തിരുവനന്തപുരം: നിയമസഭയില് പറഞ്ഞ വാക്കും തൊട്ടുപിന്നാലെ പുറത്തുവന്ന യഥാര്ത്ഥ നിലപാടും തമ്മിലുള്ള വൈരുദ്ധ്യത്താല് മുഖ്യമന്ത്രി വി.ഡി. സതീശന് വീണ്ടും വിവാദത്തില്. കുട്ടനാട്ടിലെ മൂലം വള്ളംകളിക്ക് പ്രാദേശിക അവധി അനുവദിക്കണമെന്ന ആവശ്യത്തില് സഭയില് അനുകൂല സൂചന നല്കിയ സതീശന്, മറുപടി പറഞ്ഞ ഉടന് തന്നെ ‘ഒരു കാരണവശാലും അവധി കൊടുക്കില്ല’ എന്ന് പറയുന്ന ദൃശ്യങ്ങള് പുറത്തുവന്നതോടെയാണ് ഇരട്ടമുഖം പുറത്തായത്.
കുട്ടനാട് എംഎല്എ റെജി ചെറിയാന് നിയമസഭയില് ഉന്നയിച്ച സബ്മിഷനിലാണ് ജൂണ് 29ന് നടക്കുന്ന മൂലം വള്ളംകളി ദിവസം കുട്ടനാട് താലൂക്കിന് പ്രാദേശിക അവധി അനുവദിക്കണമെന്ന ആവശ്യം മുന്നോട്ടുവെച്ചത്. ഇതിന് മറുപടിയായി സര്ക്കാര് വിഷയം പരിശോധിച്ച് തീരുമാനിക്കുമെന്ന് സതീശന് സഭയില് ഉറപ്പുനല്കി.
എന്നാല് സഭയില് സൗമ്യമായ മറുപടി നല്കിയ മുഖ്യമന്ത്രിയുടെ യഥാര്ത്ഥ മനോഭാവം തൊട്ടുപിന്നാലെ മൈക്കിലൂടെ പുറത്തായി. സ്വന്തം സീറ്റില് ഇരിക്കുമ്പോള് അടുത്തിരുന്ന മന്ത്രിയോട് ‘ഒരു കാരണവശാലും അവധി കൊടുക്കില്ല’ എന്ന് സതീശന് പറയുന്നതാണ് വീഡിയോയില് കേള്ക്കുന്നത്. ഈ വീഡിയോ പുറത്തുവിട്ടത് സിപിഎം എംഎല്എ കെ. യു. ജനീഷ് കുമാര് ആണ്. ‘ഇത്രേയുള്ളൂ വി. ഡി. സതീശന്റെ വിശ്വാസ്യത. അംഗത്തിന്റെ ചോദ്യത്തിന് എഴുതിത്തയ്യാറാക്കിയ മറുപടി സഭയില് വായിക്കും; പക്ഷേ യഥാര്ത്ഥ മനസിലിരിപ്പ് തൊട്ടുപിന്നാലെ പുറത്തുവരും’ എന്ന് അദ്ദേഹം ഫേസ്ബുക്കില് കുറിച്ചു.
സംഭവം സമൂഹമാധ്യമങ്ങളില് വൈറലായതോടെ മുഖ്യമന്ത്രിക്കെതിരെ രൂക്ഷ വിമര്ശനമാണ് ഉയരുന്നത്. ജനങ്ങളുടെ വികാരവുമായി ബന്ധപ്പെട്ട വിഷയത്തില്പോലും സഭയെ തെറ്റിദ്ധരിപ്പിക്കുകയാണോ മുഖ്യമന്ത്രിയെന്ന ചോദ്യവും ശക്തമാകുന്നു.
കേരളത്തിന്റെ പൈതൃക വള്ളംകളികളില് ഏറെ പ്രാധാന്യമുള്ള ചമ്പക്കുളം മൂലം വള്ളംകളി അമ്പലപ്പുഴ ശ്രീകൃഷ്ണ ക്ഷേത്രവുമായി ബന്ധപ്പെട്ടു നൂറ്റാണ്ടുകളായി നടത്തിവരുന്ന ആചാരമാണ്. വള്ളംകളി ദിവസം കുട്ടനാട് താലൂക്കിന് പ്രാദേശിക അവധി പ്രഖ്യാപിക്കണമെന്നത് നാട്ടുകാരുടെ ദീര്ഘകാല ആവശ്യമാണ്.
