ഹരിപ്പാട്: വഴിയോര കച്ചവടക്കാരിയായ ദളിത് സ്ത്രീയെ ഹരിപ്പാട് നഗരസഭ വൈസ്ചെയര്മാന് ജാതിപ്പേര് വിളിച്ച് ആക്ഷേപിച്ചെന്ന സംഭവവുമായി ബന്ധപ്പെട്ട് നഗരസഭയില് കോണ്ഗ്രസ്സ് അവതരിപ്പിച്ച പ്രമേയത്തെ സിപിഎം അംഗങ്ങള് പിന്താങ്ങുകയും ബിജെപി അംഗം നിഷ്പക്ഷത പാലിക്കുകയും ചെയ്തു.
ഹരിപ്പാട് താലൂക്കാശുപത്രിക്ക് സമീപം അനധികൃതമായി വെച്ചിട്ടുള്ള കടകള് നീക്കുന്നത് സംബന്ധിച്ച് നഗരസഭ വൈസ് ചെയര്മാന് എം.കെ. വിജയന്റെ നേതൃത്വത്തില് പന്ത്രണ്ടോളം കൗണ്സിലര്മാര് കഴിഞ്ഞ ദിവസം കട ഒഴിയണമെന്ന് സ്ത്രീയോട് ആവശ്യപ്പെട്ടു.
എന്നാല് ഇതിന്ശേഷം സിപിഎമ്മിന്റെ ചില പ്രവര്ത്തകര് സ്ത്രീയെക്കൊണ്ട് വൈസ് ചെയര്മാനെതിരെ ഹരിപ്പാട് പോലീസില് പരാതി നല്കിക്കുകയും തുടര്ന്ന് ബുധനാഴ്ച സിപിഎം നേതാക്കളും പ്രവര്ത്തകരും നഗരസഭയിലേക്ക് മാര്ച്ച് നടത്തുകയും നഗരസഭാംഗങ്ങളെ അസഭ്യം പറയുകയും ചെയ്തിരുന്നു.
എന്നാല് വൈകുന്നേരത്തോടുകൂടി സിപിഎമ്മിന്റെ സമ്മര്ദ്ദത്തെതുടര്ന്ന് ദളിത് പീഢനം വകുപ്പ് ചേര്ത്ത് കായംകുളം ഡിവൈഎസ്പി ഇദ്ദേഹത്തിനെതിരെ കേസ്സ് രജിസ്റ്റര് ചെയ്യുകയും ചെയ്തു.
ഇതിനെതിരെയാണ് ഇന്നലെ ഹരിപ്പാട് നഗരസഭ പൊതുമരാമത്ത് കമ്മറ്റി ചെയര്മാന് എം. സജീവ് പ്രതിഷേധ പ്രമേയം അവതരിപ്പിച്ചത്. നഗരസഭയിലെ അഞ്ച് സിപിഎം അംഗങ്ങളും പ്രമേയത്തിന് അനുകൂലമായി നിലപാട് സ്വീകരിച്ചതോടെ സിപിഎമ്മിന് കനത്ത പ്രഹരമായി.
ബിജെപി ഏക അംഗം കെ.എസ്. വിനോദ് ഇപ്പോള് നടക്കുന്ന വിവാദങ്ങളില് നേരിട്ട് ബോദ്ധ്യമില്ലാത്തതിനാല് നിഷ്പക്ഷ നിലപാട് സ്വീകരിച്ചു.
