കണ്ടമംഗലം ക്ഷേത്രത്തില് ഇന്നലെ ടന്ന ദേശതാലപ്പൊലിയില് നിന്ന്
ചേര്ത്തല: കണ്ടമംഗലം ശ്രീ രാജരാജേശ്വരി മഹാദേവിക്ഷേത്രത്തിലെ ശ്രീകോവില് ശിവക്ഷേത്ര പ്രതിഷ്ടാ ചടങ്ങുകളുടെ ഭാഗമായി കണ്ടമംഗലത്തമ്മയുടെ ഇഷ്ടവഴിപാടായ താലപ്പൊലികള് ക്ഷേത്രത്തിലേക്ക് വന്നുതുടങ്ങി. ക്ഷേത്രസന്ധ്യകളെ ധന്യമാക്കി കടക്കരപ്പള്ളി, പട്ടണക്കാട് പഞ്ചായത്ത് പ്രദേശങ്ങളില് വ്യാപിച്ചുകിടക്കുന്ന ക്ഷേത്രകരയില് നിന്നും നൂറുകണക്കിന് ദേശതാലപ്പൊലികളാണ് പ്രതിഷ്ഠാകാലയളവില് ക്ഷേത്രത്തിലേക്കെത്തുന്നത്.
ഓരോ കുടുംബങ്ങളിലും കവുങ്ങിന് പൂക്കുലയും പുഷ്പങ്ങളും നെല്ലും കൊണ്ട് താലം അണിയിച്ചൊരുക്കും. അതില് തേങ്ങാമുറിയോ മണ്ചിരാതോ വെച്ച് ദീപം തെളിയിക്കും. ഇത്തരത്തില് വീടുകളില് ഒരുക്കുന്ന താലങ്ങള് വിവിധ സ്ഥലങ്ങള് കേന്ദ്രീകരിച്ച് ദേശതാലപ്പൊലികളായാണ് ക്ഷേത്രത്തിലേക്ക് പുറപ്പെടുന്നത്. കുടുംബങ്ങളില് തെളിയിക്കുന്ന നന്മയുടേയും സ്നേഹത്തിന്റെയും സാഹോദര്യത്തിന്റെയും ഈ വെളിച്ചം നാടാകെ പരത്തി ക്ഷേത്രത്തിലെത്തി സമര്പ്പിക്കുമ്പോള് ദേവി കൃപാകടാക്ഷങ്ങള് ചൊരിയുകയും ഭവനങ്ങളില് സമൃദ്ധിയും സമാധാനവും സന്തോഷവും കളിയാടുമെന്നുമാണ് ഭക്തജനവിശ്വാസം.
ചെണ്ടമേളം, പമ്പമേളം, പഞ്ചവാദ്യം, തകില് തുടങ്ങി വിവിധ വാദ്യമേളങ്ങളും അമ്മന്കുടം, മയിലാട്ടം, ഗരുഡന്പയറ്റ്, തെയ്യം, തിറ, ശിവകുടുംബം തുടങ്ങിയ വിവിധ കലാരൂപങ്ങളും താലപ്പൊലികള്ക്ക് മിഴിവേകുന്നു.
കെ.പി ആഘോഷ്കുമാര് ചെയര്മാനും പി.ടി രമേശ് കണ്വീനറുമായുള്ള കമ്മറ്റിയാണ് ദേശതാലപ്പൊലികള്ക്ക് നേതൃത്വം നല്കുന്നത്.
