കല്പ്പറ്റ: കര്ണാടകയിലെ നഞ്ചങ്കോടിനെ ബത്തേരിയിലൂടെ നിലമ്പൂരുമായി ബന്ധിപ്പിക്കുന്ന റെയില്പാതയ്ക്കുവേണ്ടി ജനപ്രതിനിധികളും നീലഗിരി-വയനാട് എന്എച്ച് ആന്ഡ് റയില്വേ ആക്ഷന് കമ്മിറ്റിയും വര്ഷങ്ങളായി നടത്തുന്ന നീക്കങ്ങള് ലക്ഷ്യത്തോട് അടുക്കവെ മൈസൂരു-തലശേരി റെയില് പാതയ്ക്കായി പുതിയ നിര്ദേശം സമര്പ്പിക്കാനുള്ള മൈസൂരു-മലബാര് റെയില്-റോഡ് ആക്ഷന് കൗണ്സിലിന്റെ പദ്ധതി വയനാടിനു വിനയാകുമെന്ന് ആശങ്ക. തെക്കേ വയനാട്ടിലുള്ളവര് അമരം പിടിക്കുന്ന ആക്ഷന് കമ്മിറ്റിയും വടക്കേ വയനാട്ടില്നിന്നുള്ള പ്രമുഖര് ഉള്പ്പെടുന്ന ആക്ഷന് കൗണ്സിലും റെയില്പാതയ്ക്കായി നടത്തുന്ന വടംവലി ജില്ലയുടെ പൊതു വികസനത്തിനു വിഘാതമാകുമെന്ന് വിലയിരുത്തുന്നവര് നിരവധി. റെയില്വെ വിഷയത്തില് ഉത്തരത്തിലുള്ളത് കിട്ടിയുമില്ല, കക്ഷത്തിലുള്ളത് പോകുകയും ചെയ്തുവെന്ന അനുഭവം വയനാടിനു ഉണ്ടാകുമെന്ന് ഇക്കൂട്ടര് പറയുന്നു.
നഞ്ചങ്കോട്-നിലമ്പൂര് പാതയ്ക്ക് 2016-’17ലെ റയില്വേ ബജറ്റില് അനുമതി ലഭിക്കുകയും പിങ്ക് ബുക്കില് ചേര്ക്കുകയും ചെയ്തതാണ്. തുടര്ന്ന് സംസ്ഥാനത്തിന് കടുത്ത സാമ്പത്തിക ബാധ്യത വരാത്ത രീതിയില് കമ്പനി രൂപീകരിച്ച് പദ്ധതി നടപ്പാക്കാനായി കേന്ദ്രവുമായി കരാര് ഒപ്പിടുകയുമുണ്ടായി. കമ്പനി രൂപീകരിച്ച് പ്രാവര്ത്തികമാക്കുന്നതിനു കേരളം തയാറാക്കിയ റെയില്വേ പദ്ധതികളുടെ മുന്ഗണനാപട്ടികയില് മൂന്നാം സ്ഥാനത്തായിരുന്നു നഞ്ചങ്കോട്-വയനാട് പാത. ഇതിനായുള്ള ധനസമാഹരണത്തിനു അന്തിമ സര്വേ നടത്തി വിശദമായ പദ്ധതിരേഖ തയാറാക്കേണ്ടതുണ്ട്. ഡിപിആര് തയാറാക്കുന്നതിനു സംസ്ഥാന സര്ക്കാര് ഡിഎംആര്സിയെ ചുമതലപ്പെടുത്തുകയും ചെലവിനത്തില് എട്ട് കോടി രൂപ അനുവദിച്ച് ഉത്തരവിറക്കുകയുമുണ്ടായി. ഇതിനു പിന്നാലെ ഡിഎംആര്സി സര്വേ ഉദേ്യാഗസ്ഥരെ നിയമിക്കുകയും പ്രാഥമിക ജോലികള്ക്ക് പുറംകരാറുകള് നല്കുകയും ചെയ്തു. ഇക്കഴിഞ്ഞ ജൂലൈ 23ന് ഡിഎംആര്സി ചെലവിനത്തില് ആദ്യഘട്ടമായി രണ്ട് കോടി രൂപ ആവശ്യപ്പെട്ടെങ്കിലും നല്കിയില്ല. ഇതോടെ നഞ്ചങ്കോട്-നിലമ്പൂര് പാതയുടെ ഫീല്ഡ് സര്വേ അനിശ്ചിതത്വത്തിലായി. ഇതിനിടയിലാണ് മൈസൂരു-തലശേരി പാതയ്ക്കുവേണ്ടി വാദമുയര്ത്തി മൈസൂരു-മലബാര് റെയില്-റോഡ് ആക്ഷന് കൗണ്സിലിന്റെ രംഗപ്രവേശം.
വന്യജീവി സങ്കേതങ്ങള് ഒഴിവാക്കി മൈസൂരുവില്നിന്ന് തലശേരിക്ക് റെയില്പാത നിര്മിക്കുന്നതു സംബന്ധിച്ച് കേന്ദ്ര റെയില്വേ മന്ത്രാലയത്തിനും സംസ്ഥാന സര്ക്കാരിനും ഡിഎംആര്സിക്കും നിര്ദേശങ്ങള് സമര്പ്പിക്കാനുള്ള ഒരുക്കത്തിലാണ് മൈസൂരു-മലബാര് റെയില്-റോഡ് ആക്ഷന് കൗണ്സില്. പാതയുടെ രൂപരേഖ തയാറാക്കല് അവസാനഘട്ടത്തിലാണെന്ന് കൗണ്സില് ഭാരവാഹികള് പറഞ്ഞു. മൈസൂരുവിനടുത്തുള്ള കടക്കോള റെയില്വേ സ്റ്റേഷനെ സര്ഗൂര്, ഗുണ്ടറ, മച്ചൂര്, ദൊട്ടബൈരക്കുപ്പ, ബാവലി, ഷാണമംഗലം, പാല്വെളിച്ചം, പയ്യമ്പള്ളി, വള്ളിയൂര്ക്കാവ്, മാനന്തവാടി, കുഞ്ഞോം, വിലങ്ങാട് വഴി വടകരയ്ക്കടുത്തുള്ള ചോറോട് റെയില്വേ സ്റ്റേഷനുമായി ബന്ധിപ്പിച്ചാല് 130 കിലോമീറ്ററില് താഴെ ദൂരമുള്ളതും രണ്ടായിരം കോടി രൂപയില് താഴെ നിര്മാണച്ചെലവ് വരുന്നതുമായ പാത യാഥാര്ഥ്യമാകുമെന്ന് കൗണ്സിലുമായി ബന്ധപ്പെട്ടവര് ചൂണ്ടിക്കാട്ടുന്നു. ബന്ദിപ്പുര, ബ്രഹ്മഗിരി, നാഗര്ഹോള ദേശീയോദ്യാനങ്ങള് പൂര്ണമായും ഒഴിവാക്കി നിര്മിക്കാനാകുന്ന പാത യാഥാര്ഥ്യമായാല് എറണാകുളത്തുനിന്നും ബംഗളൂരു, ആന്ധ്രപ്രദേശ് എന്നിവടങ്ങളിലേക്കുള്ള യാത്രാദൂരം ഗണ്യമായി കുറയുമെന്നും അവര് പറയുന്നു.
കഴിഞ്ഞ തിങ്കളാഴ്ച വയനാട്ടിലെത്തിയ ഡിഎംആര്സി മുഖ്യ ഉപദേഷ്ടാവ് ഡോ. ഇ. ശ്രീധരന് നഞ്ചങ്കോട്-നിലമ്പൂര് റെയില്വേ സംബന്ധിച്ച് കളക്ടറേറ്റ് കോണ്ഫറന്സ് ഹാളില് ജനപ്രതിനിധികളും ഉദ്യോഗസ്ഥരുമായി ചര്ച്ച നടത്തിയിരുന്നു. അനുമതി ലഭിച്ചാല് ആറ് വര്ഷത്തിനകം പാത യാഥാര്ഥ്യമാകുമെന്നാണ് ചര്ച്ചയ്ക്കിടെ ഡോ. ശ്രീധരന് പറഞ്ഞു.
