കണ്ണൂര്: അധര്മ്മത്തിന് മുകളില് ധര്മ്മം വിജയം വരിച്ച വിജയദശമി നാളായ ഇന്നലെ ജില്ലയില് ആയിരക്കണക്കിന് കുരുന്നുകള് അറിവിന്റെ ആദ്യാക്ഷരം കുറിച്ചു. ക്ഷേത്രങ്ങളിലും കോവിലുകളിലും പ്രത്യോകം തയ്യാറാക്കിയ മണ്ഡപങ്ങളിലും നടന്ന വിദ്യാരംഭ ചടങ്ങുകളില് ആയിരക്കണക്കിന് കുരുന്നുകളാണ് ആദ്യാക്ഷരം കുറിച്ചത്. ഗുരുവര്യന്മാരും ആചാര്യരും ക്ഷേത്രം തന്ത്രിമാരും പൂജാരികളും വിദ്യാരംഭത്തിന് നേതൃത്വം നല്കി. പളളിക്കുന്ന് മൂകാംബിക ക്ഷേത്രം, ഇരിക്കൂര് മാമാനിക്കുന്ന് മഹാദേവീക്ഷേത്രം, മുഴക്കുന്ന് മൃദംഗശൈലേശ്വരി ക്ഷേത്രം, തളിപ്പറമ്പ് തൃച്ഛംബരം ക്ഷേത്രം, പയ്യാവൂര് ശിവക്ഷേത്രം, ഇരിട്ടി കൈരാതി കിരാത ക്ഷേത്രം തുടങ്ങി വിവിധ ക്ഷേത്രങ്ങളില് വിജയദശമി ദിനമായ ഇന്നലെ വിദ്യാരംഭത്തിനുള്പ്പെടെ വന്ജനാവലി സാക്ഷ്യം വഹിച്ചു. മാമാനിക്കുന്ന് ക്ഷേത്രത്തില് നടന്ന എഴുത്തിനിരുത്തല് ചടങ്ങിന് ക്ഷേത്രം മേല്ശാന്തി ചന്ദ്രന്മൂസത്ത്, കൃഷ്ണന് മൂസത്ത്, ഉണ്ണികൃഷ്ണന് മൂസത്ത് തുടങ്ങിയവര് നേതൃത്വം നല്കി.
പള്ളിക്കുന്ന് കുന്നാവ് ദുര്ഗാ ക്ഷേത്രം, പുഴാതി സോമേശ്വരി ക്ഷേത്രം, ചാല ഭഗവതി ക്ഷേത്രം, മുഴപ്പാല മാമ്പ വിളയാറോട്ട് മഹാവിഷ്ണു ക്ഷേത്രം, തോട്ടട ഉമാ മഹേശ്വരി ക്ഷേത്രം, കണ്ണൂര് തെക്കിബസാര് കാഞ്ചി കാമാക്ഷി അമ്മന് ക്ഷേത്രം, മുണ്ടേരിക്കാവ് മഹാലക്ഷ്മി ക്ഷേത്രം, പൂവത്തൂര് മഹാവിഷ്ണുക്ഷേത്രം, അഴീക്കോട് പണ്ടാരത്തുംകണ്ടി പുതിയഭഗവതി ക്ഷേത്രം, നാറാത്ത് ദുര്ഗാംഭിക ക്ഷേത്രം, കണ്ണൂര് മുനീശ്വരന് കോവില്, താളിക്കാവ് മുത്തുമാരിയമ്മന് കോവില്, അഴീക്കോട് പരയങ്ങാട്ട് ക്ഷേത്രം, കണ്ണൂര് സുന്ദരേശ്വര ക്ഷേത്രം, മാണിയൂര് കിഴക്കന്കാവ് ഭഗവതി ക്ഷേത്രം, തെക്കുമ്പാട് കൂലോം തായക്കാവ് ഭഗവതി ക്ഷേത്രം, ചൊവ്വ യാദവത്തെരു കാഞ്ചി കാമാക്ഷി അമ്മന് കോവില്, തലശ്ശേരി ജഗന്നാഥ ക്ഷേത്രം, പന്ന്യന്നൂര് പനക്കാട് കൂറുമ്പ ഭഗവതി ക്ഷേത്രം, ശ്രീകണ്ഠപുരം അമ്മക്കോട്ടം മഹാദേവി ക്ഷേത്രം, തളിപ്പറമ്പ് ഭഗവതി ക്ഷേത്രം, പൂമംഗലം സോമേശ്വരി ക്ഷേത്രം, പയ്യന്നൂര് സുബ്രഹ്മണ്യസ്വാമി ക്ഷേത്രം, മാതമംഗലം വയത്തൂര് കാലിയാര് ശിവക്ഷേത്രം, നായിക്കാലി ദുര്ഗ ഭവതി ക്ഷേത്രം, ഊരത്തൂര് ഇളംകരുമകന് ക്ഷേത്രം എന്നിവിടങ്ങളിലെല്ലാം വിദ്യാരംഭം സംഘടിപ്പിച്ചു.
പള്ളിക്കുന്ന് ദുര്ഗ ക്ഷേത്രത്തില് 1500 കുരുന്നുകളാണ് ആദ്യാക്ഷരം കുറിച്ചത്. ഇവിടെ കോറോം അരങ്ങാട്ട് ശങ്കരനാരായണ പ്രസാദ്, പുളിക്കീല് നാരായണന് നമ്പൂതിരി, ചെറുവള്ളി കേശവന് നമ്പൂതിരി, മംഗലം പരമേശ്വരന് നമ്പൂതിരി, പി.പി.ഗോവിന്ദന് നമ്പൂതിരി, ചാലക്കുന്ന് പരമേശ്വരന് നമ്പൂതിരി, മംഗലത്ത് ഇല്ലത്ത് കൃഷ്ണന് നമ്പൂതിരി എന്നിവര് കുരുന്നുകളെ എഴുത്തിനിരുത്തി. ഭക്തജനങ്ങള്ക്ക് പ്രസാദ സദ്യയും ഏര്പ്പെടുത്തിയിരുന്നു.
