കോഴിക്കോട്: നഗരസഭ ഓഫീസില്‍ സിസിടിവി ക്യാമറ സ്ഥാപിക്കാന്‍ 5ലക്ഷം രൂപ വകയിരുത്തി. ആദ്യപടിയായി ജനസേവനകേന്ദ്രം ടൗണ്‍പ്ലാനിംഗ് വിഭാഗം, റവന്യൂ വിഭാഗം, പടിഞ്ഞാറ്, കിഴക്ക് ഭാഗത്തുള്ള പ്രധാന പ്രവേശന കവാടങ്ങള്‍ എന്നിവിടങ്ങളില്‍ സിസിടിവി സ്ഥാപിക്കും. സമ്പൂര്‍ണ്ണ വെളിയിട വിസര്‍ജ്ജമുക്ത നഗരമായി പ്രഖ്യാപിച്ചിട്ടുണ്ടെങ്കിലും ഇപ്പോഴും കക്കൂസ് നിര്‍മ്മാണത്തിന് അപേക്ഷകള്‍ വന്നുകൊണ്ടിരിക്കുകയാണെന്ന് കൗണ്‍സില്‍ യോഗത്തില്‍ പരാമര്‍ശമുയര്‍ന്നു.സര്‍വ്വേ പ്രകാരം 1503 കക്കൂസുകളാണ് സ്ഥാപിക്കേണ്ടിയിരുന്നതെന്ന് അവ പൂര്‍ത്തിയായതായും മേയര്‍ പറഞ്ഞു.
പുതിയ അപേക്ഷകള്‍വരുന്നത്‌സ്വാഭാവികമാണ്.അദ്ദേ ഹം പറഞ്ഞു.
ഭോപ്പാലില്‍ സിപിഎം പരിപാടിയില്‍ പങ്കെടുക്കാന്‍ കഴിയാതെ മുഖ്യമന്ത്രി പിണറായി വിജയന്‍ മടങ്ങേണ്ടിവന്നതില്‍ പ്രതിഷേധിച്ച് കൗണ്‍സില്‍ യോഗത്തില്‍ അടിയന്തരപ്രമേയം. പി. അനിത അവതരിപ്പിച്ച അടിയന്ത പ്രമേയത്തില്‍ ഇടതുവലത് സഖ്യം. മുഖ്യമന്ത്രിയായിരിക്കെ ഉമ്മന്‍ചാണ്ടിയെ കല്ലെറിഞ്ഞവര്‍ക്ക് ഈ പ്രമേയം അവതരിപ്പിക്കാന്‍ അര്‍ഹതയില്ലെന്നും മുഖ്യമന്ത്രി പിണറായിയെ ഭോപ്പാലില്‍ തടഞ്ഞുവെച്ചു എന്ന വാര്‍ത്ത വസ്തുതാപരമല്ലെന്നും ഇ. പ്രശാന്ത്കുമാര്‍ പറഞ്ഞു. ബിജെപി അംഗങ്ങളുടെ എതിര്‍പ്പോടെ 5നെതിരെ 60 വോട്ടുകള്‍ക്ക് അടിയന്തരപ്രമേയം യോഗം അംഗീകരിച്ചു.
ബേപ്പൂര്‍ കമ്മ്യൂണിറ്റിഹാള്‍ നവീകരണം പൂര്‍ത്തിയാക്കണമെന്ന് കൗണ്‍സിലര്‍ ടി. അനില്‍കുമാര്‍ കൗണ്‍സില്‍ യോഗത്തില്‍ ആവശ്യപ്പെട്ടു. നവീകരണ പ്രവര്‍ത്തനം നടന്നെങ്കിലും വൈദ്യുതിയും വെള്ളവും ലഭിക്കുന്നില്ല.
പ്രദേശത്തെ സാംസ്‌കാരിക പരിപാടികളും മറ്റും നടത്താന്‍ പര്യാപ്തമായ രീതിയില്‍ കമ്മ്യൂണിറ്റിഹാള്‍ നവീകരണം പൂര്‍ത്തിയാക്കി തുറന്നുകൊടുക്കാന്‍ നടപടിയുണ്ടാകണമെന്ന് അദ്ദേഹം ആവശ്യപ്പെട്ടു. ഹാളിന്റെ നവീകരണം അടിയന്തിരമായി പൂര്‍ത്തിയാക്കി വൈദ്യുതി, വെള്ളം തുടങ്ങിയവ ലഭ്യമാക്കാന്‍ നടപടിയെടുക്കാന്‍ മേയര്‍ നിര്‍ദ്ദേശം നല്‍കി. മാങ്കുഴി തോട്ടിലെയും കല്ലായിപുഴയിലേയും സ്ഥലം കയ്യേറ്റം തടയണമെന്ന് കെ.എം. റഫീഖും ശ്രദ്ധക്ഷണിച്ചു.
സാമൂഹ്യപെന്‍ഷന് ഗുണഭോക്താക്കള്‍ക്ക് സത്യവാങ്മൂലം നല്‍കാനുള്ള തിയ്യതി നീട്ടിനില്‍കണമെന്ന് ടി.സി. ബിജുരാജും മെഡിക്കല്‍കോളേജ്-കാരന്തൂര്‍ റോഡിന്റെ ശോചനീയാവസ്ഥ പരിഹരിക്കണമെന്ന് പ്രദീപ്കുമാറും ഫുട്പാത്തുകള്‍ സ്വകാര്യ വ്യക്തികള്‍ കയ്യേറുകയാണെന്ന് കെ.കെ. റഫീഖും വിവാഹധനസഹായത്തിനുള്ള അപേക്ഷകള്‍ കെട്ടിക്കിടക്കുകയാണെന്നും പി.പി. ബീരാന്‍കോയയും ട്രാന്‍സ്‌ഫോര്‍മറുകള്‍ക്ക് സുരക്ഷാവേലി കെട്ടണമെന്ന് അഡ്വ. സി.കെ.സീനത്തും ശ്രദ്ധക്ഷണിക്കല്‍ പ്രമേയത്തിലൂടെ ആവശ്യപ്പെട്ടു.
