കോഴിക്കോട്: യേശുക്രിസ്തുവിന്റെ അന്ത്യ അത്താഴത്തെ വികലമായി ചിത്രീകരിച്ച് മലയാളമനോരമ പ്രസിദ്ധീകരണമായ ഭാഷാപോഷിണിക്കെതിരെ പ്രതിഷേധം ശക്തമാകുന്നു. ആവിഷ്‌കാര സ്വാതന്ത്ര്യത്തിന്റെ മറവില്‍ യേശുക്രിസ്തുവിന്റെ അന്ത്യ അത്താഴത്തെ വികലമായി ചിത്രീകരിച്ചതിനെതിരെ കോഴിക്കോട് രൂപതയും രംഗത്ത്. കോഴിക്കോട് രൂപതാ മെത്രാനും ഭാരത കത്തോലിക്കാ മെത്രാന്‍ സമിതിയുടെ സെക്രട്ടറി ജനറലുമായ ബിഷപ്പ് വര്‍ഗീസ് ചക്കാലക്കലിന്റെ നേതൃത്വത്തില്‍, രൂപതയില്‍ മൂന്ന് ജില്ലകളിലായി പ്രവര്‍ത്തിക്കുന്ന വൈദികര്‍ പ്രത്യേക യോഗം ചെര്‍ന്നാണ് പ്രതിഷേധം രേഖപ്പെടുത്തിയത്.
2016 ഡിസംബര്‍ എഡിഷനില്‍ 18,19 പേജുകളില്‍ ടോം വട്ടക്കുഴി ചിത്രീകരണം നടത്തി ‘മൃദ്വംഗിയുടെ ദുര്‍മൃത്യു’ എന്ന തലക്കെട്ടിലാണ് ഭാഷാപോഷിണിയില്‍ അന്ത്യ അത്താഴത്തെ വികലമായി ചിത്രീകരിച്ചത്.
ക്രൈസ്തവര്‍ അതിപാവനമായി സംരക്ഷിക്കുന്ന ഏഴ് കൂദാശകളില്‍ രണ്ടെണ്ണമാണ് കുര്‍ബാനയും, പൗരോഹിത്യവും. ഈ കൂദാശകള്‍ സ്ഥാപിതമായത് അന്ത്യ അത്താഴവേളയിലാണ്. ഈ കൂദാശകളെയും രണ്ടായിരം വര്‍ഷങ്ങളായി വിശ്വസിച്ചുപോരുന്ന വിശ്വാസ സത്യങ്ങളെയും, മത ചിഹ്നങ്ങളെയും ആവിഷ്‌കാര സ്വാതന്ത്ര്യത്തിന്റെ പേരില്‍ തമസ്‌കരിക്കുക വഴി വിശ്വാസികളെ ആഴത്തില്‍ വേദനിപ്പിക്കുകയും ക്രൈസ്തവ സഭയെ പരസ്യമായി അവഹേളിക്കുകയും ചെയ്തിരിക്കുകയാണ് ഈ മാധ്യമമെന്നും പ്രസ്താവനയില്‍ പറയുന്നു.
ജനാധിപത്യത്തിന്റെ മൂലക്കല്ലായ പത്രമാധ്യമങ്ങളുടെ ധര്‍മ്മം മൂല്യങ്ങള്‍ സംരക്ഷിക്കുകയും വിവിധ സംസ്‌കാരങ്ങളെ ഊട്ടിയുറപ്പിക്കുകയും അങ്ങനെ ഒരു സ്‌നേഹസംസ്‌കാരം പടുത്തുയര്‍ത്തുകയുമാണ്. മുഖ്യധാരയിലുള്ള ഒരു മാധ്യമം ഇതിനൊരപവാദം എന്ന നിലയില്‍ ഒരു മഞ്ഞപ്പത്രത്തിന്റെ തലത്തിലേക്ക് അധഃപതിച്ചതില്‍ ബിഷപ്പും വൈദികരും ദുഃഖവും നടുക്കവും അമര്‍ഷവും രേഖപ്പെടുത്തി. ക്രൈ സ്തവരെ അപമാനിക്കുന്ന തരത്തില്‍ എന്തും പറയാമെന്ന മാധ്യമങ്ങളുടെ ചിന്തകളെ ഒറ്റക്കെട്ടായി നേരിടണമെന്നും മേലില്‍ ഈ വിധത്തിലുള്ള പൈശാചിക വാര്‍ ത്തകര്‍ നല്‍ കി വിശ്വാസികളെ വേദനിപ്പിക്കരുതെന്നും യോഗം ആവശ്യപ്പെട്ടു. രൂപത വികാരി ജനറല്‍ മോണ്‍, ഡോ. തോമസ് പനക്കല്‍, വൈദിക സെനറ്റ് സെക്രട്ടറി ഫാ. വി. സി. ആ ല്‍ഫ്രെഡ്, പാസ്റ്ററല്‍ കൗണ്‍സില്‍ സെക്രട്ടറി ഫാ. ജിജു പള്ളിപ്പറമ്പില്‍, സെന്റ് സേവ്യേ ഴ്‌സ് കോളജ് മാനേജര്‍ മോണ്‍. വിന്‍സെന്റ് അറക്കല്‍, മാഹി പള്ളി വികാരി ഡോ. ജെറോം ചിങ്ങത്തറ എന്നിവര്‍ പ്രസംഗിച്ചു.
