വിഴിഞ്ഞം: കഞ്ചാവ് വില്ക്കുന്നതിനിടയില് നാട്ടുകാരുടെ പിടിയിലായ യുവാവിനെ രക്ഷിക്കാന് ദളിത് പീഡന പരാതിയുമായി സിപിഎം രംഗത്ത്. കോട്ടുകാല് പഞ്ചായത്ത് പരിധിയില് പെട്ട നെട്ടത്താന്നി സ്വദേശിയായ പ്രവീണ്ലാലിനെ വാദിയാക്കിയാണ് വിഴിഞ്ഞം പോലീസ് സ്റ്റേഷനില് പരാതി നല്കിയിരിക്കുന്നത്.
പുന്നക്കുളം ജംഗ്ഷന് സമീപം ബിവറേജ് ഔട്ട് ലെറ്റിന് പുറകില് ഹൈവെ നിര്മാണം നടക്കുന്ന ആളൊഴിഞ്ഞ പ്രദേശത്ത് കഞ്ചാവ് വില്ക്കുന്നതിനിടയില് പ്രവീണ് ലാല് ഉള്പ്പെടെയുള്ള സംഘത്തെ ബുധനാഴ്ച ഉച്ചയോടെ നാട്ടുകാര് പിടികൂടുകയായിരുന്നു. പ്രദേശവാസികളായ ചില യുവാക്കള് ഇയാളോടൊപ്പം ഉണ്ടായിരുന്നതിനാല് പോലീസില് ഏല്പ്പിക്കാതെ താക്കീതുനല്കി വിട്ടയയ്ക്കുകയായിരുന്നു. എന്നാല് രാത്രി ഏറെ വൈകി വിഴിഞ്ഞം ആശുപത്രിയില് ചികിത്സ തേടിയശേഷം ഈ സംഘത്തിലെ ഒരു യുവാവ് പരാതിയുമായി പോലീസിനെ സമീപിച്ചു. പരാതിയില് പ്രതി ചേര്ത്തിരിക്കുന്നതാകട്ടെ പ്രദേശത്തെ ബിജെപി പ്രവര്ത്തകരെയും. നാട്ടുകാര് ഇടപെട്ട വിഷയത്തെ രാഷ്ട്രീയവത്കരിക്കാനാണ് സിപിഎം ശ്രമം.പ്രദേശത്തെ ചില സിപിഎം നേതാക്കളുടെ പ്രേരണയാണ് പരാതിക്ക് പിന്നിലുള്ളത്.
കോട്ടുകാല് ഗവണ്മെന്റ് ഹൈസ്കൂള് കേന്ദ്രീകരിച്ച് കഞ്ചാവ് മാഫിയ സജീവമാണ്. വിവിധ സ്ഥലങ്ങളില് നിന്നെത്തുന്ന വിദ്യാര്ഥികള്, ബിവറേജ് ഔട്ട്ലറ്റില് മദ്യം വാങ്ങാനെത്തുന്നവര് ഉള്പ്പെടെയുളളവരാണ് പ്രധാന ഉപഭോക്താക്കള്. നേരത്തേ മറ്റ് സഥലങ്ങളില് നിന്നുള്ളവരാണ് കഞ്ചാവ് വിറ്റിരുന്നത്. എന്നാല് ഇപ്പോള് പ്രായപൂര്ത്തിയാകാത്തവര് ഉള്പ്പെടെയുള്ള പ്രദേശവാസികളാണ് പ്രധാന കച്ചവടക്കാര്. ഏജന്റുമാരും മൊബൈല് ഫോണ് മുഖാന്തിരവും ഇടപാടുകള് ഉറപ്പിച്ചശേഷം ആളൊഴിഞ്ഞ പ്രദേശത്തുവച്ചാണ് കഞ്ചാവ് കൈമാറുന്നത്. കുറച്ചുനാളുകള്ക്കിടയില് വിഴിഞ്ഞം സ്വദേശിയായ യുവാവിനെയും ചൊവ്വര സ്വദേശിയായ മറ്റൊരു യുവാവിനെയും കഞ്ചാവ്, നൈട്രാവിറ്റ പോലെയുള്ള വേദനസംഹാരി ഗുളികള് തുടങ്ങിയവയുമായി നാട്ടുകാര് പിടികൂടി പോലീസില് ഏല്പ്പിച്ചിരുന്നു. ഇത്തരം കഞ്ചാവ് കച്ചവടക്കാരെ കേസില് നിന്ന് ഊരി സ്റ്റേഷനുകളില് നിന്ന് ഇറക്കാനെത്തുന്നത് സിപിഎമ്മാണ്. പ്രതികളെ രക്ഷിക്കാന് എതിര് രാഷ്ട്രീയപ്പാര്ട്ടി പ്രവര്ത്തകരുടെ പേരില് ദളിത് പീഡനം ഉള്പ്പെടെയുള്ള പരാതികളാണ് നല്കുക. പരാതികള് കെട്ടിച്ചമച്ചവയാണെന്ന് പ്രഥമദൃഷ്ട്യാ ബോധ്യപ്പെടുമെങ്കിലും ഉന്നത രാഷ്ട്രീയ സമ്മര്ദ്ദത്തെത്തുടര്ന്ന് കേസെടുക്കാന് പോലീസ് നിര്ബന്ധിതരാകുകയാണ് പതിവ്.
രാഷ്ട്രീയ സംഘര്ഷങ്ങള് താരതമ്യേന കുറഞ്ഞ പുന്നക്കുളം പോലെയുള്ള പ്രദേശങ്ങളില് മനഃപൂര്വം പ്രശ്നങ്ങള് സൃഷ്ടിക്കുന്നതില് നിന്ന് സിപിഎം പിന്മാറണമെന്ന് ബിജെപി ആവശ്യപ്പെട്ടു. ഏതാനും ആഴ്ചകള്ക്ക് മുമ്പ് മദ്യപിച്ച് വാഹനമോടിച്ച് യുവാവിനെ ഇടിച്ചുവീഴ്ത്തിയ സംഭവം ഉണ്ടായി. എന്നാല് അപകടത്തില്പെട്ടവരെ മെഡിക്കല്കോളേജിലെത്തിച്ച ബിജെപി പ്രവര്ത്തകര്ക്കെതിരെ മോഷണം ഉള്പ്പെടെയുള്ള കുറ്റങ്ങള് ആരോപിച്ച് സിപിഎം കേസെടുപ്പിച്ചത് വിവാദമായിരുന്നു. ആര്എസ്എസ് ക്യാമ്പിന് നേരെയും ആക്രമണം നടന്നിരുന്നു. രാഷ്ട്രീയകലാപങ്ങള് ഉണ്ടാക്കി രക്തസാക്ഷികളെ സൃഷ്ടിക്കാനാണ് സിപിഎം ശ്രമമെന്ന് നേതാക്കള് പറഞ്ഞു. ഇത്തരം നാണംകെട്ട നടപടികളില് എന്ന് സിപിഎം നേതൃത്വം പിന്മാറണമെന്നും ബിജെപി ആവശ്യപ്പെട്ടു.
