ചെന്നൈ: തമിഴ്നാട് നിയമസഭ ഇന്ന് നാടകീയ രംഗങ്ങള്ക്ക് വേദിയായി. ഭരണകക്ഷിയായ എഐഎഡിഎംകെയിലെ ഗുണശേഖരന് എംഎല്എയ്ക്കെതിരെ നിയമസഭയില് പ്രതിഷേധിച്ച ഡിഎംകെയിലെ മുഴുവന് എം.എല്.എമാരെയും സ്പീക്കര് പി.ധനപാല് ഒരാഴ്ചത്തേക്ക് സസ്പെന്ഡ് ചെയ്തു. ഡി.എം.കെ നേതാവ് എം.കെ സ്റ്റാലിന്റെ ”നമക്കു നാമേ’ എന്ന ബഹുജന സമ്പര്ക്ക പരിപാടിയ്ക്കെതിരെ നടത്തിയ പരാമര്ശത്തിന്റെ പേരിലായിരുന്നു ഗുണശേഖരനെതിരെ പ്രതിഷേധം.
സസ്പെന്ഷനിലായ എംഎല്എമാര് പുറത്തുപോകാന് വിസമ്മതിച്ചതോടെ മാര്ഷല്മാര് ഇവരെ ബലമായി പുറത്താക്കുകയായിരുന്നു. എണ്പതിലേറെ അംഗങ്ങളെയാണ് മാര്ഷല്മാര് വലിച്ചുനീക്കിയും എടുത്തുകൊണ്ടും പുറത്താക്കിയത്. പ്രതിപക്ഷ അംഗങ്ങളെ പുറത്താക്കിയ ശേഷം സഭ ഇന്നത്തേക്ക് പിരിഞ്ഞു.
അതേസമയം, സഭാ നടപടികളുമായി സഹകരിക്കുമെന്ന് കോണ്ഗ്രസ് വ്യക്തമാക്കി. എട്ട് അംഗങ്ങളാണ് കോണ്ഗ്രസിന് സഭയിലുള്ളത്. മേയിലെ നിയമസഭാ തെരഞ്ഞെടുപ്പിനു മുന്പ് സ്റ്റാലിന് നടത്തിയ നമുക്ക് നാമേ പരിപാടിയെയാണ് തിരൂപ്പൂര് എം.എല്.എ ഗുണശേഖരന് പരിഹസിച്ച് സഭയില് സംസാരിച്ചത്. ഈ സമയം സ്റ്റാലിന് സഭയില് ഉണ്ടായിരുന്നില്ല.
ഇതിനിടെ മറ്റ് ഡിഎംകെ അംഗങ്ങള് പ്രതിഷേധവുമായി എഴുന്നേറ്റെങ്കിലും സ്പീക്കര് ഭരണകക്ഷി അംഗത്തെ ന്യായീകരിക്കുകയായിരുന്നു. അംഗം ആരുടേയും പേര് പരാമര്ശിച്ചിട്ടില്ലെന്നും അതിനാല് പരാമര്ശത്തില് തെറ്റില്ലെന്നുമായിരുന്നു സ്പീക്കറുടെ നിലപാട്. ഈ സമയം സഭയില് എത്തിയ സ്റ്റാലിന് ശുണശേഖരന് നടത്തിയ പരാമര്ശം പിന്വലിക്കണമെന്ന് ആവശ്യപ്പെട്ടു. ഇതേചൊല്ലി ഡിഎംകെ എംഎല്എമാരും സ്പീക്കറും തമ്മില് ഏതാനും മിനിറ്റ് നീണ്ട വാദപ്രതിവാദവും നടന്നു.
തര്ക്കം രൂക്ഷമായതോടെ അംഗങ്ങളെ പുറത്താക്കാന് സ്പീക്കര് നിര്ദേശിക്കുകയായിരുന്നു. സഭയില് ഈ ബഹളങ്ങള് അരങ്ങേറുമ്പോള് മുഖ്യമന്ത്രി ജയലളിത സെക്രട്ടേറിയറ്റിലെ തന്റെ ഓഫീസില് ഉണ്ടായിരുന്നു. എന്നാല് അവര് സഭയില് എത്തിയിരുന്നില്ല.
എന്നാല് ഡി.എം.കെ അംഗങ്ങളെ പുറത്താക്കാന് സ്പീക്കറും ഭരണകക്ഷി നേതാവുമായ ഒ.പനീര്ശെല്വവും തമ്മില് ഗൂഢാലോചന നടത്തിയിരുന്നുവെന്ന് സ്റ്റാലിന് പിന്നീട് ആരോപിച്ചു.
