ആലപ്പുഴ: റിട്ടയര്‍ ചെയ്ത പ്രധാന അദ്ധ്യാപകരെ ജില്ലാപഞ്ചായത്ത് എല്‍എസ്ജിഡി വിഭാഗം മനപ്പൂര്‍വം കഷ്ടപ്പെടുത്തുന്നതായി പരാതി. ജില്ലയിലെ സര്‍ക്കാര്‍ ഹൈസ്‌കൂള്‍-ഹയര്‍ സെക്കന്‍ഡറി സ്‌കൂളുകളുടെ പുനരുദ്ധാരണ പ്രവര്‍ത്തനവും നിര്‍മ്മാണ പ്രവര്‍ത്തനവും നടത്തുന്നതിന് ചുമതല ഏറ്റെടുത്ത റിട്ടയേര്‍ഡ് ഹൈസ്‌കൂള്‍ ഹെഡ്മാസ്റ്റര്‍മാര്‍ പെന്‍ഷന്‍ കിട്ടാതെ വലയുകയാണ്.
ജില്ലയിലെ 46 ഹൈസ്‌കൂളുകളുടെ ചുമതല ജില്ലാ പഞ്ചായത്തിന് നിലനില്‍ക്കെ ഈ സ്‌കൂളുകളില്‍ വികസന പ്രവര്‍ത്തനത്തിനായി എഗ്രിമെന്റ് ചെയ്ത് പ്രവര്‍ത്തനം പൂര്‍ത്തീകരിച്ചിട്ടുളളതിന്റെ പേരില്‍ പെന്‍ഷന്‍ പറ്റിയ അദ്ധ്യാപകര്‍ക്ക് പെന്‍ഷന്‍ കിട്ടാത്ത അവസ്ഥ നിലനില്‍ക്കുന്നു. മുപ്പതോളം പ്രധാന അദ്ധ്യാപകരാണ് ഇത്തരത്തില്‍ കഷ്ടപ്പെടുന്നത്.
ഈ പ്രധാന അദ്ധ്യാപകര്‍ നാളുകളായി ജില്ലാ പഞ്ചായത്ത് എഞ്ചിനീയറിംഗ് വിഭാഗം എക്‌സിക്യുട്ടീവ് എഞ്ചിനീയറുടെ ഓഫീസില്‍ കയറിയിറങ്ങി കഷ്ടപ്പെടുകയാണ്. ഓരോ ദിവസവും ചെല്ലുമ്പോള്‍ ഓരോ സര്‍ട്ടിഫിക്കേറ്റ് ആവശ്യപ്പെടുന്നു. ആയിരക്കണക്കിന് വിദ്യാര്‍ത്ഥികള്‍ക്ക് വിജ്ഞാനത്തിന്റെ വാതായനം തുറന്ന ശേഷം ശിഷ്ഠ ജീവിതം വിശ്രമത്തിന് നിയമം മൂലം തീരുമാനിക്കപ്പെട്ട ജില്ലയിലെ പ്രധാന അദ്ധ്യാപകരാണ് ഈ ദുരിതക്കയത്തില്‍ അകപ്പെട്ടിട്ടുളളത്.
ഇവരുടെ പ്രശ്‌ന പരിഹരിക്കണമെന്ന ഈ ആവശ്യം ഉന്നയിച്ച് ജില്ലാ പഞ്ചായത്ത് അംഗം എന്ന നിലയില്‍ നിരവധി തവണ കത്ത് നല്‍കിയിട്ടും നിസംഗ നിലപാടാണ് അധികാരികളുടെ ഭാഗത്ത് നിന്നുണ്ടായതെന്ന് ജില്ലാ പഞ്ചായത്ത് പ്രതിപക്ഷ നേതാവ് ജോണ്‍ തോമസ് കുറ്റപ്പെടുത്തി.
എല്‍എസ്ജിഡി എക്‌സിക്യുട്ടീവ് എഞ്ചിനീയറുടെ എന്‍ഒസി ലഭിച്ചെങ്കില്‍ മാത്രമേ വിദ്യാഭ്യാസ ഡെപ്യൂട്ടി ഡയറക്ടറുടെ ആഫീസില്‍ നിന്നും പെന്‍ഷന്‍ കിട്ടുന്നതിനുളള നടപടികള്‍ നീക്കുവാന്‍ കഴിയു. റിട്ടയര്‍ ചെയ്ത പ്രധാനദ്ധ്യാപകരെ ബുദ്ധിമുട്ടിക്കുന്ന ഇത്തരം നിലപാട് പ്രതിഷേധാര്‍ഹമാണെന്ന് ജോണ്‍ തോമസ് പറഞ്ഞു.
