കളിയാട്ട മഹോത്സവം 8 ന് തുടങ്ങും

നാറാത്ത്: നാറാത്ത് ചെറിയത്ത് കാവും നാഗസ്ഥാനത്ത് കളിയാട്ട മഹോത്സവം 8 മുതല്‍ 10 വരെ നടക്കും. ഉത്തരമലബാറിലെ നാല് പ്രമുഖ നാഗസ്ഥാനങ്ങളില്‍ പ്രധാനപ്പെട്ടതും വര്‍ഷങ്ങളോളം വിസ്മൃതിയിലാണ്ടതുമായ ഈ ക്ഷേത്രസന്നിധിയില്‍ നാല്‍പ്പതോളം ദേവീദേവന്‍മാര്‍ കുടികൊള്ളുന്നതായാണ് പറയപ്പെടുന്നത്. ക്ഷേത്ര പുനരുദ്ധാരണത്തിന്റെ ഭാഗമായി സ്വര്‍ണപ്രശ്‌ന ചിന്തയില്‍ പ്രായശ്ചിത കളിയാട്ടം എന്ന നിലയില്‍ 9 ദേവീദേവന്‍മാരുടെ തെയ്യക്കോലങ്ങളാണ് ഇപ്പോള്‍ ഇവിടെ കെട്ടിയാടുന്നത്. 8 ന് രാവിലെ ഗണപതിഹോമം, ആജ്ഞേയ കലശാഭിഷേകം, ഗുരുസി എന്നീ ചടങ്ങുകളോടെ കളിയാട്ടം ആരംഭിക്കും. വൈകുന്നേരം 5 മണിക്ക് കലവറ നിറക്കല്‍ ഘോഷയാത്ര, 6 ന് കേളികൊട്ട്, തുടര്‍ന്ന് ഊര്‍പ്പഴശ്ശി, വേട്ടക്കൊരുമകന്‍, ഗുളികന്‍ തെയ്യങ്ങളുടെ വെള്ളാട്ടവും ശേഷം പുറപ്പാടും നടക്കും. 9 ന് വൈകുന്നേരം 6 മണി മുതല്‍ രക്തേശ്വരി, വിഷ്ണുമൂര്‍ത്തി, തായ്‌പ്പരദേവത, നാഗരാജാവ്, നാഗക്കന്നി തെയ്യങ്ങളുടെ തോറ്റങ്ങള്‍ അരങ്ങേറും. 10 ന് പുലര്‍ച്ചെ 1 മണിക്ക് തെയ്യങ്ങളുടെ പുറപ്പാട് നടക്കും. ഉച്ചക്ക് പ്രസാദ ഊട്ടും ഉണ്ടായിരിക്കും.