ജില്ലാതല വായനാ ദിനാചരണത്തിന്റെ ഉദ്ഘാടനത്തോടനുബന്ധിച്ച് ശ്രീചിത്രാ ഹോമിലെത്തിയ സിനിമാതാരം സുധീര്കരമന കുട്ടികള്ക്ക് എപിജെ അബ്ദുള്കലാമിന്റെ മൈ ജോര്ണി എന്ന പുസ്തകം പരിചയപ്പെടുത്തുന്നു
തിരുവനന്തപുരം: വായനവാരത്തിന്റെ ജില്ലാതല ഉദ്ഘാടനം ശ്രീചിത്രാഹോമിലെ കുരുന്നുകള്ക്കൊപ്പം അധ്യാപകനും നടനുമായ സുധീര് കരമനയുടെ സംവാദത്തിലൂടെ ഹൃദ്യമായി. ഹോമിലെ വിദ്യാര്ഥികള്ക്ക് വായനയുടെ മഹത്ത്വവും അധ്യാപനജീവിതത്തിലെയും കലാജീവിതത്തിലെയും അനുഭവങ്ങളും പങ്കുവച്ചാണ് സുധീര് കരമന വായനദിനത്തിലെ ജില്ലാതല പരിപാടികള്ക്ക് തുടക്കം കുറിച്ചത്.
ഡോ എ.പി.ജെ അബ്ദുല് കലാമിന്റെ ‘മൈ ജേര്ണി’ എന്ന പുസ്തകത്തിലെ ഒരു ഖണ്ഡിക വായിച്ച് കലാമിന്റെ ജീവിതത്തിലെ പ്രചോദനാത്മകമായ അംശങ്ങള് വിവരിച്ചാണ് അദ്ദേഹം കുട്ടികളുമായുള്ള ആശയവിനിമയം ആരംഭിച്ചത്. താന് പ്രഥമാധ്യാപകനായുള്ള വെങ്ങാനൂര് ഗേള്സ് ഹയര്സെക്കന്ഡറി സ്കൂളിലെ വിപുലമായ ലൈബ്രറി സൗകര്യം ശ്രീചിത്രാഹോമിലെ വിദ്യാര്ത്ഥികള്ക്ക് ഉപയോഗപ്പെടുത്താന് സൗകര്യമുണ്ടാക്കുമെന്ന് സുധീര് കരമന വാഗ്ദാനം ചെയ്തു. ഇതിനായി കുട്ടികള്ക്ക് വാഹനസൗകര്യം ഉള്പ്പെടെ ഒരുക്കുന്നത് പരിഗണിക്കുമെന്നും അദ്ദേഹം കൂട്ടിച്ചേര്ത്തു.
അറിവ് നേടുന്നതിലൂടെയാണ് നമ്മള് യഥാര്ഥ സാക്ഷരതയിലേക്ക് എത്തുന്നത്. സ്കൂളിനെ പഠനത്തിനപ്പുറം ആഴത്തിലുള്ള വായന ഇത്തരത്തില് ഒരു വിദ്യാര്ത്ഥിയെ അറിവ് നേടാന് സഹായിക്കും. വായനക്കും സാഹിത്യത്തിനും നല്കുന്ന ഐസക് ന്യൂട്ടണ് മുതല് ബില് ഗേറ്റ്സ് വരെയുള്ളവരെ ഉദാഹരിച്ച് അദ്ദേഹം അറിവ് നേടാന് മഹാന്മാര് നടത്തിയ പരിശ്രമങ്ങളും അതവരെ വിജയത്തിലെത്തിച്ചതിനെ കുറിച്ചും വിശദീകരിച്ചു.
ദൃശ്യമാധ്യമങ്ങള്ക്ക് പ്രസക്തി വര്ധിക്കുന്ന ഇക്കാലത്ത് വായനക്ക് കൂടുതല് പ്രാധാന്യം നല്കണം. പത്രവായന കുട്ടികള് നിര്ബന്ധമായും ശീലമാക്കണം, അദ്ദേഹം പറഞ്ഞു. തുടര്ന്ന് കുട്ടികളുടെ ചോദ്യങ്ങള്ക്ക് അദ്ദേഹം മറുപടി നല്കി. അധ്യാപകനായുള്ള ജീവിതാനുഭവങ്ങളെപ്പറ്റിയും അഭിനേതാവായുള്ള അനുഭവങ്ങളെപ്പറ്റിയും നിരവധി ചോദ്യങ്ങളുയര്ന്നു. ഇതിനെല്ലാം രസകരമായും കുട്ടികളുടെ മനസില്പതിയുന്ന രീതിയിലും അദ്ദേഹം മറുപടി നല്കി.
സിനിമയില് ഇപ്പോഴുള്ളത് ആശയപരമായതല്ല, സാങ്കേതികമാറ്റങ്ങളാണെന്ന് അദ്ദേഹം ചോദ്യങ്ങള്ക്ക് മറുപടി നല്കി. പുതുതലമുറ ചിത്രങ്ങളില് സ്വീകരിക്കുന്ന പല ശൈലികളും പഴയകാലം മുതല്ക്കേ നിലനിന്നവയാണ്. ഇപ്പോള് ഒരു ദിവസം സംഭവിക്കുന്നതും ഒരു സ്ഥലത്ത് സംഭവിക്കുന്നതുമായ നിരവധി കഥകള് സിനിമകള്ക്ക് വിഷയമാകുന്നുണ്ട്. പണ്ട് സേതുമാധവന് സംവിധാനം ചെയ്ത ‘ദാഹം’ പോലുള്ള സിനിമകള് ഒരു ആശുപത്രിയില് നടക്കുന്ന കാര്യങ്ങള് മാത്രം കഥയാക്കി ചിത്രീകരിച്ചത് ഒരുദാഹരണമാണ്.
സിനിമ നമ്മുടെ ജീവിതത്തോട് അടുത്തുനില്ക്കുന്നതാണെങ്കിലും അതൊരു കലാപ്രവര്ത്തനമാണ് എന്ന് നാം തിരിച്ചറിയണം. നമ്മളുടെ ജീവിതത്തിലെ പ്രവൃത്തികളില് അതിന്റെ സ്വാധീനം അധികം വരുത്തേണ്ട കാര്യമില്ലെന്നും അദ്ദേഹം കുട്ടികളോട് ഉപദേശിച്ചു.
തകഴി ശിവശങ്കരപ്പിള്ളയുടെയും വൈക്കം മുഹമ്മദ് ബഷീറിന്റെയും പുസ്തകങ്ങളിലെ തിരഞ്ഞെടുത്ത ഭാഗങ്ങള് വിദാര്ഥിനികള് വായനദിനത്തോടനുബന്ധിച്ച് വായിച്ചു. ചടങ്ങില് പങ്കെടുത്ത വിദ്യാര്ഥികള് വായനാ പ്രതിജ്ഞയുമെടുത്തു. വിദ്യാര്ഥിനിയായ അഞ്ജലിയുടെ നാടന്പാട്ടോടെയാണ് പരിപാടി അവസാനിച്ചത്.
പി.എന്. പണിക്കര് ഫൗണ്ടേഷന്, സാഹിതി എന്നിവയുടെ സഹകരണത്തോടെ ഇന്ഫര്മേഷന് പബഌക് റിലേഷന്സ് വകുപ്പിന്റെ ജില്ലാ ഇന്ഫര്മേഷന് ഓഫീസാണ് വായനവാരത്തിന്റെ ജില്ലാതല പരിപാടികള് സംഘടിപ്പിക്കുന്നത്.
ജില്ലാ ഇന്ഫര്മേഷന് ഓഫീസര് കെ. സുരേഷ്കുമാര് സ്വാഗതവും സാഹിതി ജനറല് കണ്വീനര് ബിന്നി സാഹിതി നന്ദിയും പറഞ്ഞു. ഗായകനായ ആര്. സനിത് കുട്ടികള്ക്കായി ഗാനങ്ങള് ആലപിച്ചു.
