ആലപ്പുഴ: തൊഴിലുറപ്പ് പദ്ധതി പോലെ കയര്മേഖലയില് പണിയെടുക്കുന്ന തൊഴിലാളികള്ക്ക് വര്ഷത്തില് കുറഞ്ഞത് 250 ദിവസത്തെ തൊഴില് ഉറപ്പാക്കുംവിധം കയര്വ്യവസായത്തെ പുനഃസംഘടിപ്പിക്കുമെന്ന് മന്ത്രി ഡോ. ടി.എം. തോമസ് ഐസക് പറഞ്ഞു. കയര് പിരിക്കുന്നവര്ക്കും നെയ്യുന്നവര്ക്കും കൂലി ഉറപ്പാക്കുന്നതോടൊപ്പം തൊഴിലും ഉറപ്പാക്കും. കയര് തൊഴിലാളികളുടെ വര്ധിപ്പിച്ച പെന്ഷന് വിതരണത്തിന്റെയും സംഘങ്ങള്ക്കുള്ള ആനുകൂല്യ വിതരണത്തിന്റെയും ഉദ്ഘാടനം നിര്വഹിക്കുകയായിരുന്നു മന്ത്രി.
സംഘങ്ങളില് കയര് പിരിച്ചാല് അത് സംഭരിക്കാനുള്ള ചുമതല കയര്ഫെഡിന് നല്കും. 300 രൂപ കൂലി ഉള്പ്പെടുന്ന വിലയ്ക്ക് അവര് കയര് സംഭരിക്കും. കയര് കോര്പ്പറേഷന് വഴി കയര് ചെറുകിട ഉത്പ്പാദകര്ക്ക് നല്കും. നാട്ടിലെ തൊഴില് ആവശ്യം പരിഗണിച്ച് കയര്കോര്പ്പറേഷന് ഓര്ഡര് നല്കും. വിറ്റുപോകാത്ത ഉല്പ്പന്നങ്ങള്ക്ക് റിബേറ്റ് നല്കുമെന്നും മന്ത്രി പറഞ്ഞു. ഈ ഓണത്തിന് കയര് ഉല്പ്പന്നങ്ങള്ക്ക് 20 ശതമാനം റിബേറ്റ് നല്കും.
മൂന്നു നാലുമാസത്തിനുള്ളില് കയര് സംഘങ്ങളെ പുനഃസംഘടിപ്പിക്കും. നിലവില് തകര്ച്ചയിലായ സംഘങ്ങളെ പൂട്ടുകയല്ല, സംയോജിപ്പിക്കുകയാണ് ചെയ്യുക. വൈവിദ്ധ്യമാര്ന്ന പുതിയ കയറുല്പ്പന്നങ്ങളാണ് കയര്മേഖലയുടെ സാദ്ധ്യത. 24 മുതല് ആവശ്യപ്പെട്ടവര്ക്ക് പെന്ഷന് വീട്ടില് വിതരണം ചെയ്തുതുടങ്ങുമെന്നും മന്ത്രി വ്യക്തമാക്കി. കയര് അപ്പക്സ് ബോഡി വൈസ് ചെയര്മാന് ആനത്തലവട്ടം ആനന്ദന് അദ്ധ്യക്ഷത വഹിച്ചു.
