തിരുവല്ല: പാത ഇരട്ടിപ്പിക്കലിന്റെ ഭാഗമായി ചെങ്ങന്നൂര് തിരുവല്ല ഭാഗത്തെ നിര്മ്മാണ ജോലികള് വിലയിരുത്താന് റെയില്വേ സുരക്ഷാ കമ്മീഷണര് സന്ദര്ശനം നടത്തി. ബാംഗ്ലൂര് ദക്ഷിണമേഖലാ റെയില്വേ സുരക്ഷാ കമ്മീഷണര് സുദര്ശന് നായികിന്റെ നേതൃത്വത്തിലുള്ള സംഘമാണ് പരിശോധന നടത്തിയത്. ഇന്നലെ ഉച്ചയ്ക്ക് രണ്ടിനാണ് തിരുവല്ലയില് എത്തിയ സംഘം അഞ്ചു ബോഗികള് അടങ്ങുന്ന പ്രത്യേക ട്രെയിനില് ചെങ്ങന്നൂരിലേക്ക് പോയി. ചെങ്ങന്നൂരില് നിന്നുമാണ് സുരക്ഷാ പരിശോധന തുടങ്ങിയത്. ആറു മോട്ടോര് ട്രോളികളിലാണ് ഉദ്യോഗസ്ഥ സംഘത്തിന്റെ പരിശോധന. പാത ഇരട്ടിപ്പിക്കല് പൂര്ത്തിയായ ചെങ്ങന്നൂര്-തിരുവല്ല റെയിവേപാതയില് 20 ദിവസത്തിനകം തീവണ്ടികള് ഓടിത്തുടങ്ങുമെന്ന് റെയില്വേ സുരക്ഷാ കമ്മീഷണര് സുദര്ശന് നായിക്ക് അറിയിച്ചു. പാളത്തിന്റെ കേടുപാടുകളും സുരക്ഷയും വിലയിരുത്താന് പ്രത്യേക നിരീക്ഷണ സംവിധാനം (ഒഎംഎസ്) ഘടിപ്പിച്ച തീവണ്ടിയില് പരിശോധന നടത്തിയ ശേഷമാണ് അദ്ദേഹം ഇക്കാര്യം അറിയിച്ചത്.
ചെങ്ങന്നൂര് മുതല് തിരുവല്ല വരെയുള്ള 9കി.മീറ്റര് ദൂരത്തിലെ കോടിയാട്ടുകര, പ്രാവിന്കൂട്, കുറ്റൂര്, ഇരുവള്ളിപ്ര എന്നീ അടിപ്പാതകളിലും മണിമല, പമ്പ നദികള്ക്കും തോടുകള്ക്കും കുറുകെയുള്ള മറ്റു വലുതും ചെറുതുമായ പാലങ്ങളിലുമെല്ലാം പരിശോധന നടത്തി. 5.30ന് തിരികെ തിരുവല്ലയിലെത്തിയ സംഘം ഇവിടെ നിന്നും അഞ്ചു ബോഗികളുള്ള മറ്റൊരു ട്രെയിനില് വീണ്ടും ചെങ്ങന്നൂരിലേക്ക് പോയി. പരമാവധി 120കി.മിവരെ വേഗത്തില് ഇലക്ട്രിക് ട്രെയിന് ഓടിച്ചുള്ള പരിശോധനയും നടന്നു. ഡിവിഷണല് റെയില്വേ മാനേജര് പ്രകാശ് ഭൂട്ടാനി, ചീഫ് അഡ്മിനിസ്ട്രെറ്റിവ് ഓഫിസര് പഞ്ചം, ചീഫ് എഞ്ചിനീയര് ബി.കമലാകര റെഡ്ഡി, ഡെപ്യുട്ടി ചീഫ് എഞ്ചിനീയര് പി.സുജീന്ദ്രന് എന്നിവരും മെക്കാനിക്കല്, ഇലക്ട്രിക്കല്, സിഗ്നല്, അഡ്മിനിസ്ട്രെറ്റിവ് വിഭാഗങ്ങളിലെ ഉദ്യോഗസ്ഥരും സുരക്ഷാ കമ്മീഷണര്ക്കൊപ്പം സംഘത്തില് ഉണ്ടായിരുന്നു. പരിശോധന സംബന്ധിച്ച് സുരക്ഷാ കമ്മീഷണറുടെ റിപ്പോര്ട്ട് റെയില്വേ മന്ത്രാലയത്തിന് നല്കും. പുതിയ പാതയില് പാലം ഉറപ്പിക്കുന്ന ജോലികള് കഴിഞ്ഞ ജൂണില് പൂര്ത്തിയായിരുന്നു. ജൂണ് 21ന് ഡീസല് എഞ്ചിന് പരീക്ഷണ ഓട്ടം നടത്തി. പിന്നീട് വൈദ്യുതീകരണ ജോലികള് പൂര്ത്തിയാക്കിയശേഷം ആഗസ്റ്റ് 15നാണ് ഇലക്ട്രിക് ട്രെയിന്റെ പരീക്ഷണ ഓട്ടം നടന്നത്.
