അടൂര്: കാണികളുടെ നയനങ്ങളെ ഈറനണിയിച്ച് നാടോടി നൃത്തം യുപി വിഭാഗത്തില് ഐശ്വര്യ ഒന്നാമതെത്തി.
മകള് മരിച്ച അമ്മയുടെ നീറുന്ന മനസ്സിന്റെ നൊമ്പരങ്ങളാണ് നൃത്ത രൂപത്തില് അവതരിപ്പിച്ചത്. മകളുടെ കാതുകുത്തല് ചടങ്ങിനായി ഒരുക്കങ്ങള് പൂര്ത്തിയാക്കി കാത്തിരുന്ന അമ്മയ്ക്ക് കുട്ടി പുഴയില് വീണു മരിച്ചെന്ന വാര്ത്തയാണ് പിന്നീട് കേള്ക്കാനായത്. ഈ സന്ദര്ഭത്തെ തന്മയത്വമായി വേദിയില് അവതരിപ്പിച്ചാണ് ഇടപ്പരിയാരം എസ്എന്ഡിപി എച്ച്എസിലെ 6-ാം ക്ലാസ്സ് വിദ്യാര്ത്ഥിയായ ഐശ്വര്യ സാജന് ഒന്നാമതെത്തിയത്. കഴിഞ്ഞ ദിവസം നടന്ന ഭരതനാട്യ മത്സരത്തില് രണ്ടാം സ്ഥാനവും നേടിയിരുന്നു. ഇന്ന് നടക്കുന്ന കുച്ചിപ്പുടിയിലും മത്സരിക്കുന്നുണ്ട്. നൃത്ത അദ്ധ്യാപകനായ പിതാവ് സാജന് മണിമംഗലത്തിന്റെ കീഴില് 7 വര്ഷമായി നൃത്തം അഭ്യസിക്കുകയാണ്. സഹോദരന് അഭിഷേക് സാജന് വയലിന് മത്സരവുമായി രംഗത്തുണ്ട്. ലേഖയാണ് ഐശ്വര്യയുടെ മാതാവ്.
