മുണ്ടക്കയം: ശബരിമല തീര്ത്ഥാടകര്ക്കായി സര്ക്കാര് ഫണ്ട് ഉപയോഗിച്ച് നിര്മ്മിച്ച വിശ്രമ കേന്ദ്രത്തിന്റെ ഉപയോഗം എത്രയും വേഗം തീര്ത്ഥാടകര്ക്ക് ലഭ്യമാക്കണമെന്ന് ബിജെപി ജില്ല ജനറല് സെക്രട്ടറി കെ. പി. സുരേഷ് ആവശ്യപ്പെട്ടു. ഇക്കാര്യത്തില് പഞ്ചായത്ത് ഭരണസമിതി പരാജയപ്പെട്ടാല് തീര്ത്ഥാടകര്ക്കായി വിരിവയ്ക്കാന് സൗകര്യങ്ങള് ബിജെ പി ഒരുക്കും. കോരുത്തോട് പഞ്ചായത്ത് ഭരണസമിതിയുടെ തീര്ത്ഥാടകരോടുള്ള അവഗണനയ്ക്കെതിരെ പഞ്ചായത്തോഫീസിലേക്ക് ബിജെപി നടത്തിയ പേട്ടതുള്ളല് പ്രതിഷേധ സമരം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
തീര്ത്ഥാടന കാലം തുടങ്ങി ഒന്നരമാസമായിട്ടും ലഭിച്ച ഫണ്ട് വിനിയോഗിക്കാത്ത പഞ്ചായത്ത് ഭരണസമിതി കുറ്റകരമായ അനാസ്ഥയാണ് കാട്ടുന്നത്. നിത്യേന ആയിരകണക്കിന് തീര്ത്ഥാടകര് സഞ്ചരിക്കുന്ന മുണ്ടക്കയം കോരുത്തോട് പാതയില് അവര്ക്കായി ഒന്നും ചെയ്യാന് സാധിക്കാത്ത ഭരണ സമിതിയാണ് ഉള്ളതെന്നും കെ.പി. സുരേഷ് കുറ്റപ്പെടുത്തി,
മന്നം പാലത്തിനു സമീപത്തു നിന്നും ആരംഭിച്ച പേട്ടതുള്ളി പ്രതിഷേധ സമരം കോരുത്തോട് ടൗണ് ചുറ്റി പഞ്ചായത്ത് ഓഫിസ് പടിക്കല് സമാപിച്ചു.
ബിജെപി പഞ്ചായത്ത് പ്രസിഡന്റ് എസ്. കെ. ഷാജിമോന് അദ്ധ്യക്ഷത വഹിച്ചു. നിയോജക മണ്ഡലം പ്രസിഡന്റ് വി. സി. അജികുമാര്, ജനറല് സെക്രട്ടറി കെ. ബി. മധു, സാബു രാജ് സ്വാമി, സന്തോഷ് കുമാര്, കെ. കെ. ശേഖരന്, പി. എസ്. മനോജ്, വേണു കോരുത്തോട്, എല്. വിജയന്, ബിനോയി തുടങ്ങിയവര് സംസാരിച്ചു,
