ന്യൂദല്ഹി: ഫിന്ലന്ഡില് നിന്ന് ഉടന് തിരിച്ചെത്തണമെന്ന് ഉപമുഖ്യമന്ത്രി മനീഷ് സിസോദിയയോട് ആവശ്യപ്പെട്ട ദല്ഹി ലഫ്റ്റനന്റ് ഗവര്ണര്ക്കെതിരെ വിലകുറഞ്ഞ രാഷ്ട്രീയ നാടകവുമായി ആംആദ്മി പാര്ട്ടി.
ദല്ഹിയില് ഡങ്കിപ്പനിയും ചിക്കുന്ഗുനിയയും പടരുന്ന സാഹചര്യത്തിലാണ് വിദേശത്തെ ഉല്ലാസയാത്ര മതിയാക്കി മടങ്ങാന് ഉപമുഖ്യമന്ത്രിയോട് ലഫ്. ഗവര്ണര് നിര്ദ്ദേശിച്ചത്. നാവിന് ശസ്ത്രക്രിയയെ തുടര്ന്ന് മുഖ്യമന്ത്രിയും ദല്ഹിയിലില്ലാത്ത സാഹചര്യത്തിലാണിത്.
സ്ഥലത്തില്ലാത്ത സമയം നോക്കി ലഫ്. ഗവര്ണര് നജീബ് ജങ്ങിനെ കാണാന് എഎപി മന്ത്രിമാരായ സത്യേന്ദര് ജെയിനും കപില് മിശ്രയും ഇന്നലെ ഓഫീസിലെത്തി. ഇത് ചൂണ്ടിക്കാട്ടിയാണ് എഎപി പുതിയ പോരിന് തുടക്കമിട്ടത്.
എല്ലാ ദിവസവും ജോലി ചെയ്യാന് ലഫ്റ്റനന്റ് ഗവര്ണര്ക്ക് താത്പര്യമില്ലെന്നായിരുന്നു മന്ത്രിമാരുടെ വിമര്ശനം. കൂടിക്കാഴ്ച മന്ത്രിമാര് നേരത്തെ അറിയിച്ചില്ലെന്നും വിഷയം രാഷ്ട്രീയവത്കരിക്കുകയാണെന്നും ലഫ്റ്റനന്റ് ഗവര്ണറുടെ ഓഫീസ് വ്യക്തമാക്കി. സ്റ്റഡി ടൂറിന്റെ ഭാഗമായാണ് സിസോദിയ ഫിന്ലന്ഡിലുള്ളത്. പകര്ച്ചവ്യാധി പടരുന്നതിനിടെ സിസോദിയയും മുഖ്യമന്ത്രി കേജ്രിവാളും ഉള്പ്പെടെയുള്ള മന്ത്രിമാര് ദല്ഹിയിലില്ലാത്തത് വലിയ വിമര്ശനത്തിനിടയാക്കിയിരുന്നു. വിവാദമുണ്ടാക്കി ഇതില് നിന്ന് ശ്രദ്ധ തിരിക്കാനാണ് എഎപിയുടെ ശ്രമം.
കൂടിക്കാഴ്ച്ച നേരത്തെ അറിയിച്ചിരുന്നില്ലെന്ന് മന്ത്രിമാര് പറഞ്ഞു. അവധി ദിവസം പ്രവര്ത്തിക്കാന് ലഫ്റ്റനന്റ് ഗവര്ണര്ക്ക് താത്പര്യമില്ലെന്നാണ് മനസിലാക്കുന്നത്- മന്ത്രിമാര് പറഞ്ഞു. മന്ത്രിമാര് വന്നതായി മാധ്യമങ്ങളിലൂടെയാണ് ലഫ്റ്റനന്റ് ഗവര്ണര് അറിഞ്ഞതെന്ന് അദ്ദേഹത്തിന്റെ ഓഫീസ് പ്രതികരിച്ചു. സെക്രട്ടറിയുമായി മന്ത്രിമാര് കൂടിക്കാഴ്ച നടത്തി. പകര്ച്ചവ്യാധി പരിഹരിക്കുന്നതിന് പകരം വിഷയത്തെ രാഷ്ട്രീയവത്കരിക്കുന്നതില് വിഷമമുണ്ടെന്നും ഓഫീസ് പ്രതികരിച്ചു.
ദല്ഹിയില് ഡങ്കിപ്പനി, ചിക്കുന്ഗുനിയ ബാധിച്ച് 27 പേരാണ് ഇതുവരെ മരിച്ചത്. മൂവായിരത്തിലേറെ കൊതുകുജന്യ രോഗങ്ങള് റിപ്പോര്ട്ട് ചെയ്തു.
