ന്യൂദൽഹി: അസഹിഷ്ണുത പരാമർശവുമായി ബന്ധപ്പെട്ട് ബോളിവുഡ് താരം ആമീർഖാനെ വിമർശിച്ച പ്രതിരോധ മന്ത്രി മനോഹർ പരീക്കറിന് പിന്തുണയുമായി ബിജെപി എംപി സുബ്രഹ്മണ്യൻ സ്വാമി രംഗത്തെത്തി.
ആമീർ ഖാനെ തിർത്തും പരിഹസിച്ചുകൊണ്ടാണ് അദ്ദേഹം ട്വിറ്ററിലൂടെ പ്രതികരിച്ചത്. ” എന്തിനാണ് ആമീർ ഖാനുമായി ബന്ധപ്പെട്ട പരീക്കറിന്റെ പ്രസ്താവനയിൽ ഇത്രയും ബഹളം വയ്ക്കുന്നത്? മാതൃഭൂമിയെ സ്നേഹിക്കാൻ ആമീർ ഖാനു കഴിയുന്നില്ലെങ്കിൽ അദ്ദേഹത്തിന് ഒരു ടീച്ചറിനെ ആവശ്യമാണ്”- സ്വാമി ട്വിറ്ററിൽ കുറിച്ചിട്ടു. ∙
കഴിഞ്ഞ ദിവസം പൂനെയിൽ നടന്ന ചടങ്ങിൽ ആമീർ ഖാന്റെ പേര് സൂചിപ്പിക്കാതെ മനോഹർ പരീക്കർ അദ്ദേഹത്തെ വിമർശിച്ചിരുന്നു. രാജ്യം വിട്ടുപോകുമെന്ന ആമിർ ഖാന്റെ പ്രസ്താവന ധിക്കാരമായിരുന്നു എന്നാണ് പുണെയിലെ ചടങ്ങിൽ മനോഹർ പരീക്കർ പറഞ്ഞത്. രാജ്യദ്രോഹപരമായ പ്രസ്താവനകൾ നടത്തുന്നവരെ രാജ്യത്തെ ജനങ്ങൾ പാഠം പഠിപ്പിക്കുമെന്നു മുന്നറിയിപ്പും മന്ത്രി നൽകിയിരുന്നു.
വിഷയത്തിൽ പരീക്കറിനെതിരെ പ്രതിപക്ഷ പാർട്ടികൾ രംഗത്തെത്തിയപ്പോഴാണ് പിന്തുണയുമായി സ്വാമി എത്തിയത്. എന്നാൽ, താൻ ഒരു താരത്തിന്റെയും പേരെടുത്തു പറഞ്ഞിട്ടില്ലെന്നായിരുന്നു വിഷയത്തിൽ പരീക്കറിന്റെ വിശദീകരണം.
രാജ്യത്ത് അസഹിഷ്ണുത വർധിച്ച് വരികയാണെന്ന് ആരോപിക്കുകയും താനും ഭാര്യ കിരണും രാജ്യം വിട്ട് പോകുന്നതിനെക്കുറിച്ച് ആലോചിച്ച് വരികയാണെന്നുമാണ് ആമീർ ഖാൻ കഴിഞ്ഞ നവംബറിൽ പരസ്യമായിമാധ്യമങ്ങൾക്ക് മുന്നിൽ പ്രസ്താവന നടത്തിയത്.
