ന്യൂയോര്ക്ക്: ഒരു ആറ്റത്തിലെ ഇലക്ട്രോണ്, മറ്റൊരാറ്റത്തെത്തന്നെ ആകര്ഷിക്കുന്ന പുതിയ ആറ്റോമിക ബന്ധം ശാസ്ത്രജ്ഞര് കണ്ടെത്തി. ഒരാറ്റം, മറ്റൊരാറ്റത്തെ ആകര്ഷിക്കുന്നതു ലോകത്തിനറിയാം. ആറ്റത്തിന് ഇലക്ട്രോണ്, പ്രോട്ടോണ്, ന്യൂട്രോണ് എന്നീ ഘടകങ്ങളുള്ളതില്, ഒരു ഘടകം മാത്രമായി മറ്റൊരാറ്റത്തെ വിഴുങ്ങാനിടയുണ്ട് എന്ന് 14 വര്ഷം മുന്പ് മുന്നോട്ടുവച്ച സിദ്ധാന്തമാണ് ഇപ്പോള് യാഥാര്ത്ഥ്യമായിരിക്കുന്നത്. ഇതൊരു ലോല ബന്ധമാണ്.
യുഎസിലെ പര്ദ്യൂ സര്വകലാശാലയിലെ ഭൗതിക, ജ്യോതിശാസ്ത്ര അധ്യാപകന് ക്രിസ് ഗ്രീനിന്റെ നേതൃത്വത്തിലുള്ള സംഘമാണ് ബന്ധം കണ്ടെത്തിയത്.
ചിത്രശലഭത്തിന്റെ രൂപസാദൃശ്യമുള്ള റിഡ്ബെര്ഗ് തന്മാത്രയെ നിരീക്ഷിച്ചതില് നിന്നാണ് ഇതിന്റെ പിറവി. ആറ്റത്തിന്റെ തന്മാത്രയിലേക്ക് ഇലക്ട്രോണുകള് ആകര്ഷിക്കപ്പെടുമ്പോള് ഉണ്ടാകുന്നതാണ് റിഡ്ബെര്ഗ് തന്മാത്രകള്. സാധാരണ ആറ്റത്തില് ഇലക്ട്രോണുകള് നൂറു കോടിയില് ഒരു സെന്റിമീറ്റര് അകലെ മാത്രം കാണുമ്പോള്, റിഡ്ബെര്ഗില് ഇതിന്റെ 100 മുതല് 1000 മടങ്ങ് വരെ അകലെയാകും, ക്രിസ് ഗ്രീന് പറഞ്ഞു.
ആട്ടിന്കൂട്ടത്തിന് കാവല് നില്ക്കുന്ന നായയെപ്പോലെയാണ് ഇലക്ട്രോണ്. ഒരു ആറ്റത്തെ മറികടക്കുമ്പോള് അത് സീല്ക്കാരമുണ്ടാകും. റിഡ്ബെര്ഗ് തന്മാത്രയ്ക്ക് ചെറിയ ആകര്ഷണമുണ്ട്. ഒന്നിനെ തള്ളിമാറ്റി മുന്നേറി അവ കൂടിച്ചേരും. ഇലക്ട്രോണുകള് ആറ്റത്തെ ആകര്ഷിക്കുന്നത് രസതന്ത്രത്തില് ആദ്യം, അദ്ദേഹം പറഞ്ഞു.
ക്രിസ് ഗ്രീന്
തണുത്ത റിബിഡിയം വാതകത്തെ 100 നാനോ കെല്വിനില് ചൂടാക്കി തണുപ്പിച്ചാണ് ഗവേഷണം നടത്തിയത്. ലേസര് ഉപയോഗിച്ച് തന്മാത്രയില് നിന്ന് ഇലക്ട്രോണിനെ വേര്പെടുത്തി റിഡ്ബെര്ഗ് ആറ്റം സൃഷ്ടിച്ച് നിരീക്ഷിച്ചു. രണ്ട് ആറ്റങ്ങള് കൂട്ടിച്ചേര്ക്കുമ്പോള് ഉണ്ടാകുന്ന ഊര്ജപ്രവാഹം വ്യക്തമായതോടൊപ്പം റിഡ്ബെര്ഗ് തന്മാത്ര സ്വീകരിക്കുന്ന പ്രകാശ ആവൃത്തിയും വ്യക്തമായെന്നും ഗ്രീന് പറഞ്ഞു.
1980 മുതല് ഇതേക്കുറിച്ചുള്ള ഗവേഷണം തുടങ്ങി. 2002ലാണ് ഇതിനൊരു സിദ്ധാന്തം രൂപീകരിച്ചത്. ജീസസ് പെരസ് റിയോസും കണ്ടെത്തലിന് ഗ്രീനിനെ സഹായിച്ചു. ഗവേഷണഫലം നേച്വര് കമ്യൂണിക്കേഷന് ജേണലില് പ്രസിദ്ധീകരിച്ചു.
