പാലക്കാട്: അഗ്നിശമനസേനാ ജീവനക്കാര് ജോലി സമയത്ത് റീല്സ് ചിത്രീകരിച്ച് സോഷ്യല് മീഡിയയില് പ്രചരിപ്പിക്കുന്നത് വിലക്കി.
ജീവനക്കാര് യൂണിഫോം ധരിച്ച് അനുമതിയില്ലാതെ ഔദ്യോഗിക വാഹനങ്ങള്, ഉപകരണങ്ങള് എന്നിവ ദുരുപയോഗം ചെയ്ത് റീല്സ് ചിത്രീകരിച്ച് സോഷ്യല് മീഡിയയില് പ്രചരിപ്പിക്കുന്നതിനെതിരെ വ്യാപക പരാതി ഉയര്ന്നതിനാലാണ് റീല്സ് ചിത്രീകരണം വിലക്കി ഫയര് ആന്ഡ് റെസ്ക്യൂ സര്വീസ് ഡയറക്ടര് ജനറല് ഉത്തരവിറക്കിയത്.
വകുപ്പിന്റെ സേവനങ്ങള് ജനങ്ങളെ അറിയിക്കാനും അപകട സാധ്യതകള് ഒഴിവാക്കാനുതകുന്നതുമായ റീല്സ് ചിത്രീകരണത്തിന് വിലക്കില്ല. വകുപ്പിന്റെ വാഹനങ്ങളും ഉപകരണങ്ങളും മറ്റും ഉപയോഗിച്ച് അതിന്റെ സേവനങ്ങളുമായി ബന്ധമില്ലാത്തതോ, വകുപ്പിന്റെ പേരിന് കളങ്കം ചാര്ത്തുന്നതോ ആയ റീല്സ് ചിത്രീകരണം അനുവദിക്കില്ല. ഇങ്ങനെ ചെയ്യുന്ന ജീവനക്കാര്ക്കെതിരെ നടപടി സ്വീകരിക്കും.
മിക്ക ഫയര്സ്റ്റേഷനുകളിലും ഡ്യൂട്ടിക്കിടെ ജീവനക്കാര് ഔദ്യോഗിക വാഹനങ്ങള്, ഉപകരണങ്ങള് എന്നിവ ഉപയോഗിച്ച് റീല് ചിത്രീകരിച്ച് സോഷ്യല് മീഡിയയില് പങ്കുവയ്ക്കുന്നത് വ്യാപകമായിട്ടുണ്ട്. ഇക്കഴിഞ്ഞ മാര്ച്ചില് പാലക്കാട് കഞ്ചിക്കോട് അഗ്നിരക്ഷാനിലയത്തില് അഗ്നിശമന വാഹനവും, ഉപകരണവും ഉപയോഗിച്ച് റീല്സ് ചിത്രീകരിച്ച് സോഷ്യല് മീഡിയയില് പങ്കുവച്ച രണ്ട് ജീവനക്കാര്ക്കെതിരെ പരാതി ഉയര്ന്നിരുന്നു. പാലക്കാട് ജില്ലാ ഫയര് ഓഫീസര് അന്വേഷണം നടത്തി ജീവനക്കാര്ക്ക് ചാര്ജ് മെമ്മോ നല്കി. ഇവര്ക്കെതിരെ അച്ചടക്ക നടപടി സ്വീകരിച്ചുവരികയാണ്. പോലീസിലും റീല്സ് ചിത്രീകരണം വിലക്കിയിരുന്നു.
