കണ്ണൂര്: ജില്ലയില് കശുമാങ്ങ സംഭരിച്ച് ജാം, വിനാഗിരി, വൈന് എന്നിവ നിര്മിക്കുന്നതിനുള്ള പദ്ധതിക്ക് രൂപം നല്കിയതായി കശുവണ്ടി വികസനകോര്പ്പറേഷന്. തലശ്ശേരി പ്രവര്ത്തിക്കുന്ന കശുവണ്ടി ഫാക്ടറിയോടനുബന്ധിച്ചാണ് സംസ്ഥാനത്തെ തന്നെ ആദ്യ പദ്ധതിക്ക് തുടക്കമിടുക. കശുവണ്ടി മേഖലയില് തൊഴില് ചെയ്യാന് ആഗ്രഹിക്കുന്നവര്ക്ക് തലശ്ശേരി കേന്ദ്രത്തില് തൊഴില് നല്കും.
കശുവണ്ടി മേഖലയുടെ സമ്പൂര്ണ വികസനം ലക്ഷ്യമിട്ട് നടപ്പാക്കുന്ന ജനകീയ കശുമാവ് കൃഷി പദ്ധതിയുടെ സംസ്ഥാനതല ഉദ്ഘാടനം പരിസ്ഥിതി ദിനമായ ജൂണ് അഞ്ചിന് ജില്ലയില് സംഘടിപ്പിക്കും. പാതയോരങ്ങളില് കശുമാവ് പാര്ക്ക് എന്ന ആശയവുമായി തണല്മരമായും കശുമാവ് വച്ചു പിടിപ്പിക്കുമെന്ന് ജില്ലാപഞ്ചായത്ത് ഹാളില് നടന്ന കശുവണ്ടി കര്ഷകരുടെയും കര്ഷകസംഘടനാ പ്രതിനിധികളുടെയും യോഗത്തില് കശുവണ്ടി വികസന കോര്പ്പറേഷന് ചെയര്മാന് എസ്. ജയമോഹന് അറിയിച്ചു.
കണ്ണൂര് ജില്ലയിലെ കര്ഷകര്ക്കും കൊല്ലം ജില്ലയിലെ കശുവണ്ടി തൊഴിലാളികള്ക്കും ന്യായവില ലഭ്യമാക്കുന്ന തരത്തില് കര്ഷകക്ഷേമ പദ്ധതികള്ക്ക് ധാരണയായിട്ടുണ്ട്. കണ്ണൂര് കാസര്കോട് ജില്ലകളിലെ കശുവണ്ടി കര്ഷകര്ക്ക് ന്യായവില ലഭ്യമാക്കാതെ ഇടനിലക്കാര് ലാഭം കൊയ്യുകയാണെന്ന പരാതി വ്യാപകമാണ്. ഇത്തരം പ്രതിസന്ധികള്ക്ക് പരിഹാരം കാണാന് കര്ഷകര്, സംഘടനകള്, കുടുംബശ്രീ, സഹകരണബാങ്ക്, കശുവണ്ടി വികസന കോര്പ്പറേഷന്, ജില്ലാപഞ്ചായത്ത് പ്രതിനിധികള് ഉള്പ്പെട്ട ജില്ലാതല കമ്മറ്റി രൂപീകരിച്ചിട്ടുണ്ട്. കശുവണ്ടി സംഭരണം സംബന്ധിച്ച് ഒരാഴ്ചക്കുള്ളില് കമ്മറ്റി തീരുമാനം എടുക്കും. കശുവണ്ടി സംഭരണവില നിശ്ചയിക്കാനുള്ള അധികാരവും ഈ കമ്മറ്റിക്ക് നല്കിയിട്ടുണ്ട്.
ഉത്പാദനം വര്ദ്ധിപ്പിച്ച് പൊതുമേഖലാ സ്ഥാപനങ്ങള് വഴി സംഭരിച്ച് കര്ഷകര്ക്ക് മികച്ച വില നല്കാനാണ് ഉദ്ദേശിക്കുന്നത്. മുന് കാലങ്ങളില് നിന്ന് വ്യത്യസ്തമായി കര്ഷകര്ക്ക് അഡ്വാന്സായി പണം നല്കും. ആറളം ഫാമില് നിന്നുള്ള 4000 ഏക്കര് സ്ഥലത്ത് നിന്നുള്ള കശുവണ്ടി ന്യായവില ഉറപ്പാക്കി സംഭരിക്കാനും തീരുമാനമായി. കൂടാതെ 3 വര്ഷത്തിനകം ഫലം നല്കുന്ന അത്യുല്പ്പാദന ശേഷിയുള്ള കശുമാവിന് തൈകള് കര്ഷകര്ക്ക് വിതരണം ചെയ്യും. ആറളം ഫാമില് നിന്ന് ഉത്പാദിപ്പിക്കുന്ന ഗുണമേന്മയുള്ള കശുമാവിന് തൈകള്ക്ക് കൊല്ലത്ത് വില്പ്പന കേന്ദ്രം തുടങ്ങുന്ന കാര്യം കൊല്ലം ജില്ലാപഞ്ചായത്തുമായി ആലോചിച്ച് തീരുമാനമെടുത്തതായും യോഗം അറിയിച്ചു.
കശുവണ്ടി സംഭരണ സംവിധാനത്തിലെ ക്രമക്കേട് മാറണമെന്നും മാര്ക്കറ്റ് വിലയെ ആശ്രയിക്കാതെ തൊഴിലാളികള്ക്കും കര്ഷകര്ക്കും ന്യായമായ വില ലഭിക്കുന്ന തീരുമാനങ്ങള് സ്വാഗതം ചെയ്യുന്നതായും യോഗത്തില് പങ്കെടുത്ത കര്ഷകസംഘടനാ പ്രതിനിധികള് അറിയിച്ചു.
ജില്ലാ പഞ്ചായത്ത് പ്രസിഡന്റ് കെ.വി.സുമേഷ്, സ്റ്റാന്റിംഗ് കമ്മറ്റി ചെയര്മാന്മാരായ കെ.പി.ജയബാലന്. ടി.ടി.റംല, പ്ലാന് കോര്ഡിനേറ്റര് കെ.വി ഗോവിന്ദന്, കശുവണ്ടി വികസന കേര്പ്പറേഷന് ചെയര്മാന് എസ്. ജയമോഹന്, കാപ്പക്സ് ഡയറക്ടര് അഡ്വ സി.ജി.ഗോപുകൃഷ്ണന്, കശുവണ്ടി വികസന കോര്പ്പറേഷന് ഡയറക്ടര് അഡ്വ കാഞ്ഞിരവിള അജയകുമാര്, സജു ഡി ആനന്ദ്, പി.ആര്.വസന്തന്, കെ.സുഭഗന്, ഗോദേത്ത് ഭാസുരന്, ടി.സി വിജയന്, ആറളം ഫാം എം.ഡി ടി.കെ.വിശ്വനാഥന് നായര്, കശുവണ്ടി കര്ഷകര്, കര്ഷകസംഘടനാ പ്രതിനിധികള് തുടങ്ങിയവര് യോഗത്തില് പങ്കെടുത്തു.
