കാഞ്ഞിരപ്പള്ളി: ക്ഷേമ പെന്ഷനുകളുടെ വിതരണം കാഞ്ഞിരപ്പള്ളി പഞ്ചായത്തില് അവതാളത്തില്. സഹകരണ ബാങ്കുകള് വഴി ഗുണഭോക്താക്കളുടെ വീടുകളിലെത്തിച്ചുള്ള വിതരണമാണ് അവതാളത്തിലായതായി പരാതി ഉയര്ന്നത്. വാര്ദ്ധ്യകാല, വിധവ, വികലാംഗ, കര്ഷക, അഗതി പെന്ഷനുകളാണ് സഹകരണ ബാങ്കുകള് വഴി വിതരണം ചെയ്യുന്നത്.
പെന്ഷന് തുക ബാങ്കിലെത്തിയാല് മൂന്നു ദിവസത്തിനുള്ളില് വിതരണം ചെയ്യണമെന്നാണ് നിര്ദ്ദേശമെങ്കിലും അഞ്ചു ദിവസം കഴിഞ്ഞിട്ടും ഒരു വാര്ഡിലേയും ഒന്നാം ഘട്ട വിതരണം പൂര്ത്തിയായിട്ടില്ല. ബാങ്കുകളിലെ ഒരു ജീവനക്കാരനും കളക്ഷന് ഏജന്റും കൂടി പെന്ഷന് വീടുകളില് എത്തിക്കണമെന്നാണ് നിര്ദ്ദേശം. ബാങ്കുകള് ഇവ വീട്ടിലെത്തിക്കാതെ പകരം ഗുണഭോക്താക്കളെ ബാങ്കില് വിളിച്ചു വരുത്തിയും, വാര്ഡുകളില് ചില സ്ഥലങ്ങള് കേന്ദ്രീകരിച്ചും ക്യാമ്പ് നടത്തി ഗുണഭോക്താക്കളെ അവിടേക്ക് വിളിച്ചു വരുത്തിയുമാണ് വിതരണം ചെയ്യുന്നതെന്ന് പരാതി.
എന്നാല് സര്ക്കാര് നിര്ദ്ദേശ പ്രകാരമുള്ള മൂന്നു ദിവസത്തിനുള്ളില് പെന്ഷന് തുക ഗുണഭോക്താളുടെ വീടുകളിലെത്തിക്കുക എന്നത് അപ്രായോഗികമാണെന്നാണ് ബാങ്ക് അധികൃതര് പറയുന്നത്. സര്ക്കാരില് നിന്നും വിവിധ ഘട്ടങ്ങളായാണ് ബാങ്കില് പണമെത്തുന്നത്. കുടിശിഖ തീര്ത്ത് മുഴുവന് തുകയും നല്കുമെന്നാണ് സര്ക്കാരിന്റെ പ്രഖ്യാപനവും.
പോസ്റ്റോഫീസ് വഴിയും ഐഎഫ്എസ് ഇ കോഡുള്ള ബാങ്കുകള് വഴിയുമായാണ് നേരത്തെ പെന്ഷന് വിതരണം നടത്തി വന്നിരുന്നത്. പുതിയ പദ്ധതി പ്രകാരം ഇവ മൂന്നു ദിവസത്തിനകം ഗുണഭോക്താക്കളുടെ വീടുകളിലെത്തിക്കണമെന്നാണ് നിര്ദ്ദേശം. ഇതിനായി ബാങ്കിന് സര്ക്കാര് ചെറിയ കമ്മീഷനും നല്കുന്നുണ്ട് . എന്നാല് ആദ്യ ഘട്ടത്തില് തന്നെ നടപ്പാക്കിയപ്പോള് ഇത് പ്രായോഗികമല്ലെന്നാണ് ബാങ്ക് അധികൃതര് പറയുന്നത്. കൂടാതെ ബാങ്കുകള്ക്ക് ലഭിച്ചിരിക്കുന്ന ഗുണഭോക്താക്കളുടെ ലിസ്റ്റിലും അപാകതകളുണ്ടത്രേ. പല ഗുണഭോക്താക്കളും താമസിക്കുന്ന വാര്ഡുകളുടെ ലിസ്റ്റിലല്ല ഉള്പ്പെട്ടിരിക്കുന്നത് എന്നതും, പേരിലെ ചെറിയ പിശകുകള് ഉള്പ്പടെ തിരിച്ചറിയല് രേഖകളിലെ പിഴവും ഗുണഭോക്താക്കളെ വലയ്ക്കുന്നുണ്ട്.
