ശ്രീകാര്യം: മാജിക് പ്ലാനറ്റിലെ വേദിയില് തത്സമയം നടന്ന സംഭവങ്ങളും മുഹൂര്ത്തങ്ങളും കോര്ത്തിണക്കി ദൃശ്യവിരുന്ന് മോം ഇന്ദ്രജാല പരിപാടി അരങ്ങേറി. ഇന്ദ്രജാലത്തിന്റെ മാസ്മരികത വെളിവാകുന്ന പരിപാടിക്ക് കൊഴുപ്പേകി ചലച്ചിത്രതാരം
മഞ്ജുവാര്യരും പ്രത്യക്ഷപ്പെട്ട പരിപാടി സംഘടിപ്പിച്ചത് കിന്ഫ്ര അപ്പാരല് പാര്ക്കില് പ്രവൃത്തിക്കുന്ന മാജിക് അക്കാദമിയാണ്. നല്ല തലമുറയെ വാര്ത്തെടുക്കുക എന്ന ലക്ഷ്യത്തോടെ ഒരു കുഞ്ഞു ജനിക്കുന്നതിന് മുമ്പും ജനിച്ച് രണ്ടുവര്ഷം വരെയുള്ള കാലഘട്ടത്തിന്റെ പ്രാധാന്യത്തെകുറിച്ചും ആഗോള തലത്തില് ജനങ്ങളെ ബോധവാന്മാരാക്കാന് വേണ്ടിയാണ് യുണിസെഫുമായി സഹകരിച്ചുകൊണ്ട് മാജിക് പ്ലാനറ്റില് മോം സെന്റര് ഒരുക്കിയത്. ഇതിന്റെ ഉദ്ഘാടനത്തോടനുബന്ധിച്ചാണ് മോം ഇന്ദ്രജാലം എന്ന പ്രത്യക പരിപാടി മഞ്ജു വാര്യരുടെ പങ്കാളിത്തത്തോടെ അവതരിപ്പിച്ചത്.
സ്ക്രീനില് തെളിഞ്ഞ ദൃശ്യത്തില് ഗൈനക്കോളജിസ്റ്റിന്റെ വേഷത്തില് മഞ്ജുവാര്യര് ആദ്യത്തെ ആയിരം ദിനങ്ങളുടെ പ്രാധാന്യം വിളിച്ചോതുന്ന പുസ്തകം വേദിയില് റെഫര് ചെയ്തു. തുടര്ന്ന് മേശപ്പുറത്തിരിക്കുന്ന ലാപ്ടോപ്പില് മഞ്ജു തന്റെ അഭിപ്രായം ടൈപ്പ് ചെയ്തത് വേദിയിലെ സ്ക്രീനില് തെളിഞ്ഞു. തത്സമയം വേദിയില് നില്ക്കുന്ന മാന്ത്രികന് മുതുകാട് സ്ക്രീനില് നിന്നു പുസ്തകം വേദിയിലേക്ക് വലിച്ചെടുത്തു.
യൂണിസെഫിന്റെ സഹായത്തോടുകൂടി മാജിക് ഓഫ് മദര് ഹൂഡ് എന്ന മാജിക് ഷോയുടെ ഉദ്ഘാടനത്തിന് കിന്ഫ്രാ മാജിക് പ്ലാന്റിലെത്തിയ മുഖ്യമന്ത്രി പിണറായി വിജയന് മുന്നില് മാജിക് അവതരിപ്പിക്കുന്ന മഞ്ജു വാര്യര്. ഗോപിനാഥ് മുതുകാട്, അടൂര് ഗോപാലകൃഷ്ണന്, മന്ത്രി കടകംപള്ളി സുരേന്ദ്രന് സമീപം
ഒരു കുഞ്ഞു രൂപം പ്രാപിക്കുന്നതു മുതല് ആയിരം ദിനങ്ങളുടെ പ്രാധാന്യം മനസ്സിലാക്കിത്തരുവാന് സദസ്സില് നിന്നു ഗര്ഭിണിയായ ദിവ്യ എന്ന സ്ത്രീയെ മുതുകാട് വേദിയിലേക്ക് ക്ഷണിച്ചു. സദസ്സില് നിന്നെഴുന്നേറ്റു വരുന്ന ദിവ്യ സ്റ്റേജിലെ സ്ക്രീനിനുള്ളിലേക്കു കയറിപ്പോകുന്നു. തുടര്ന്ന് സ്ക്രീനിലെ ദൃശ്യങ്ങളില് ആദ്യത്തെ ആയിരം ദിനങ്ങളുടെ പ്രാധാന്യം മഞ്ജുവാര്യര് ഗര്ഭിണിയുമായി പങ്കുവയ്ക്കുന്നു. തുടര്ന്ന് ധാരാളം വെള്ളം കുടിക്കണമെന്ന് പറഞ്ഞു യുവതിയുടെ നേര്ക്കു നീട്ടിയ വെള്ളമടങ്ങിയ ഗ്ലാസ്സ് തറയില് വീണ് പൊട്ടുന്നതും ക്ലീന് ചെയ്യാന് ജീവനക്കാരനെ വിളിക്കുന്നതുമൊക്കെ മുഖ്യമന്ത്രി ഉള്പ്പെടെയുള്ള സദസ്സ് ശ്വാസമടക്കിയാണ് കണ്ടിരുന്നത്. കൂടാതെ യുവതിക്ക് നല്കാന് പോഷകസമൃദ്ധമായ ഫലങ്ങള് മുതുകാട് തന്റെ മാന്ത്രികവിദ്യയില് സൃഷ്ടിച്ചെടുക്കുന്നത് കണ്ട് സദസ്സില് കൈയ്യടി മുഴങ്ങി. ഒടുവില് ഡോക്ടറുടെ വേഷത്തില് നില്ക്കുന്ന മഞ്ജുവാര്യരും മാന്ത്രികനും ആയിരം ദിനങ്ങളുടെ പ്രാധാന്യം പൊതുജനങ്ങളിലെത്തിക്കാനുള്ള ദൗത്യവുമായി യുണിസെഫിന്റെ വേഷത്തില് വേദിയില് പ്രത്യക്ഷപ്പെടുന്നതോടെ മോം ഇന്ദ്രജാല പരിപാടിക്ക് തിരശ്ശീല വീണു.
