വര്ക്കല: കേന്ദ്രാവിഷ്കൃത വികസന-ക്ഷേമ പദ്ധതികളെ കുറിച്ചുള്ള പ്രദര്ശനവും ബോധവത്കരണ പരിപാടികളും വര്ക്കലയില് ആരംഭിച്ചു. മുനിസിപ്പല് ടൗണ് ഹാളില് നടന്ന ചടങ്ങില് വര്ക്കല നഗരസഭ ചെയര്പേഴ്സണ് ബിന്ദു ഹരിദാസ് ഉദ്ഘാടനം ചെയ്തു. കേന്ദ്ര ഫീല്ഡ് പബ്ലിസിറ്റി കേരള-ലക്ഷദീപ് റീജ്യണല് ഡയറക്ടര് എസ്. സുബ്രഹ്മണ്യന്, വര്ക്കല അഡീഷണല് സിഡിപിഒ ഇ. ബ്രിജറ്റ്, ഡിഎവിപി ഫീല്ഡ് എക്സിബിഷന് ഓഫീസര് എല്.സി. പൊന്നുമോന്, ഉദയകുമാര് തുടങ്ങിയവര് സംബന്ധിച്ചു. തുടര്ന്ന് സാമൂഹ്യ സുരക്ഷാപദ്ധതിയെക്കുറിച്ച് പെരുംകടവിള ബ്ലോക്ക് സാമ്പത്തികസാക്ഷരത കേന്ദ്രത്തിലെ കൗണ്സിലര് കുമാരദാസും മുദ്രാ ബാങ്കിനെകുറിച്ച് സീനിയര് കൗണ്സിലര് ശശിധരനും ക്ലാസുകള് എടുത്തു. ഇന്ന് ജീവിത ശൈലീ രോഗങ്ങളെ കുറിച്ചും ആരോഗ്യ പാലനത്തെ കുറിച്ചും സി. ഉദയകുമാര് ക്ലാസ് നയിക്കും. തുടര്ന്ന് ആകാശവാണി തീരുവനന്തപുരം നിലയത്തിന് വേണ്ടി എസ്. പരിമളവും സംഘവും അവതരിപ്പിക്കുന്ന നാടന് പാട്ടുകളും നടക്കും. കേന്ദ്ര പരസ്യ ദൃശ്യ പ്രചാരണ വിഭാഗം, കേന്ദ്ര ഫീല്ഡ് പബ്ലിസിറ്റി വിഭാഗം എന്നിവ വര്ക്കല മുന്സിപ്പാലിറ്റിയുമായി സഹകരിച്ചാണ് പ്രദര്ശനം ഒരുക്കിയിരിക്കുന്നത്. കേന്ദ്ര സര്ക്കാരിന്റെ കര്ഷകക്ഷേമ പ്രവര്ത്തനങ്ങള്, യുവാക്കള്ക്കുള്ള വിവിധപദ്ധതികള്, സ്ത്രീസുരക്ഷ പദ്ധതികള്, ദരിദ്രര്ക്കായുള്ള വിവിധ ക്ഷേമപദ്ധതികള്, സാമൂഹ്യ സുരക്ഷാപദ്ധതികള് തുടങ്ങിയവയെ കുറിച്ച് ജനങ്ങളില് അവബോധം വളര്ത്തുകയാണ് ഫോട്ടോ പ്രദര്ശനത്തിന്റെ പ്രധാനലക്ഷ്യം. സ്ത്രീകളും യുവാക്കളും ഉള്പ്പെടെ വന് ജനാവലിയാണ് പ്രദര്ശനം കാണുന്നതിനും കേന്ദ്ര സര്ക്കാരിന്റെ വിവിധ ക്ഷേമപദ്ധതികളെ കുറിച്ച് അറിയുന്നതിനുമായി മുനിസിപ്പല് ടൗണ് ഹാളില് നടക്കുന്ന പ്രദര്ശന നഗരിയില് എത്തുന്നത്. പ്രദര്ശനം ഇന്ന് സമാപിക്കും.
കേന്ദ്രാവിഷ്കൃത പദ്ധതികളുടെ പ്രദര്ശനം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.