വാഷിങ്ടണ്: യുഎസ് വോട്ടര്മാരെ വോട്ടെടുപ്പ് ദിനത്തില് കൂട്ടകശാപ്പു ചെയ്യാന് ഐഎസ് ആഹ്വാനമുള്ളതായി യുഎസ് ഭീകരവാദ നിരീക്ഷണ സംഘം മുന്നറിയിപ്പ്. യുഎസിലെ മുസ്ലിങ്ങള് വോട്ടെടുപ്പില് നിന്ന് വിട്ടുനില്ക്കണമെന്നും ഐഎസ് ആവശ്യപ്പെട്ടിട്ടുണ്ടെന്നാണ് വെളിപ്പെടുത്തല്.
യുഎസിലെ ഭീകരവാദ നിരീക്ഷണ സംഘമായ എസ്ഐടിഇ ഇന്റലിജന്സ് ഗ്രൂപ്പ് ഡയറക്ടര് റിറ്റ്സ് കാട്സാണ് വിവരം പുറത്തുവിട്ടത്. ഐഎസ് നിയന്ത്രണത്തിലുള്ള അല് ഹയാത്ത് മീഡിയ സെന്റര് പുറത്തുവിട്ട ലേഖനത്തിലാണ് ആഹ്വാനമെന്ന് റിറ്റ്സ് ട്വിറ്ററില് വ്യക്തമാക്കി.
നിങ്ങളെ കശാപ്പു ചെയ്യാനും നിങ്ങളുടെ ബാലറ്റ് പെട്ടികള് ദൂരെയെറിയുവാനുമാണ് ഭീകരര് വന്നിരിക്കുന്നതെന്ന് ലേഖനത്തില് വിശദീകരിക്കുന്നുണ്ടത്രെ. ‘മനസ്സാക്ഷി വോട്ട്’ എന്ന പേരില് ഏഴു പേജോളം വരുന്ന മാനിഫെസ്റ്റോയിലാണ് ഈ ഭീഷണിയെന്ന് യുഎസ് ടുഡേ റിപ്പോര്ട്ട് ചെയ്തു. ഇസ്ലാമിനും മുസ്ലിംകള്ക്കുമെതിരായ നയത്തില് റിപ്പബ്ലിക്കന്, ഡെമോക്രാറ്റിക്ക് പാര്ട്ടികള്ക്ക് വ്യത്യാസമില്ലെന്ന് ലേഖനം ചൂണ്ടിക്കാട്ടുന്നു.
ചില യുഎസ് നഗരങ്ങളില് വോട്ടെടുപ്പിന് തലേന്ന് ആക്രമണത്തിന് അല് ഖായ്ദയും പദ്ധതിയിടുന്നതായി നേരത്തെ റിപ്പോര്ട്ടുണ്ടായിരുന്നു.
ഈ ലേഖനത്തില്നിന്നുള്ള പ്രസക്ത ഭാഗങ്ങള് ഉദ്ധരിച്ചുകൊണ്ടാണ് ആക്രമണ സാധ്യതയേക്കുറിച്ച് കാട്സ് ട്വിറ്ററില് വിശദീകരിക്കുന്നത്. തിരഞ്ഞെടുപ്പ് പ്രവര്ത്തനങ്ങള് തടസപ്പെടുത്തുന്നതിനും മാധ്യമ ശ്രദ്ധ നേടുന്നതിനുമാണ് ഐഎസിന്റെ ശ്രമമെന്നും അദ്ദേഹം വ്യക്തമാക്കി. പ്രസിഡന്റ് തിരഞ്ഞെടുപ്പില് മല്സരിക്കുന്ന റിപ്പബ്ലിക്കന് സ്ഥാനാര്ഥി ഡോണാള്ഡ് ട്രംപ്, ഡെമോക്രാറ്റിക്ക് പാര്ട്ടിയുടെ വൈസ് പ്രസിഡന്റ് സ്ഥാനാര്ഥി ടിം കെയ്ന്, ആക്രമണത്തിനിടെ കൊല്ലപ്പെട്ട മുസ്ലിം യുഎസ് സൈനികന്റെ അച്ഛന് കിസര് ഖാന് എന്നിവരുടെ ചിത്രങ്ങള് ലേഖനത്തോടൊപ്പം പ്രസിദ്ധീകരിച്ചിട്ടുണ്ട്.
ന്യൂയോര്ക്ക്, വിര്ജീനിയ, ടെക്സാസ് നഗരങ്ങളെ ലക്ഷ്യമിട്ടുള്ള ഈ ഭീഷണിയുടെ ആധികാരികത ഇനിയും സ്ഥിരീകരിച്ചിട്ടില്ല. അതിനിടെയാണ് കൂടുതല് ഭീകരസംഘടനകള് ഭീഷണികളുമായി രംഗത്തെത്തുന്നുവെന്ന റിപ്പോര്ട്ട്.
