ആറ്റിങ്ങല്: കടയ്ക്കാവൂരില് കഞ്ചാവ് കച്ചവടം വ്യാപകമെന്ന് പരാതി. കടയ്ക്കാവൂര് പോലീസ് സ്റ്റേഷനു മുന്നിലുള്ള സ്കൂളിലെ വിദ്യാര്ത്ഥികള് പോലും കഞ്ചാവ് ഉപയോഗിക്കുന്നതായി നാട്ടുകാര്. തൊപ്പിചന്ത, പഴാഞ്ചിറ, കടയ്ക്കാവൂര് റെയില്വേ സ്റ്റേഷന്, വക്കം ഇറങ്ങുകടവ്, ചെട്ടിത്തൊടി, ഓവര്ബ്രിഡ്ജ് എന്നിവിടങ്ങളില് ചില്ലറ വില്പന കേന്ദ്രങ്ങളില് കച്ചവടം പൊടി പൊടിക്കുന്നു. ഒരു പൊതി കഞ്ചാവിന് ഇപ്പോള് 500 രൂപയാണ് വില. ഒരു പൊതിയില് 15 ബീഡിവരെ തീര്ക്കുവാന് കഴിയും. പെരുമാതുറയില് നിന്നുമാണ് കടയ്ക്കാവൂരില് കഞ്ചാവ് എത്തിച്ചിരുന്നത്. അടുത്തിടെ പോലീസും എക്സൈസും ആ ഭാഗത്ത് സംയുക്തമായി റെയ്ഡ് നടത്തി ചില്ലറ കച്ചവടക്കാരെ പിടികൂടിയിരുന്നു.
കടയ്ക്കാവൂരില് ഇപ്പോള് പ്രധാനമായും കഞ്ചാവ് ചില്ലറ വില്പനക്കാരില് എത്തിക്കുന്നത് തൊപ്പിച്ചന്ത സ്വദേശിയായ ക്രിമിനലാണ്. മുന്പും ഇയാള് ഇതേ കേസില് പിടിയിലായിട്ടുണ്ട്. സ്കൂള് കുട്ടികളെ ഉപയോഗിച്ചാണ് ഇപ്പോള് കച്ചവടം. ഇയാള് നാഗര്കോവിലില്നിന്ന് കിലോകണക്കിന് കഞ്ചാവ് ട്രെയിന് മാര്ഗമാണ് കൊണ്ടുവരുന്നത്. ആറ്റിങ്ങല് സബ് ജയിലിലെ പ്രതികള്ക്കുപോലും ഈ വിരുതന് കഞ്ചാവ് എത്തിക്കുന്നുണ്ട്. 20 വയസ്സിനു താഴെയുള്ള വിദ്യാര്ത്ഥികള്ക്ക് ബൈക്കും 500 രൂപയും ഒരു പൊതി കഞ്ചാവുമാണ് കൂലിയായി നല്കുന്നത്. വിദ്യാര്ത്ഥികള് വളരെ പെട്ടെന്ന് നിശ്ചിതസ്ഥലങ്ങളിലെ ചെറുകിടി കച്ചവടക്കാര്ക്ക് സാധനം കൈമാറുന്നു. സ്കൂളുകള് കേന്ദ്രീകരിച്ച് കച്ചവടത്തിനായി ഒരു പ്രതേ്യക ടീം തന്നെ പ്രവര്ത്തിക്കുന്നു. സ്കൂള് കുട്ടികള്ക്ക് ഒരു ബീഡി 100രൂപ നിരക്കിലാണ് വില്ക്കുന്നത്. ഒരു കൗതുകത്തിനായി ആരംഭിക്കുന്ന കുട്ടികള് പിന്നീട് സ്ഥിരം ഉപഭോക്താക്കളാക്കുകയും തുടര്ന്ന് കാരിയര്മാരായി തീരുകയോ ഗുണ്ടകളാകുകയോ ചെയ്യുന്നു.
കടയ്ക്കാവൂരില് നാടിനെ നടുക്കിയ വൃദ്ധയുടെ കൊലപാതകവും ആറ്റിങ്ങല് സ്വദേശി മനുവിന്റെ കൊലപാതകം, വക്കം ഷബീര് വധം എന്നിങ്ങനെയുള്ള കൊലക്കേസുകളിലെ പ്രതികള് കഞ്ചാവിനടിമകള് ആയിരുന്നു എന്നത് ഇതിന്റെ ഭീകരത വര്ദ്ധിപ്പിക്കുന്നു. കടയ്ക്കാവൂരില് നടക്കുന്ന പിടിച്ചുപറി അക്രമസംഭവങ്ങളിലെ പ്രതികളില് 80 ശതമാനം പേരും സ്ഥിരമായി കഞ്ചാവ് ഉപയോഗിക്കുന്നവരാണ്. വക്കം കണ്ണമംഗലം ക്ഷേത്രത്തിനുസമീപം ഇടിഞ്ഞുപൊളിഞ്ഞുകിടക്കുന്ന വീട് കഞ്ചാവ് വലിക്കുന്നവരുടെ ഇടത്താവളമാണ്. കഞ്ചാവ് വലിച്ച് തമ്മിലടി നടക്കുന്നതിനെക്കുറിച്ച് സമീപവാസികള് അധികൃതര്ക്ക് പരാതി നല്കിയിട്ടും ഇതുവരെ നടപടി സ്വീകരിച്ചിട്ടില്ല.
വിശദമായ പരിശോധന നടത്താതെ 100 രൂപ പിഴ വാങ്ങി വിടുകയാണ് പോലീസ് സാധാരണമായി ചെയ്യുന്നത്. നാടിന്റെ വാഗ്ദാനങ്ങളായ വിദ്യാര്ത്ഥികളെ ലക്ഷ്യംവച്ച് നടത്തുന്ന കഞ്ചാവ് മാഫിയയ്ക്കെതിരെ രാഷ്ട്രീയ സാമൂഹിക പ്രവര്ത്തനവും പോലീസ് എക്സൈസ് ഉദേ്യാഗസ്ഥരും ചേര്ന്നു പ്രവര്ത്തിച്ചാല് ഈ വിപത്തിനെ പൂര്ണമായും അമര്ച്ച ചെയ്യാന് കഴിയും.
