ചാവക്കാട്: പഞ്ചവടി ശങ്കരനാരായണ ക്ഷേത്രത്തിലെ അമാവാസി ഉത്സവത്തിന് ആയിരങ്ങളെത്തി.
പഞ്ചവടി സെന്ററില് നന്ന് പുറപ്പെട്ട് ക്ഷേത്രഭരണ സംഘത്തിന്റെ എഴുന്നെള്ളിപ്പിന് വേണ്ടി ഗജരത്നം ചെര്പ്പുളശ്ശേരി ശ്രീ അനന്തപത്മനാഭന് ഭഗവാന്റെ തിടമ്പേറ്റി.
പഞ്ചവടി സെന്ററില് നിന്നും ആരംഭിച്ച തെക്ക്,വടക്ക് വിഭാഗം ഉത്സവാഘോഷ കമ്മറ്റികളുടെ എഴുന്നള്ളിപ്പ് വൈകീട്ടോടെ ക്ഷേത്രാങ്കണത്തിലെത്തി കൂട്ടിയെഴുന്നള്ളിപ്പ് നടത്തി.11 ആനകള് അണിനിരന്നു. തെക്കുഭാഗം ഉത്സവാഘോഷ കമ്മറ്റിയുടെ എഴുന്നള്ളിപ്പിന് ഗജവീരന് ഭാരത് വിനോദും വടക്കുഭാഗം ഉത്സവാഘോഷ കമ്മറ്റിയുടെ ഏഴുന്നള്ളിപ്പിന് ഗജവീരന് പാറമേക്കാവ് ശ്രീ പത്മനാഭനുമാണ് തിടമ്പുകളേറ്റിയത്.
ഗജവീരന്മാരും വര്ണക്കാവടികളും വാദ്യമേളങ്ങളും പ്രാചീനകലാരൂപങ്ങളും ഉത്സവത്തിന് മിഴിവേകി.വടക്കുഭാഗം കമ്മറ്റിയുടെ നേതൃത്വത്തില് പഞ്ചവടി സെന്ററില് പ്രത്യേകം തയ്യാറാക്കിയ വേദിയില് കോട്ടപ്പുറം സുരേന്ദ്രനും സംഘവും അവതരിപ്പിച്ച നാഗസര സിംഫണി ഉത്സവത്തിന് ശോഭയേറ്റി.വാവുബലിയോടനുബന്ധിച്ചുള്ള പിതൃതര്പ്പണ ചടങ്ങുകള് ഇന്ന് പുലര്ച്ചെ മൂന്ന് മുതല് പഞ്ചവടി വാ കടപ്പുറത്ത് പ്രത്യേകം തയ്യാറാക്കിയ ബലിപ്പുരയില് ആരംഭിച്ചു.
ശനിയാഴ്ച രാത്രി തന്നെ ബലിതര്പ്പണത്തിനായി നിരവധി പേര് ക്ഷേത്രത്തിലെത്തി. പിതൃതര്പ്പണ ചടങ്ങുകള്ക്കായി വിപുലമായ സൗകര്യങ്ങളാണ് ഒരുക്കിയിട്ടുള്ളത്. ക്ഷേത്രകമ്മറ്റി പ്രസിഡണ്ട് പാലപ്പെട്ടി ദിലീപ്കുമാര്, സെക്രട്ടറി കെ.കെ രവീന്ദ്രന്, ട്രഷറര് വി.എം സദാനന്ദന്,തെക്കുഭാഗം ഉത്സവകമ്മറ്റി ്പ്രസിഡണ്ട് ഓവാട്ട് ബാബു,സെക്രട്ടറി രാജേഷ് കളത്തിപറമ്പില്,വടക്കുഭാഗം കമ്മറ്റി പ്രസിഡണ്ട് തയ്യില് വാസുദേവന്,സെക്രട്ടറി വാക്കയില് മുരളീധരന് തുടങ്ങിയവര് ഉത്സവത്തിന് നേതൃത്വം നല്കി.
