കോട്ടയം: ഓണത്തിന് മുമ്പ് വിവിധ ക്ഷേമ പെന്ഷനുകള് കുടിശിഖ തീര്ത്ത് നല്കാനുള്ള പദ്ധതി ചര്ച്ചചെയ്യാന് ചേര്ന്ന കോട്ടയം നഗരസഭാ യോഗത്തില് സംഘര്ഷം. ചെയര്പേഴ്സണ് കൗണ്സില് യോഗം പിരിച്ചുവിട്ടു. പെന്ഷന് വിതരണത്തിലെ അപാകതകള് ചൂണ്ടിക്കാട്ടി ബിജെപി അംഗം കെ. ശങ്കരന് ഉന്നയിച്ച ചോദ്യത്തിന് ചെയര്പേഴ്സണ് മറുപടി പറയാന് തുടങ്ങിയതോടെയാണ് പ്രശ്നങ്ങള്ക്ക് തുടക്കമായത്. സര്ക്കാര് ഭാഗത്തുനിന്നും ഉണ്ടായ വീഴ്ചയാണ് കാരണമെന്ന് ചെയര്പേഴ്സണ് പി.ആര്. സോന പറഞ്ഞതോടെ പ്രതിപക്ഷം ബഹളം ആരംഭിച്ചു. പെന്ഷന് വിതരണം അട്ടിമറിക്കാന് ഭരണപക്ഷം ശ്രമിക്കുന്നു എന്നാരോപിച്ചായിരുന്നു പ്രതിപക്ഷ ബഹളം. തുടര്ന്ന് അംഗങ്ങള് തമ്മിലുണ്ടായ വാക്ക് പോര് ഉന്തും തള്ളുവരെ എത്തി. നഗരസഭ അറിയാതെ കുടുംബശ്രീ ജില്ലാ മിഷനില്നിന്നും ഗുണഭോക്താക്കളുടെ പട്ടിക തയ്യാറാക്കി സഹകരണ ബാങ്കുകള് വഴിയുള്ള പെന്ഷന് സര്ക്കാര് വിതരണം ആരംഭിച്ചിരുന്നു. പെന്ഷന് വിതരണം സംബന്ധിച്ചുള്ള സര്വ്വേ നടത്താനുള്ള നിര്ദ്ദേശം ലഭിച്ചത് വൈകിയാണെന്ന് ചെയര്പേഴ്സണ് യോഗത്തെ അറിയിച്ചെങ്കിലും പ്രതിപക്ഷം തട്ടിക്കയറി. അര്ഹതയുള്ളവരുടെ പട്ടിക തയ്യാറാക്കല് അടക്കം പെന്ഷന് വിതരണത്തിനുള്ള നടപടികള് നഗരസഭ സ്വീകരിച്ചിരുന്നില്ല. ഇവ കുടുംബശ്രീയെ ഏല്പ്പിച്ചത് തങ്ങളെ അറിയിച്ചല്ലെന്നും ലിസ്റ്റ് തയ്യാറാക്കാന് ഇനിയും സമയം വേണമെന്നും ചെയര്പേഴ്സണ് അറിയിച്ചു.
പെന്ഷന് വിതരണം ചര്ച്ചചെയ്യാന് ചേര്ന്ന: കോട്ടയം നഗരസഭാ യോഗത്തില് സംഘര്ഷം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.