ചേര്‍ത്തല: പൊതു മേഖലാ സ്ഥാപനമായ മായിത്തറ ഓട്ടോകാസ്റ്റിലെ മാനദണ്ഡങ്ങള്‍ ലംഘിച്ചുള്ള നിയമനങ്ങള്‍ തുടരുകയാണെന്ന് ടിയുസിഐ ആരോപിച്ചു. സ്ഥാനക്കയറ്റങ്ങള്‍ക്കുള്ള മാനദണ്ഡങ്ങള്‍ ലംഘിച്ച് ഉന്നത ഉദ്യോഗസ്ഥന്‍ ഇഷ്ടക്കാര്‍ക്ക് പ്രൊമോഷനും പുതിയ നിയമനവും നടത്തുകയാണെന്ന് യോഗം കുറ്റപ്പെടുത്തി.
വനിതാ ജീവനക്കാരിക്ക് പ്രൊമോഷന്‍ നല്‍കുന്നതിനായി അപേക്ഷ സ്വീകരിക്കുന്ന തീയതിയില്‍ പോലും ഇളവ് വരുത്തി. ബിരുദവും ഡിപ്ലോമയും യോഗ്യതയായി പരിഗണിക്കപ്പെടേണ്ട തസ്തികയില്‍ ഇഷ്ടക്കാര്‍ക്ക് നിയമനം ഉറപ്പാക്കുന്നതിനായി പി.ജി.ഡി.സി.എ അധിക യോഗ്യതയായി രേഖപ്പെടുത്തിയാണ് അപേക്ഷ ക്ഷണിച്ചിട്ടുള്ളത്.
പൊതുമേഖലാ സ്ഥാപനങ്ങളില്‍ ഒഴിവുണ്ടെങ്കില്‍ പത്ത് ദിവസത്തിനുള്ളില്‍ പിഎസ്‌സിയെ അറിയിക്കണമെന്ന സര്‍ക്കാര്‍ ഉത്തരവ് നിലനില്‍ക്കെയാണ് വഴിവിട്ട നിയമനത്തിന് നീക്കം. പ്രൊമോഷന്‍ വ്യവസ്ഥകള്‍ അനുസരിച്ച് പുതുതായി നിയമനം നടത്തുമ്പോള്‍ അന്‍പത് ശതമാനം ജീവനക്കാരില്‍ നിന്നും ബാക്കി പുറത്തുനിന്നുമുള്ള ഉദ്യോഗാര്‍ഥികളെയുമാണ് പരിഗണിക്കേണ്ടത്.
ഇതെല്ലാം തകിടം മറിക്കുന്നതായാണ് വിമര്‍ശനം ഉയരുന്നത്. ജീവനക്കാരില്‍ ചിലര്‍ക്കുമാത്രം ശമ്പളം വര്‍ധിപ്പിച്ചു നല്‍കുന്നതായും പരാതിയുണ്ട്. കമ്പനിക്ക് കടുത്ത സാമ്പത്തിക ബാധ്യതകള്‍ സൃഷ്ടിക്കുന്ന ഇത്തരം നടപടികള്‍ തടയാന്‍ കര്‍ശന നടപടി സ്വീകരിക്കണമെന്ന് ആവശ്യപ്പെട്ട് മുഖ്യമന്ത്രി, വ്യവസായ മന്ത്രി, വിജിലന്‍സ് ഡയറക്ടര്‍, പിഎസ്‌സി ചെയര്‍മാന്‍ എന്നിവര്‍ക്കും പരാതി നല്‍കിയിട്ടുണ്ട്.
