മലയിന്കീഴ്: നെയ്യാറിനെ മലിനമാക്കി നെട്ടുകാല്തേരിയില് അനധികൃതമായി പ്രവര്ത്തിക്കുന്ന പത്തോളം പന്നിഫാമുകള്ക്കെതിരെ നാട്ടുകാര് നടത്തുന്ന സമരത്തിന് പിന്തുണയുമായി മാറനല്ലൂര് പഞ്ചായത്തും. മാറനല്ലൂര് ഗ്രാമ പഞ്ചായത്ത് പ്രസിഡന്റ് കുമാരിമായ, വൈസ് പ്രസിഡന്റ് തൂങ്ങാംപാറ ബാലകൃഷ്ണന് എന്നിവരാണ് ഇന്നലെ സമരപ്പന്തലിലെത്തി നാട്ടുകാര്ക്ക് പഞ്ചായത്തിന്റെ പിന്തുണ അറിയിച്ചത്.
മാറനല്ലൂര് പഞ്ചായത്തിന്റെ കുടിവെള്ള പദ്ധതി നെയ്യാറിനെ ആശ്രയിച്ചാണ്. നെയ്യാറിലേക്ക് മലിന്യം ഒഴുക്കിവിടുന്ന പന്നിഫാം അടച്ചുപൂട്ടേണ്ടത് സമീപ പഞ്ചായത്തായ മാറനല്ലൂരിന്റേയും ആവശ്യമാണെന്ന് സ്ഥലം സന്ദര്ശിച്ച പ്രസിഡന്റ് കുമാരിമായ പറഞ്ഞു.
കള്ളിക്കാട് പഞ്ചായത്തിന്റെ ഒത്താശയോടെ പ്രവര്ത്തിക്കുന്ന ഈ ഫാമുകളില് നഗരപ്രദേശത്തുനിന്ന് ഹോട്ടല് മാലിന്യങ്ങളും കോഴി വേസ്റ്റും പന്നികള്ക്ക് ആഹാരമായി എത്തിക്കുന്നു. ഇതില് നിന്ന് വേര്തിരിക്കുന്ന പ്ലാസ്റ്റിക്കും മറ്റ് അവശിഷ്ടങ്ങളും നെയ്യാറിലും പൊതുനിരത്തുകളിലുമാണ് നിക്ഷേപിക്കുന്നത്. ഇത് വ്യാപക ആരോഗ്യപ്രശ്നങ്ങളാണ് ജനങ്ങള്ക്ക് ഉണ്ടാക്കുന്നതെന്നും മായ പറഞ്ഞു. കള്ളിക്കാട് ഗ്രാമ പഞ്ചായത്ത് സസെക്രട്ടറിയെ ഫോണില് വിളിച്ച് വിഷയം അവതരിപ്പിച്ചിട്ടുണ്ട്. ഉടന് നടപടിയുണ്ടായില്ലെങ്കില് പ്രതിഷേധം കൂടുതല് ശക്തമാക്കുമെന്നും അവര് അറിയിച്ചു.
