പഴയ അഞ്ഞൂറിന്റെയും ആയിരത്തിന്റെയും നോട്ടുകള് കൈവശമുള്ളവര്ക്ക് അവ നവംബര് 10 മുതല് ഡിസംബര് 30 ബാങ്കിന്റെ പ്രവൃത്തി സമയം കഴിയുന്നതുവരെ തങ്ങളുടെ ബാങ്കിലോ പോസ്റ്റോഫീസ് അക്കൗണ്ടിലോ യാതൊരു പരിധിയുമില്ലാതെ നിക്ഷേപിക്കാം.
ഇതുപ്രകാരം നിങ്ങള്ക്ക് നിങ്ങളുടെ നോട്ടുകള് നിക്ഷേപിക്കാന് 50 ദിവസങ്ങള് വരെ കിട്ടും; പരിഭ്രാന്തിയുടെ യാതൊരു ആവശ്യവുമില്ല.
നിങ്ങളുടെ പണം നിങ്ങളുടേതായിത്തന്നെ തുടരും. അക്കാര്യത്തില് നിങ്ങള്ക്ക് വേവലാതി വേണ്ട.
നിങ്ങളുടെ പണം നിങ്ങളുടെ അക്കൗണ്ടില് നിക്ഷേപിച്ചുകഴിഞ്ഞാല് നിങ്ങള്ക്ക് ആവശ്യമുള്ളപ്പോള് പിന്വലിക്കാം.
പുതിയ നോട്ടുകള് വിതരണം ചെയ്യേണ്ടതിനാല് ആദ്യത്തെ കുറച്ചുദിവസങ്ങളില് പ്രതിദിനം പതിനായിരം രൂപ വരെയും ആഴ്ചയില് ഇരുപതിനായിരം രൂപ വരെയും പരിധിവച്ച് മാത്രമേ പണം പിന്വലിക്കാനാകൂ. വരുംദിവസങ്ങളില് ഈ പരിധി വര്ധിപ്പിക്കും.
നിങ്ങളുടെ നോട്ടുകള് ബാങ്ക് അക്കൗണ്ടില് നിക്ഷേപിക്കുന്നതിനുപുറമേ മറ്റൊരു സൗകര്യം കൂടി ഉണ്ടാകും.
നിങ്ങളുടെ അടിയന്തര ആവശ്യങ്ങള്ക്ക് ഏതെങ്കിലും ബാങ്കിലോ ഹെഡ് പോസ്റ്റോഫീസിലോ സബ് പോസ്റ്റോഫീസിലോ പോയി ആധാര് കാര്ഡ്, വോട്ടര് കാര്ഡ്, റേഷന് കാര്ഡ്, പാസ്പോര്ട്ട്, പാന് കാര്ഡ് എന്നിവയില് ഏതെങ്കിലുമോ മറ്റ് അംഗീകൃത തിരിച്ചറിയല് രേഖയോ കാണിച്ച് പഴയ അഞ്ഞൂറിന്റെയോ ആയിരത്തിന്റെയോ നോട്ടുകള് മാറ്റി പുതിയ നോട്ടുകള് വാങ്ങാവുന്നതാണ്.
നവംബര് 10 മുതല് 24 വരെ അത്തരം കൈമാറ്റം നാലായിരം രൂപ വരെയായിരിക്കും. നവംബര് 25 മുതല് ഡിസംബര് 30 വരെ പരിധി വര്ധിപ്പിക്കും.
ചിലര്ക്ക് എന്തെങ്കിലും കാരണങ്ങളാല് 2016 ഡിസംബര് 30നുള്ളില് അവരുടെ പഴയ അഞ്ഞൂറിന്റെയും ആയിരത്തിന്റെയും നോട്ടുകള് നിക്ഷേപിക്കാന് സാധിച്ചില്ലെന്നു വരാം.
അവര്ക്ക് റിസര്വ് ബാങ്ക് ഓഫ് ഇന്ത്യയുടെ നിര്ദ്ദിഷ്ട ഓഫീസുകളില് പോയി ഒരു സത്യവാങ്മൂലം സമര്പ്പിച്ച് 2017 മാര്ച്ച് 31 വരെ നോട്ടുകള് നിക്ഷേപിക്കാം.
നവംബര് 9 നും, ചിലയിടങ്ങളില് നവംബര് 10 നും എടിഎമ്മുകള് പ്രവര്ത്തിക്കില്ല. ആദ്യത്തെ കുറച്ചുദിവസത്തേക്ക് കാര്ഡൊന്നിന് പ്രതിദിനം രണ്ടായിരം രൂപവരെ മാത്രമേ പിന്വലിക്കാന് സാധിക്കൂ എന്ന പരിധിയുണ്ടായിരിക്കും.
ഇത് പിന്നീട് നാലായിരം രൂപയായി ഉയര്ത്തും.
സര്ക്കാര് ആശുപത്രികളിലെ ഫാര്മസികളില് ഡോക്ടറുടെ കുറിപ്പടിയോട് കൂടി മരുന്നുവാങ്ങുന്നതിനും ഈ നോട്ടുകള് സ്വീകരിക്കും.
