കോട്ടയം: പാര്‍ലമെന്റ് പാസാക്കിയ ചരക്ക് സേവനനികുതി ഉപഭോക്തൃ സംസ്ഥാനമായ കേരളത്തിന് ഗുണകരമാണെന്ന് ആന്റോ ആന്റണി എം.പി. അഭിപ്രായപ്പെട്ടു. കേരളത്തോടൊപ്പം കേന്ദ്രത്തിനും ഈ ഏകികൃത നികുതി നിയമം പ്രയോജനപ്പെടുമെന്ന് അദ്ദേഹം പറഞ്ഞു. ഇന്ത്യയിലെ യുവാക്കള്‍ക്കായി പദ്ധതികള്‍ വിഭാവനം ചെയ്യുന്നതിലൂടെ യുവാക്കളെ മുന്‍നിര്‍ത്തി ലോകം കീഴടക്കാനാണ് നമ്മള്‍ ശ്രമിച്ചുകൊണ്ടിരിക്കുന്നത്. ഇതിനായി ആരംഭിച്ച മുദ്രാബാങ്കിംഗ് പോലുള്ള പദ്ധതികള്‍ക്ക് ബാങ്കുകള്‍ വായ്‌പ നല്‍കുന്നതില്‍ വിമുഖത കാണിക്കുന്നു. ഇതിന് അറുതി വരുത്തുന്നതിന് കേന്ദ്ര ഗവണ്‍മെന്റ് ബാങ്കുകള്‍ക്ക് കര്‍ശനനിര്‍ദ്ദേശം നല്‍കണമെന്ന് അദ്ദേഹം അഭിപ്രായപ്പെട്ടു. കേന്ദ്ര ഗവണ്‍മെന്റിന്റെ പദ്ധതികളെക്കുറിച്ച് കങ്ങഴ ഗ്രാമപഞ്ചായത്ത് ഹാളില്‍ നടക്കുന്ന ത്രിദിന ബോധവത്ക്കരണ പരിപാടികളും ഫോട്ടോ പ്രദര്‍ശനവും ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം.
വാഴൂര്‍ ബ്ലോക്ക് പഞ്ചായത്ത് പ്രസിഡന്റ് കെ.പി. ബാലഗോപാലന്‍ നായര്‍ അധ്യക്ഷത വഹിച്ചു. കങ്ങഴ ഗ്രാമപഞ്ചായത്ത് പ്രസിഡന്റ് ബി. പ്രദീപ്, വൈസ് പ്രസിഡന്റ് ചന്ദ്രിക ചന്ദ്രന്‍, സാമ്പത്തിക സാക്ഷരതാകേന്ദ്രം കോര്‍ഡിനേറ്റര്‍ കെ. അരവിന്ദാക്ഷന്‍ തുടങ്ങിയവര്‍ ആശംസകള്‍ അര്‍പ്പിച്ചു. കോട്ടയം ഫീല്‍ഡ് പബ്ലിസിറ്റി ഓഫീസര്‍ സുധ എസ്. നമ്പൂതിരി ആമുഖപ്രഭാഷണം നടത്തി, ഡിഎവിപി ഫീല്‍ഡ് എക്‌സിബിഷന്‍ ഓഫീസര്‍ എല്‍സി പൊന്നുമോന്‍ സ്വാഗതവും കെ.എസ്്. ബാബുരാജന്‍, കോട്ടയം ഫീല്‍ഡ് പബ്ലിസിറ്റി അസിസ്റ്റന്റ് നന്ദിയും രേഖപ്പെടുത്തി.
സ്വച്ഛ്ഭാരത് അഭിയാനെക്കുറിച്ച് ടോട്ടല്‍ സാനിറ്റേഷന്‍ മിഷന്‍ ഫാകല്‍റ്റി വി.സി. സുനില്‍കുമാറും സ്‌കില്‍ ഇന്ത്യ മിഷനെക്കുറിച്ച് കുടുംബശ്രീ ബ്ലോക്ക് കോര്‍ഡിനേറ്റര്‍ സൗമ്യ വി.എസും വിള ഇന്‍ഷുറന്‍സ് പദ്ധതിയായ ഫസല്‍ ബീമാ യോജനയെക്കുറിച്ച് കങ്ങഴ കൃഷി ഓഫീസര്‍ ബിനു തോമസും ക്ലാസുകളെടുത്തു. കേന്ദ്ര സംഗീതനാടക വിഭാഗത്തിനു വേണ്ടി തണ്ണീര്‍മുക്കം സദാശിവന്‍ അവതരിപ്പിച്ച കഥാപ്രസംഗവും ഉദ്ഘാടന ദിവസം അരങ്ങേറി.
കേന്ദ്ര സര്‍ക്കാറിന്റെ സാമൂഹ്യ സുരക്ഷാ പദ്ധതികളെക്കുറിച്ച് വാഴൂര്‍ ബ്ലോക്ക് സാമ്പത്തിക സാക്ഷരതാ കൗണ്‍സിലര്‍ കെ. അരവിന്ദാക്ഷന്‍, സ്ത്രീ സുരക്ഷയെക്കുറിച്ച് കോട്ടയം വനിതാസെല്‍ സര്‍ക്കിള്‍ ഇന്‍സ്‌പെക്ടര്‍ എന്‍. ഫിലോമിന തുടങ്ങിയവര്‍ നയിക്കുന്ന ക്ലാസുകളും വരും ദിവസങ്ങളില്‍ അരങ്ങേറും. കേന്ദ്ര ഫീല്‍ഡ് പബ്ലിസിറ്റി ഡയറക്ടേറ്റ് ആണ് ബോധവല്‍ക്കരണ പരിപാടികള്‍ സംഘടിപ്പിക്കുന്നത്. കേന്ദ്ര പരസ്യ ദൃശ്യ പ്രചാരണ വിഭാഗമാണ് (ഡിഎവിപി) ഫോട്ടോ പ്രദര്‍ശനം ഒരുക്കിയിരിക്കുന്നത്. ഇന്ന് പരിപാടികള്‍ സമാപിക്കും.ഗവണ്‍മെന്റിന്റെ കര്‍ഷക ക്ഷേമ പ്രവര്‍ത്തനങ്ങള്‍, യുവാക്കള്‍ക്കായുള്ള വിവിധ പദ്ധതികള്‍, സ്ത്രീ സുരക്ഷാ പദ്ധതികള്‍, ദരിദ്രര്‍ക്കായുള്ള വിവിധ ക്ഷേമപദ്ധതികള്‍, സാമൂഹ്യസുരക്ഷാ പദ്ധതികള്‍ തുടങ്ങിയവയെക്കുറിച്ച് ജനങ്ങളില്‍ അവബോധം വളര്‍ത്തുക എന്നതാണ് പരിപാടിയുടെ ലക്ഷ്യം.
