കണ്ണൂര്: ബസ്സിന്റെ മരണപ്പാച്ചില് മനുഷ്യ ജീവനുകള് അപഹരിക്കുന്നത് നിത്യസംഭവമായി മാറിയ സാഹചര്യത്തില് അതിന് തടയിടാനുള്ള ശ്രമത്തിന്റെ ഭാഗമായി പുതിയ മൊബൈല് ആപ്പുമായി ജില്ലാ ഭരണകൂടം. സ്പീഡ് സ്പോട്ട് എന്ന ആന്ഡ്രോയ്ഡ് ആപ്ലിക്കേഷന്റെ ഉദ്ഘാടനം മന്ത്രി രാമചന്ദ്രന് കടന്നപ്പള്ളി നിര്വഹിച്ചു. കണ്ണൂരില് നിന്ന് കൂത്തുപറമ്പിലേക്ക് പോവുകയായിരുന്ന സ്വകാര്യ ബസ്സിന്റെ വേഗത റിപ്പോര്ട്ട് ചെയ്തു കൊണ്ടായിരുന്നു ഉദ്ഘാടനം. ജില്ലാ പഞ്ചായത്ത് പ്രസിഡന്റ് കെ.വി.സുമേഷ്, ജില്ലാ കലക്ടര് മീര് മുഹമ്മദ് അലി എന്നിവരും മന്ത്രിക്കൊപ്പമുണ്ടായിരുന്നു. അമിത വേഗത്തിലോടുന്ന ബസ്സിനെക്കുറിച്ചുള്ള വിവരങ്ങള് യാത്രക്കാര്ക്ക് അപ്പപ്പോള് അധികൃതരെ അറിയിക്കാമെന്നതാണ് സ്പീഡ് സ്പോട്ട് എന്ന മൊബൈല് ആപ്ലിക്കേഷന്റെ സവിശേഷത. ഗൂഗ്ള് പ്ലേയില് നിന്ന് ഡൗണ്ലോഡ് ചെയ്യാവുന്ന ഈ ആപ്ലിക്കേഷന് വഴി വാഹനത്തിന്റെ വേഗത മനസ്സിലാക്കാനാവും. വേഗത അനുവദനീയമായതിനേക്കാള് കൂടുമ്പോള് അതിന്റെ സ്ക്രീന് ഷോട്ടെടുത്ത് ഷെയര് ബട്ടന് അമര്ത്തിയാല് ബസ്സിനെക്കുറിച്ചുള്ള വിവരങ്ങളടക്കം കലക്ടറുടെ ഓഫീസിലെത്തും. വാട്ട്സാപ്പ് വഴിയോ ഫെയ്സ് ബുക്ക് വഴിയോ ജില്ലാ ഭരണകൂടത്തെ അറിയിക്കാനും ഇതില് സംവിധാനമുണ്ട്. ഷെയര് ചെയ്യുന്നതിന് മുമ്പ് ബസ് ടിക്കറ്റിന്റെ ഫോട്ടോയും എടുക്കണം. ആവശ്യമെന്നു തോന്നുന്ന മറ്റ് വിവരങ്ങളും ഉള്പ്പെടുത്താന് സൗകര്യമുണ്ട്. ്
ബസ്സിന്റെ അമിതവേഗം കണ്ടെത്താന് സ്പീഡ് സ്പോട്ട് ആപ്പ
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.