കെ.കെ.കുഞ്ചുപിള്ള ഗവ. ഹൈസ്‌കൂളിലെ സീലിങും ബഞ്ചുകളും ഡസ്‌കുകളും നശിപ്പിച്ച നിലയില്‍
അമ്പലപ്പുഴ: അമ്പലപ്പുഴ കെ.കെ. കുഞ്ചുപിള്ള ഗവ. ഹൈസ്‌കൂളില്‍ സാമൂഹ്യ വിരുദ്ധരുടെ അഴിഞ്ഞാട്ടം. ക്ലാസ് മുറിയിലെ സീലിങും ക്ലോക്കുകളും തകര്‍ത്തു. സ്‌കൂളില്‍ അഞ്ച്, ആറ് ക്ലാസുകള്‍ നടക്കുന്ന മുറികളിലെ സീലിങുകള്‍ തകര്‍ത്ത് അകത്തുകയറിയ സാമൂഹ്യ വിരുദ്ധര്‍ ക്ലാസ് മുറിയിലെ ബഞ്ചുകളും ഡസ്‌കുകളും ഭാഗീകമായി തകര്‍ത്തു. ഇതിനുശേഷം എല്‍പി സ്‌കൂള്‍ പ്രവര്‍ത്തിക്കുന്ന വടക്കു ഭാഗത്തെ കെട്ടിടത്തില്‍ കയറി കുട്ടികളെ പഠിപ്പിക്കുന്ന ക്ലോക്ക്, പ്രഥമ ശുശ്രൂഷാ ഉപകരണങ്ങള്‍, ലോഷന്‍ എന്നിവ മോഷ്ടിച്ചു. പിന്നീട് കുടിവെള്ള പൈപ്പുകളും അടിച്ചു തകര്‍ത്തു. ഹയര്‍ സെക്കണ്ടറി പ്രവര്‍ത്തിക്കുന്ന കെട്ടിടത്തിനു പുറകിലെ പൊക്കംകുറഞ്ഞ മതില്‍ചാടിയാകാം സംഘം അകത്തു കടന്നതെന്ന് പറയുന്നു. ഇതിനുശേഷം കൗണ്‍സിലിങ് മുറിയില്‍ കയറി ഓടുപൊളിച്ച് അടത്തുകടക്കുകയായിരുന്നു.
കഴിഞ്ഞ കുറേ നാളുകളായി സ്‌കൂള്‍ കേന്ദ്രീകരിച്ച് സാമൂഹ്യ വിരുദ്ധര്‍ അഴിഞ്ഞാടിയിട്ടും പോലീസ് നടപടി സ്വീകരിച്ചിരുന്നില്ല. ഏതാനും വര്‍ഷം മുമ്പ് സ്‌കൂളിലെ മതില്‍ തകര്‍ക്കുകയും തടിഉപകരണങ്ങള്‍ നശിപ്പിക്കുകയും ചെയ്തിരുന്നു. സാമൂഹ്യ വിരുദ്ധരും മോഷ്ടാക്കളും താവളമാക്കിയ സ്‌കൂളിനെ രക്ഷിക്കാന്‍ പിടിഎയും മുന്നിട്ടിറങ്ങുന്നില്ലെന്ന് രക്ഷിതാക്കള്‍ പരാതിപ്പെടുന്നു. സ്‌കൂളിലെഅതിക്രമത്തിനെതിരെ പ്രധാനാദ്ധ്യാപിക റാണികുട്ടി സേവ്യര്‍ അമ്പലപ്പുഴ പോലീസില്‍ പരാതി നല്‍കി.
