കണ്ണൂര്: ഹൈക്കോടതി അഭിഭാഷകര് മാന്യതവിട്ടു പെരുമാറരുതെന്ന് പത്രപ്രവര്ത്തക യൂണിയന് സംസ്ഥാന ജനറല് സെക്രട്ടറി സി.നാരായണന്. ഹൈക്കോടതി പരിസരത്ത് മാധ്യമപ്രവര്ത്തകരെ മര്ദിച്ചതില് പ്രതിഷേധിച്ച് പത്രപ്രവര്ത്തക യൂണിയന് കണ്ണൂര് ജില്ലാ കമ്മറ്റിയുടെ നേതൃത്വത്തില് സംഘടിപ്പിച്ച മാര്ച്ച് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വനിതാമാധ്യമപ്രവര്ത്തകരെ ഉള്പ്പെടെ ഹൈക്കോടതി വളപ്പില് കയ്യേറ്റം ചെയ്ത നടപടി നീതീകരിക്കാനാവാത്തതാണ്.
ഗവ. പ്ലീഡര്ക്കെതിരായ കേസില് കോടതിപോലും അദ്ദേഹത്തെ സംശയദൃഷ്ടിയില് നിര്ത്തിയിരിക്കുന്ന സാഹചര്യത്തിലാണ് അഭിഭാഷകര് മാധ്യമങ്ങളുടെ നേരെ തിരിയുന്നത്. വാര്ത്ത എഴുതേണ്ടത് എങ്ങനെയെന്ന് മാധ്യമപ്രവര്ത്തകരെ അഭിഭാഷകര് പഠിപ്പിക്കേണ്ടതില്ല. പൊലീസും അഭിഭാഷകരും തമ്മിലുള്ള തര്ക്കത്തില് മാധ്യമപ്രവര്ത്തകരെ കക്ഷിചേര്ക്കേണ്ടതുമില്ല. പത്രപ്രവര്ത്തക യൂണിയന് ഏത് അന്വേഷണത്തെയും സ്വാഗതം ചെയ്യുന്നുവെന്നും അദ്ദേഹം പറഞ്ഞു.
പത്രപ്രവര്ത്തക യൂണിയന് ജില്ലാ സെക്രട്ടറി എന്.പി.സി.രംജിത്ത്, സംസ്ഥാന കമ്മിറ്റിയംഗം അബു വി.ഹുസൈന്, ജില്ലാ ട്രഷറര് പ്രശാന്ത് പുത്തലത്ത്, ജില്ലാ കമ്മിറ്റി അംഗം കെ.എന്.ബാബു എന്നിവര് പ്രസംഗിച്ചു. പ്രസ്ക്ലബ് പരിസരത്തുനിന്ന് ആരംഭിച്ച പ്രതിഷേധമാര്ച്ച് പഴയ ബസ് സ്റ്റാന്ഡ് പരിസരത്തു സമാപിച്ചു.
കെയുഡബ്ല്യുജെ ജില്ലാ ജോയിന്റ് സെക്രട്ടറി സി.വി.സാജു, ജില്ലാ കമ്മിറ്റിയഅംഗം സുമേഷ് മൊറാഴ, ധനേഷ് പെരളം തുടങ്ങിയവര് നേതൃത്വം നല്കി.
