമയിക്ക് സ്വീകരണം നല്കുന്നതിനുള്ള വിപുലമായ സ്വാഗതസംഗം രൂപീകരിക്കാന് നാളെ രാവിലെ 10.30ന് മാനന്തവാടിയില് പ്രത്യേക യോഗം ചേരും. പത്രസമ്മേളനത്തില് അക്ഷയാമൃത ചൈതന്യ, പി.ചാത്തുക്കുട്ടി, എന്.കെ.മന്മദന്, അരിമുണ്ട സുരേഷ്, പി.കെ.സുധാകരന് എന്നിവര് പങ്കെടുത്തു.
