കണ്ണൂര്: മഞ്ഞ് പെയ്യുന്ന അതിര്ത്തിമേഖലകളില് പ്രതികൂലമായ കാലാവസ്ഥയ്ക്കും ശത്രുക്കളുടെ ആക്രമണങ്ങള്ക്കും മുമ്പില് ജീവന് ബലിയര്പ്പിച്ച് രാജ്യത്തിന്റെ അഖണ്ഡത കാക്കുന്ന സൈനികരുടെ ത്യാഗപൂര്ണമായ സേവനങ്ങളെ ആദരവോടെ മാത്രമേ അനുസ്മരിക്കാനാവൂ എന്ന് തുറമുഖ വകുപ്പ് മന്ത്രി രാമചന്ദ്രന് കടന്നപ്പള്ളി പറഞ്ഞു.
സായുധസേനാ പതാകദിനാചരണത്തിന്റെ ജില്ലാതല ഉദ്ഘാടനം കലക്ടറേറ്റ് കോണ്ഫറന്സ് ഹാളില് നിര്വഹിച്ച് സംസാരിക്കുകയായിരുന്നു അദ്ദേഹം. ഇളംതലമുറയിലുള്പ്പെടെ സൈനികരോടുള്ള ആദരവ് വളര്ത്തിയെടുക്കുന്നതിനുള്ള പ്രവര്ത്തനങ്ങള് വ്യാപിപ്പിക്കണം.
യുദ്ധവും ഭീകരതയും ആഗോളതലത്തില് വലിയ വെല്ലുവിളിയായി ഉയര്ന്നുവന്നുകൊണ്ടിരിക്കുകയാണ്. രാജ്യത്തിന്റെ അതിര്ത്തിയിലാവട്ടെ മുമ്പെങ്ങുമില്ലാത്ത വിധമുള്ള സംഘര്ഷാവസ്ഥയാണ് നിലനില്ക്കുന്നത്. ആഭ്യന്തര പ്രശ്നങ്ങളില് നട്ടംതിരിയുന്ന പാകിസ്താന് യുദ്ധം ആവശ്യമായിരിക്കാം. എന്നാല് സമാധാനമാഗ്രഹിക്കുന്ന ഇന്ത്യന് ജനതയുടെ മേല് അത് അടിച്ചേല്പ്പിക്കാനുള്ള ശ്രമം അന്താരാഷ്ട്രതലത്തിലുള്ള ഇടപെടലുകളിലൂടെ ഇല്ലാതാക്കാന് സാധിക്കണം. രാജ്യം സമാധാനത്തോടൊപ്പമാണെങ്കിലും പ്രകോപനങ്ങള്ക്കുനേരെ കണ്ണടക്കാനാവില്ലെന്നും അദ്ദേഹം പറഞ്ഞു. എന്.സി.സി കേഡറ്റുകളില് നിന്ന് സായുധസേനാ പതാക സ്വീകരിച്ച് ആദ്യവില്പ്പനയും മന്ത്രി നിര്വഹിച്ചു.
ചടങ്ങില് ജില്ലാ പഞ്ചായത്ത് പ്രസിഡന്റ് കെ.വി സുമേഷ് അധ്യക്ഷത വഹിച്ചു. കേരള സമൂഹത്തില് സൈനികര്ക്ക് അര്ഹിക്കുന്ന ആദരവ് ലഭിക്കുന്നുണ്ടോ എന്ന കാര്യം ആത്മപരിശോധനയ്ക്ക് വിധേയമാക്കണമെന്ന് അദ്ദേഹം അഭിപ്രായപ്പെട്ടു. സൈനിക സ്മരണിക എ.ഡി.എം ഇ മുഹമ്മദ് യൂസഫ് പ്രകാശനം ചെയ്തു. ക്യാപ്റ്റന് കെ ബാലകൃഷ്ണന് നായര് (റിട്ട) പതാകദിന സന്ദേശം നല്കി. കേണല് എന്.വി.ജി നമ്പ്യാര് (റിട്ട), ജില്ലാ ഇന്ഫര്മേഷന് ഓഫീസര് ഇ.കെ പത്മനാഭന്, ജില്ലാ സൈനികക്ഷേമ ഓഫീസര് ജോഷി ജോസഫ്, ലഫ്. കേണല് പി കണ്ണന് (റിട്ട), ഹോണററി ക്യാപ്റ്റന് എ.ബി.കെ നായര്, വിജയന് പാറാലി, എം..പി .സദാശിവന്, എം രവീന്ദ്രന് എന്നിവര് സംസാരിച്ചു.
