തളിപ്പറമ്പ്: വരും നാളുകളില് ഹൈന്ദവ വിശ്വാസങ്ങള്ക്കെതിരെ ഒരൊറ്റ കമ്മ്യൂണിസ്റ്റുകാരന്റെയും കൈപൊങ്ങില്ലെന്ന് ഉറപ്പു വരുത്തണമെന്ന് ആര്എസ്എസ് പ്രാന്ത കാര്യവാഹ് ഗോപാലന്കുട്ടി മാസ്റ്റര് പറഞ്ഞു.
അനുഷ്ഠാന കലകളെയും ഹിന്ദു മാനബിന്ദുക്കളെയും തെരുവില് അപഹാസ്യമായ രീതിയില് അവതരിപ്പിച്ച സിപിഎം നടപടിക്കെതിരെ വിവിധ ഹൈന്ദവ സംഘടനകള് ചേര്ന്ന് രൂപീകരിച്ച ഹൈന്ദവാചാര സംരക്ഷണ സമിതി സംഘടിപ്പിച്ച പൊതു സമ്മേളനത്തില് സംസാരിക്കുകയായിരുന്നു അദ്ദേഹം. വിശ്വാസി സമൂഹം ഇന്നും അവഹേളനങ്ങളെ സഹിക്കേണ്ടി വരുന്നത് അവഹേളനങ്ങളെ മാറിനിന്ന് മാത്രം കാണുന്നതുകൊണ്ടാണ്. ഇത് ആസുരശക്തികള്ക്ക് വളമാവുകയാണ്. വോട്ടുബാങ്ക് രാഷ്ട്രീയത്തിന്റെ ഭാഗമാണ് ഇത്തരം ഹിന്ദുവിരുദ്ധ സമീപനം.
എക്കാലവും പ്രലോഭനങ്ങള് നല്കി സ്വന്തം കാല്ക്കീഴില് നിര്ത്തിയ കീഴാളവര്ഗ്ഗം യാഥാര്ത്ഥ്യം തിരിച്ചറിഞ്ഞ് പാര്ട്ടിയെ ഉപേക്ഷിച്ചുകൊണ്ടിരിക്കുകയാണ്. ഇത്തരത്തില് ഹൈന്ദവ സമൂഹം ഒന്നാകെ പാര്ട്ടിയെ കൈവിടുമ്പോള് സമൂഹത്തിനകത്ത് ഭിന്നതയുണ്ടാക്കാനുള്ള ശ്രമമാണ് സിപിഎം നടത്തിക്കൊണ്ടിരിക്കുന്നത്. ഇതിനെതിരെ ഹൈന്ദവ സമൂഹം ഉണര്ന്നിരിക്കണമെന്നും പ്രതികരിക്കണമെന്നും അദ്ദേഹം പറഞ്ഞു. ടൗണ് സ്ക്വയറില് നടന്ന ചടങ്ങില് എം.ശ്രീധരന് നമ്പൂതിരി അദ്ധ്യക്ഷത വഹിച്ചു.സ്വാമി ചിദാനന്ദപുരി ,അമൃതകൃപാനന്ദപുരി, വിശ്വഹിന്ദു പരിഷത്ത്
സംസ്ഥാന പ്രസിഡണ്ട് എസ്.ജെ.ആര്.കുമാര്, പ്രാന്തകാര്യവാഹ് പി. ഗോപാലന്കുട്ടി മാസ്റ്റര്, അഡ്വ. കെ.കെ. ബലറാം, വല്സന് തില്ലങ്കേരി, പയ്യാവൂര് രാഘവന് മാസ്റ്റര്, വിവിധ സംഘടന നേതാക്കള് എന്നിവര് സംസാരിച്ചു. ഹരികൃഷ്ണന് ആലച്ചേരി സ്വാഗതവും അഡ്വ. എം. വിനോദ് കുമാര് നന്ദിയും പറഞ്ഞു.
