തൃക്കരിപ്പൂര്‍: മലേഷ്യയില്‍ നടന്ന ലോക മാസ്‌റ്റേര്‍സ് മീറ്റില്‍ഇന്ത്യക്കായി നേടിയ സ്വര്‍ണ്ണം നേടിയ തടിയന്‍ കൊവ്വല്‍ സ്വദേശി എം.പവിത്രനെ ഇന്ന് തൃക്കരിപ്പൂരില്‍വെച്ച് നടക്കുന്ന റവന്യൂ ജില്ലാ കലോത്സവത്തില്‍ അനുമോദിക്കും
ലോക മാസ്‌റ്റേഴ്‌സ് മീറ്റില്‍ പങ്കെടുക്കാന്‍ കഴിഞ്ഞ രണ്ടു വര്‍ഷവും അവസരമുണ്ടായിട്ടും യാത്രാച്ചെലവിനും മറ്റുമുള്ള സാമ്പത്തിക പ്രയാസത്താല്‍ പോകാന്‍ പറ്റാതിരുന്ന പവിത്രന് ഇക്കുറി കായികപ്രേമികളുടെ സഹായത്താല്‍ മലേഷ്യയില്‍ മത്സരിച്ചപ്പോള്‍ ഇന്ത്യയുടെ അഭിമാന താരമാവുകയായിരുന്നു. മലേഷ്യയില്‍ നടന്ന ലോക മാസ്‌റ്റേര്‍സ് മീറ്റില്‍ ഉദിനൂര്‍ തടിയന്‍ കൊവ്വലിലെ പവിത്രന് എന്ന കല്ല് ചെത്ത് തൊഴിലാളി പങ്കെടുത്ത നാലിനങ്ങളില്‍ മൂന്നു സ്വര്‍ണവും ഒരു വെള്ളിയുമാണ് നേടിയത്. പോള്‍വാള്‍ട്ട്, ലോങ്ങ്ജംപ്, ഹൈജംപ്, ഹര്‍ഡില്‍സ്, റിലേ എന്നിവയിലായിരുന്നു മലേഷ്യയില്‍ വെച്ച് പോരാടിയത്. ഇതില്‍ പോള്‍വാള്‍ട്ട്, ലോങ്ങ്ജംപ്, ഹൈജംപ് എന്നിവയിലാണ് സ്വര്‍ണം നേടി ഇന്ത്യായുടെയും കേരളത്തിലെയും യശസ്സ് ഉയര്‍ത്തിപ്പിടിച്ചത്. 35 വയസിന് മുകളില്‍ പ്രായമുള്ളവര്‍ക്കായാണ് മാസ്‌റ്റേഴ്‌സ് അത്‌ലറ്റിക് മീറ്റ് സംഘടിപ്പിക്കുന്നത്. ജില്ല, സംസ്ഥാനം, ദേശീയം, അന്തര്‍ദേശീയം എന്നീ തലങ്ങളിലാണ് ഇവര്‍ക്കായി മത്സരം സംഘടിപ്പിക്കാറുള്ളത്. കഴിഞ്ഞ നാല് വര്‍ഷമായി കേരളത്തെ പ്രതിനിധീകരിച്ച 39 കാരനായ പവിത്രന് ട്രാക്കിലും ഫീല്‍ഡിലും നേടിയെടുത്തത് തിളക്കമാര്‍ന്ന നേട്ടങ്ങളാണ്. എന്നാല്‍ ജപ്പാന്‍, ഓസ്‌ട്രേലിയ എന്നിവിടങ്ങളിലെ മത്സരവേദികളില്‍ എത്താന്‍പവിത്രന്റെ കയ്യില്‍ പണമുണ്ടായിരുന്നില്ല. ഇത്തവണ ലക്‌നൗവില്‍ നടന്ന ദേശീയ മത്സരത്തിലാണ് റിലേ ഉള്‍പ്പെടെ അഞ്ച് ഇനങ്ങളിലും ലോകമത്സരത്തില്‍ പങ്കെടുക്കാന്‍ യോഗ്യത നേടിയത്. സ്‌കൂള്‍ തലം മുതല്‍ പവിത്രന് കായികമേളകളില്‍ കഴിവ് തെളിയിച്ചിട്ടുണ്ട്. ജില്ലാ സ്‌പോര്‍ട്‌സ് കൗണ്‍സിലിന്റെ അംഗീകാരമുള്ള നീന്തല്‍പരിശീലകനും കബഡിയുടെ സ്‌റ്റേറ്റ് റഫറിയും കൂടിയാണ് പവിത്രന്. ഇത്തവണ അഞ്ചു കേന്ദ്രങ്ങളില്‍ സൗജന്യമായി നീന്തല്‍ പരിശീലനം പൂര്‍ത്തിയാക്കിയ പവിത്രന് ഈ മേഖലയിലുളള ശിഷ്യഗണങ്ങളും ഏറെയാണ്.
