ചൊവ്വയില് പതിച്ച ഉല്ക്ക നാസ കണ്ടെത്തി. മുട്ടപ്പാറ( എഗ് റോക്ക്)എന്ന് പേരിട്ടു. ചൊവ്വയുടെ പ്രതലത്തില് ഓടി നടന്ന് വിവരങ്ങള് ശേഖരിക്കുകയും ചിത്രങ്ങള് അയക്കുകയും ചെയ്യുന്ന ക്യൂരിയോസിറ്റി എന്ന ചെറുവാഹനം( റോവര്) ആണ് ഇതിന്റെ ചിത്രം അയച്ചത്.
നരച്ച നിറവും ചെറുപന്തിന്റെവലിപ്പവുമുള്ള വസ്തുവാണ് ചിത്രത്തില്.
ക്യൂരിയോസിറ്റിയില് പിടിപ്പിച്ച, ലേസര് രശ്മികളുടെ സഹായത്തോടെ പാറയുടെ ഘടന പരിശോധിച്ചു.അപ്പോഴാണ് ഇരുമ്പും നിക്കലും അടങ്ങിയ ഉല്ക്കയാണെന്ന് കണ്ടെത്തിയത്. ചൊവ്വയുടെ ആകാശത്തു നിന്ന് പതിച്ചതാണിത്. ഇത്തരം വസ്തുക്കള് മുന്പും ഭൂമിയില് നിന്നും ചൊവ്വയില് നിന്നും കണ്ടെടുത്തിട്ടുണ്ട്. ആദ്യമായാണ് പുറപ്പെടുവിക്കുന്ന സ്പെക്ട്രോമീറ്റര് (കെം കാം) ഉപയോഗിച്ച് പാറയെ പഠിക്കുന്നത്. ഒക്ടോബര് 30നാണ് മുട്ടപ്പാറയുടെ ചിത്രം എടുത്തത്.
കെം കാം
ഇതില് നിന്ന് പുറപ്പെടുന്ന ലേസര് രശ്മികള് ഏതെങ്കിലും വസ്തുവില് പതിക്കുമ്പോള് അതിന്റെ പരമാണു( ആറ്റം)വിന് ചുറ്റുമുള്ള ഇലക്ട്രോണുകള് ഉത്തേജിതരായി പല തരംഗ ദൈര്ഘ്യത്തിലും നിറത്തിലുമുള്ള പ്രകാശ രശ്മികള് പ്രസരിപ്പിക്കും. ആ വസ്തുവിലുള്ള ഘടകങ്ങള് അനുസരിച്ചിരിക്കും പ്രകാശരശ്മിയുടെ നിറവും തരംഗദൈര്ഘ്യവും. ഉദാഹരണത്തിന് വസ്തുവില് ഇരുമ്പിന്റെ അംശമാണെങ്കില് പുറത്തുവരുന്ന പ്രകാശ രശ്മിയുടെ നിറവും തരംഗ ദൈര്ഘ്യവും ആയിരിക്കില്ല ചെമ്പാണെങ്കില്. ഈ രശ്മികള് വിശകലനം ചെയ്ത് വസ്തുവിന്റെ ഘടന കണ്ടെത്തും. ചൊവ്വയില് കണ്ടെത്തിയ പാറയില് ഇരുമ്പ്, നിക്കല്, ഫോസ്ഫറസ് എന്നിവയാണ് ഉള്ളത്. അങ്ങനെയാണ് ഇത് ഉല്ക്കയാണെന്നും ഇത് ചൊവ്വയിലുള്ളതല്ലെന്നും ക്ഷുദ്രഗ്രഹങ്ങളുടെ ഉരുകിയ ഉള്ഭാഗത്തുനിന്നുള്ള ഭാഗങ്ങളാണെന്നും കണ്ടെത്തിയത്. ചൊവ്വയിലും സൂര്യാസ്തമയമുണ്ട്; അത് നീലയാണ്.
