ഏറ്റുമാനൂര്‍: പേരൂരില്‍ പൂവത്തുംമൂട് പാലത്തിനും കിണറ്റിന്‍മൂട് പാലത്തിനും ഇടയില്‍ മീനച്ചിലാറ്റിന്റെ തീരത്തെ പുറമ്പോക്കിന്റെ അതിര്‍ത്തി നിര്‍ണ്ണയത്തിന് ഇന്നലെ അളവ്് നിശ്ചയിച്ചെങ്കിലും അളവ് നടന്നില്ല.
കോട്ടയം അഡീഷണല്‍ തഹസീല്‍ദാരാണ് പുറമ്പോക്ക് തിട്ടപ്പെടുത്തണമെന്നുള്ള നിര്‍ദ്ദേശം ഏറ്റുമാനൂര്‍ നഗരസഭ സെക്രട്ടറി, താലൂക്ക് സര്‍വ്വെയര്‍, പേരൂര്‍ വില്ലേജ് ഓഫീസര്‍ എന്നിവര്‍ക്ക് നല്‍കിയത്. അതിന്‍ പ്രകാരം സര്‍വ്വേ നടത്താന്‍ വില്ലെജ് ആഫീസര്‍ അളക്കാനുള്ള ഉദ്യോഗസ്ഥരുമായി രാവിലെ വന്നെങ്കിലും അളവ് നടത്താനുള്ള അനുബന്ധ സൗകര്യങ്ങള്‍ ഏര്‍പ്പെടുത്തിയില്ല. ഇക്കാരണത്താല്‍ അളവുനടന്നില്ല. അഡീഷണല്‍ തഹസീല്‍ദാരുടെ നിര്‍ദ്ദേശപ്രകാരം അനുബന്ധ സൗകര്യങ്ങളായ കാട് വെട്ടിത്തെളിക്കല്‍, സര്‍വ്വെക്കല്ലുകള്‍ ലഭ്യമാക്കല്‍ മുതലായവ ഏര്‍പ്പെടുത്തേണ്ടത് നഗരസഭ സെക്രട്ടറിയാണ്. എന്നാല്‍ തനിക്ക് അപ്രകാരമുള്ള നിര്‍ദ്ദേശമടങ്ങിയ കത്ത് തഹസീല്‍ദാരില്‍ നിന്ന് ലഭിച്ചിട്ടില്ല എന്ന് സെക്രട്ടറി അറിയിച്ചു.
കൈയേറ്റം ഒഴിപ്പിക്കാന്‍ സ്ഥലം അളന്ന് തിട്ടപ്പെടുത്തണമെന്ന് ആവശ്യപ്പെട്ട് ആക്ഷന്‍ കൗണ്‍സിലും ബിജെപിയും സംയുക്ത പ്രകടനവും പ്രതിഷേധയോഗവും നടത്തിയിരുന്നു. ഏറ്റുമാനൂര്‍ നഗരസഭയിലെ പതിനെട്ടാം വാര്‍ഡ് കൗണ്‍സിലര്‍ ഉള്‍പ്പടെ നഗരസഭ അധികൃതരും കയ്യേറ്റത്തിന് കൂട്ടുനില്‍ക്കുകയാണെന്ന് ആക്ഷന്‍കൗണ്‍സില്‍ പ്രസിഡന്റ് മോന്‍സി പി.തോമസ് ആരോപിച്ചു. ഉദ്യോഗസ്ഥരുടെ വീഴ്ചമൂലം അളവ് നടക്കാത്തത് കളക്ടറെ ബോധ്യപ്പെടുത്തുമെന്നും അദ്ദേഹം അറിയിച്ചു.
