പാനൂര്: പബ്ലിക് റിലേഷന് വകുപ്പിന്റെ നേതൃത്വത്തില് നടത്തുന്ന ഹരിത കേരളം മിഷന് കലാജാഥക്ക് പാനൂരില് ഊഷ്മളമായ വരവേല്പ്പ്. പാനൂര് നഗരസഭയുടെയും ബ്ലോക്ക് പഞ്ചായത്തിന്റെയും നേതൃത്വത്തിലാണ് സ്വീകരണമൊരുക്കിയത്. ജാഥാ അംഗങ്ങളെ പാനൂര് ടൗണിലൂടെ ബാന്റ് മേളങ്ങളുടെ അകമ്പടിയില് സ്വീകരിച്ചാനയിച്ചു.
നാളെക്കായി പുഴകളും ജല സ്രോതസ്സുകളും സംരക്ഷിക്കാന് ഇന്ന് നമുക്ക് കൈകോര്ക്കാം എന്ന സന്ദേശവുമായാണ് കലാജാഥ പര്യടനം നടത്തുന്നത്. ജയചന്ദ്രന് കടമ്പനാടിന്റെ നേതൃത്വത്തില് നടക്കുന്ന ജാഥക്ക് ആവേശകരമായ സ്വീകരണമാണ് ലഭിക്കുന്നത്.
പാനൂര് ബസ് സ്റ്റാന്റില് നടന സ്വീകരണ സമ്മേളനം പാനൂര് നഗരസഭാധ്യക്ഷ കെ.വി.റംല ടീച്ചര് ഉദ്ഘാടനം ചെയ്തു. പാനൂര് ബ്ലോക്ക് പഞ്ചായത്ത് പ്രസിഡന്റ് കെ.ഇ.കുഞ്ഞബ്ദുള്ള അധ്യക്ഷത വഹിച്ചു. നഗരസഭാ സെക്രട്ടറി പ്രജിത്ത് സ്വാഗതം പറഞ്ഞു. വിദ്യാര്ത്ഥികളും ജനപ്രതിനിധികളും ഉള്പ്പെടെയുള്ളവര് പങ്കെടുത്തു.
